Jeremiah 49:3 - Tedim Bible

³ “Heshbon khua mite aw, kap un! Ai khua kisia khin zo hi! Aw, Rabbah khua numeite aw, kap un! Ippi puan silh un la, kap un; Khua lakah lung-am-in kawi taitai un. Bang hang hiam cih leh na Milkom pasian uh leh a siampite leh a uliante hong kilak khiatsak ding hi.

Tedim Bible Revision 2017

³ Heshbon khua mite aw, kap un! Ai khua kisia khinta! Rabbah khua numeite aw, kap un! Puanhampi silh unla kap un. Khua lakah lung-amin kawi taitai un. Bang hang hiam cih leh na Milkom pasian uh le a siampite le a uliante hong kilak khiatsak ding hi.

Jeremiah 49:3 Referans Kwoze

Jeremiah 48:7

Na hatnate uh leh na neihsate uh na suan’ manun note zong hong kipai khiatpih ding hi. Na pasian uh Khemosh zong a siampi teng leh a ulian teng tawh, kipai khiatpih ding hi.

Jeremiah 48:37

“Mi khempeuh in a lu uh met tol uh a, a khamul uh kiatsiang uh hi. A khutte uh kui kek uh a, a kawng uhah ippi puan a teeng uh hi.

Isaiah 15:2

A sangna munte ah a kap dingin Dibon khuamite pai to uh hi; Nebo leh Medeba khuate’ hangin Moab mite nakpi takin kap uh hi. Dahna limin lu khempeuh kimettol a, khamul khempeuh kimetmai hi;

Jeremiah 46:25

A vanglian Topa, Israel mite’ Pasian in: “En un, Keimah in Thebes khua-a Amon pasian leh Faro kumpipa-a kipan Izipt gam, a pasiante uh leh a kumpite uh, Faro kumpipa leh amah a muang mi khempeuh tungah daan ka tat ding hi.

Jeremiah 4:8

Tua ahih manin ippi puan silh un la, tau-in kap un; bang hang hiam cih leh Topa’ hehna lauhuaipi eite’ kiang pan kiheikhia nai lo hi.

2 KUMPI NIHNATE 23:13

Tua ciangin Israel kumpipa Solomon in Sidon mite’ kihhuaina Ashtoreth’ ading, leh Moabte’ kihhuaina Khemosh’ ading, leh Ammon mite’ kihhuaina Milkom’ ading a lam, Jerusalem nisuahna lam Oliv Mual leitaw lam-a om mual tunga biaknate kumpipa in susia hi.

1 KUMPI MASATE 11:33

bang hang hiam cih leh amah in kei hong nusia a, Sidon mite’ nusian Ashtoreth, Moab pasian Khemosh, leh Ammon mite pasian Milkom bia-in, a pa David bangin keima muhna ah a manin gamtatna leh ka thukhamte leh ka ngeina kipte zuihna tawh ka lampite tawn lo hi.

1 KUMPI MASATE 11:5

Bang hang hiam cih leh Sidon mite’ nusian Ashtoreth, leh Ammon mite’ aa ahi a kihhuai Milkom, Solomon in bia hi.

Jeim 5:1

Sum haute aw, tu-in hong pai un; note tungah hong tung ding gimna tawlna hangin kiko-in kap un.

Zefaniah 1:5

Innkhumzang ah kahto-in, ni, kha leh aksi a bia mi khempeuh ka susia ding a, keimah hong bia-in, keima tungah thuman ding gen napi-in, Milkom pasian’ min tawh a kiciam teiteite zong, ka susia ding hi.

Amos 1:15

A kumpipa uh leh a uliante salin kiman ding hi.

Jeremiah 51:8

Thakhat thu-in Babilon puk a, kisiagawp hi. Amah kah ngutngut un! A liammate adingin zatui la un; dam zo kha thei lai ding hi.

Jeremiah 49:1

Ammon mite tawh kisai-in Topa in a gen-inah: “Israel mite in tapa nei lo uh ahi hiam? Inn luah ding nei lo uh ahi hiam? Bang hangin Milkom pasian biate in Gad gam la-in a khuapite sungah teeng uh ahi hiam?

Jeremiah 48:20

Moab gam kisia khin zo hi, zumhuaina thuak khin zo hi. Thuum un la, kah un! Arnon gun dungah, Moab gam kisiatna thu va gen un.

Jeremiah 48:2

Moab gam minthan’na bei ta hi. Heshbon khua-ah a galte un a sim nading uh a vaihawm uh a, ‘Hong pai un, Moab gam i beimang sak ding hi,’ a ci uh hi. Madmen khua aw, nang zong na gamdai ta ding hi. Namsau in nang hong nungdelh ding hi.

Jeremiah 6:26

Ka tanu aw, ippi puan silh in la, vut lakah kikhuk in. Tapa khat neihsun sih suah bangin kap vangvang in, bang hang hiam cih leh a hong susia dingpa thakhat thu-in hong pai ding hi.

Isaiah 23:6

Tuipi gei-a teeng mite aw, Tarshish khua-ah tai un la, kap un!

Isaiah 23:1

Tai-ar khua tawh kisai thu: Tarshish teembaw hawlte aw, Tai-ar khua kisia a, inn leh khawlmunte om nawn lo ahih manin, kap un! Saipras gam panin hih thu amaute in za uh hi.

Isaiah 16:7

Tua ahih ciangin a thuakna uh hangin Moab mite kap hen la, mi khempeuh zong Moab— mite’ hangin kap ta hen. Nakpi takin gimna a thuak lai takun Kirhareseth khua a, a an lim nekte uh a phawk khak uh ciangin khasia-in kap uh hi.

Isaiah 14:31

Filistia khuapi kongpite aw, nakpi-in kap un; khuapite aw, kiko un; Filistia mi khempeuh aw, lau-in liing un! Bang hang hiam cih leh leilu lam panin galkap honte’ hong paina leivui khu hong kitung a, tua galkapte lakah a meidawi khat beek om lo hi.”

Isaiah 13:6

Topa’ ni hong nai ahih manin nakpi-in kap un; Vanglian Pa’ kiang panin suksiatna hong tung ta ding hi.

Joshua 8:28

Tua ahih ciangin Joshua in Ai hal a, tu ni donga a om mah bangin nin kholnapi khatin piangsak den hi.

Joshua 7:2

Joshua in Jerikho panin Beth-el nisuahna lam, Beth-aven gei-a om Ai khua-ah mi sawl a, amaute kiangah, “Paito un la a gam va ensim un,” a ci hi. Tua mite paito-in Ai khua va ensim uh hi.

Joshua 8:1

Tua ciangin Topa in Joshua kiangah, ‘Lau kei in la lungkia kei in; galkap khempeuh nang kiangah la in la, tho-in Ai-ah paito un; thei in, nangma khut sungah Ai kumpipa leh a mite, a khuapi, leh a leitang kong pia khin zo hi;

2 SAMUEL NIHNA 11:1

Galdo dingin kumpite a kuankhiat hun tua kum phalbi sungin David in Joab, leh amah tawh a om a nasemte, leh Israelte khempeuh sawl hi; amaute in Ammon mite sugawpin Rabbah umcih uh hi. Ahih hangin David Jerusalem ah om hi.

Ezra 2:28

Beth-el khua leh Ai khuami zanih leh sawmnih-le-thum ahi hi.