Jeremiah 48:7 - Tedim Bible

⁷ Na hatnate uh leh na neihsate uh na suan’ manun note zong hong kipai khiatpih ding hi. Na pasian uh Khemosh zong a siampi teng leh a ulian teng tawh, kipai khiatpih ding hi.

Tedim Bible Revision 2017

⁷ “Na hatnate uh le na neihsate uh na suan manun note zong hong kipaikhiat pih ding hi. Na pasian uh Khemosh zong a siampi teng le a ulian teng tawh, kipaikhiat pih ding hi.

Jeremiah 48:7 Referans Kwoze

Gamlak-vakna 21:29

O Moab! gimna na ngah hi, O Khemosh mite! na mangthang uh hi, Amah in a tapate gal tai-in, a tanute gal matin, Amor kumpipa Sihon adingin hong bawl hi.

Jeremiah 49:3

“Heshbon khua mite aw, kap un! Ai khua kisia khin zo hi! Aw, Rabbah khua numeite aw, kap un! Ippi puan silh un la, kap un; Khua lakah lung-am-in kawi taitai un. Bang hang hiam cih leh na Milkom pasian uh leh a siampite leh a uliante hong kilak khiatsak ding hi.

Jeremiah 9:23

Topa in a gen-inah: “Mipilte in a pilna uh kisak theihpih kei uh hen la, mihatte in a hatna uh kisak theihpih kei uh hen. Mihaute in zong a hauhna uh kisak theipih kei uh hen.

Late 52:7

“Pasian a beel lo, ama hauhnate a muang, ama hauhna a beelpa en un!” ci ding hi.

1 TIMOTI MASA 6:17

Hih leitungah sum hau mite in lungsim kiliatsakna tawh kipelhin, a kip tawntung thei lo sum hauhna muang loin, eite lungdam nading na khempeuh a kicingin hong pia Pasian muangin, nuntakna taktak ahi nuntakna ngah nadingin, hong tung ding hun ciangin, amau ading a bulpi pha zong kholin, midangte tungah thupha bawlna, gamtat hoihna kicingin, midang hopnopna lungsim nei-in, khat leh khat kipawl nadingin kilemna thu bawl nading thu na pia in.

Hosea 10:13

Ahi zongin note in thusia na tuh zawsop uh a, thusia gah na at uh hi. Na zuauna uh hanga piang gahte na ne uh hi. Note in na sakol leengte uh leh na galkap tamna uh muang kha na hih manun,

Jeremiah 48:46

Moab aw, gimna na thuak ding hi! Khemosh pasian a bia mite si khin ta uh hi. Na tapate uh sal dingin kipaipih khin a, na tanute uh zong thongkia dingin kipaipih hi.

Jeremiah 48:13

Tua ciangin Israel mite, a muan’ uh Bethel pasian in a maizum sak mah bangin, Moab mite, a biak uh Khemoshpasian in a maizum sak ding hi.

1 KUMPI MASATE 11:33

bang hang hiam cih leh amah in kei hong nusia a, Sidon mite’ nusian Ashtoreth, Moab pasian Khemosh, leh Ammon mite pasian Milkom bia-in, a pa David bangin keima muhna ah a manin gamtatna leh ka thukhamte leh ka ngeina kipte zuihna tawh ka lampite tawn lo hi.

Mangmuhna 18:7

Amah in ama pumpi pahtawi-in nopsakna a khan’ mah bangin, nakpi-a bawlsiatna leh kahna kikona thuaksak in. Bang hang hiam na cih uh leh, amah in, “Kei kumpinu ka hi hi, meigongnu ka hi kei hi. Cikmah hunin ka kap ngei kei ding hi,” ci-in a lungsim sungah a kingaihsun hi.

Jeremiah 43:12

Izipt pasiante a kibiakna biakinnte a hal ding a, a pasiante uh hal-in a puakhia ding hi. Tuucingte in a puan uh tung-a khahte paai khia-a a sian’sak uh bangin amah in Izipt gam a siangsak ding a, tua khit ciangin ngaihmuang tak-in a ciahkik ding hi.

Jeremiah 13:25

Hih pen nangma’ tan’ dinga kong sehsa ahi hi, Topa in kong ci hi. Bang hang hiam cih leh kei nong mangngilh a, pasian zuau peuh na um hi.

Late 40:4

Topa muang a, mi kiphasakte lam-a kihei lo, pasian manlote lamah a paikhial lo mi in thupha ngah ahi hi.

1 KUMPI MASATE 11:7

Tua ciangin Solomon in Jerusalem nisuahna lam mual tungah Moab mite’ aa ahi, a kihhuai Khemosh leh Ammon mite’ aa ahi a kihhuai Molek adingin mual tunga biakna khat lam hi.

Thukhente 11:24

Na Pasian Khemosh in na neih dinga hong piakte tang lo ding na hi hiam? Topa ka Pasian un kote mai-ah a suankhiatte kote in ka tang ding uh hi.

2 SAMUEL NIHNA 5:21

Filistiate in tua lai-ah a milimte uh nusia uh a, David leh a mite in tuate puakhia uh hi.

Jeremiah 49:4

A zulhzau numei aw, bang hangin na hatna kisaktheihpih na hi hiam? ‘Kua in hong sim zo ding hiam?’ ci-in bang hangin na hauhna suang na hi hiam?