Jeremiah 44:8 - Tedim Bible

⁸ Note in si-in, leitunga minam dang khempeuhte in kihaamsiatna-a hong zat ding uh leh a hong simmawh nadingun bang hangin na khut uh tawh milim bawl-in na teen’ nadingun na zuat uh Izipt gamah pasian dangte’ kiangah paknamtui hal-in kei hong hehsak na hi uh hiam?

Tedim Bible Revision 2017

⁸ Note si-in, leitung a minam dang khempeuhte in hamsiatna-in a hong zat ding uh le hong simmawh nadingun bang hangin na khut uh tawh milim bawlin, na ten nadingun na zuat uh Egypt gamah pasian dangteʼ kiangah paknamtui halin kei hong hehsak na hi uh hiam?

Jeremiah 44:8 Referans Kwoze

Jeremiah 42:18

“Bang hang hiam na cih uh leh a vanglian Topa, Israel mite’ Pasian in kong cih-inah: Jerusalem khua-a teeng mite’ tungah ka hehna leh ka thangpaihna a kibuak mah bangin Izipt gam na pai uh leh note tungah ka hehna hong kibua ding hi. Mite in note hong lipkhap ding a, kihaamsiatna-in hong zangin hong zahko ding uh hi. Note in hih mun na mu kik nawn kei ding uh hi, ci-in a gen hi,” a ci hi.

Jeremiah 44:3

Bang hang hiam cih leh amaute in ka heh nadingin gitlohna bawl uh a, amaute-a kipan note leh na pute na pate un a theih ngei loh uh pasiante’ na semin paknamtui hal-in a bia uh hi.

Jeremiah 18:16

Amau’ gam uh a mulkimhuai leh simmawhna tawh a kiphitsan den ding gam a suaksak uh hi. A kantan mi khempeuh a mulkim uh a, lamdang sa-in a lu uh a pei uh hi.

2 KHANG TANGTHU NIHNATE 7:20

note tungah kong piaksa leitang panin note kong botkhia ding hi; tua ciangin ka min dingin ka apsa hih inn ka muhna panin ka lawnkhia ding a, mi khempeuh lakah paunak leh gentehna ka suaksak ding hi.

Hebru 3:16

Thu za napi-un kilemlohna bawlin a hehsak mite kua ahi hiam? Moses nungzui-in Izipt gam pan a paikhia uh mi khempeuhte in tua bang hilo ahi uh hiam?

Jeremiah 44:12

Izipt gama teeng ding a, lungsim a khensat khin Judah mi a om laite, a vekpi-un ka si sak khin ding hi. Izipt gamah namsau tawh kithat sakin kial tawh ka puksisak ding hi. A neu penpen-a kipan a golpen dongin namsau leh kialpi tawh a si ding uh a, mite’ lipkhap, mite in kihaamsiatna-in a zat leh, mite’ simmawh ka suaksak ding hi.

Jeremiah 44:7

Tu-in a vanglian Topa Pasian, Israel mite’ Pasian in kong gen-inah: Bang hangin’ note in hih bangin note’ siat nadingin mawhna lianpi bawl na hi uh hiam? Judah gam sungah papi, nupi, naupang leh naungek-a kipan a nungta lai kuamah om nawn kei hen, cih na deihna uh ahi hiam?

Jeremiah 29:18

Amaute namsau, kialpi leh pulnatna tawh ka nung delh ding a, ka hawlkhiat nading mun khempeuh ah mite in kihaamsiatna-a a zat dingun simmawhna leh zahkonate ka thuaksak ding a, amaute’ thuakna hangin leitung gam khempeuh ka lausak ding hi.

Jeremiah 26:6

hih biakinnpi Shiloh khua ka bawl bangin ka bawl ding a, hih khuapi leitung gam khempeuhte’ kihaamsiatna-in ka zangsak ding hi,’ na ci ding hi,” a ci hi.

Jeremiah 24:9

Amaute ka hawlkhiat nading mun khempeuh mite in kihaamsiatna a, a zat dingun simmawhna leh zahkonate ka thuaksak ding a, amaute’ thuakna hangin leitung gam khempeuh ka lausak ding hi.

Isaiah 65:15

Keima teel mite in ciamsiatna-in na min uh zang ding uh a, Topa Pasian in note hong that ding hi; ahih hangin ama nasemte pen min dang phuah ding hi.

Isaiah 3:8

Bang hang hiam cih leh, amau kampaute leh amau gamtatnate in Topa langpangin, a minthang ama omna dem uh ahih manin, Jerusalem khua kipukin, Judah gam kia hi.

Isaiah 19:1

Izipt gam tawh kisai thu: A manlang mahmah meii tungah Topa tuangin Izipt gamah pai hi; ama mai-ah Izipt gam milimte liing ding a, Izipt mite’ han’na bei ding hi.

Jeremiah 7:9

Note in na gu-in, tual that-in, angkawmin, a hi lopi kiciam-in, Baal kiangah meihal biakna pia-in, na theih ngei loh uh pasian dangte delhin,

Jeremiah 11:12

Tua ciangin Judah mite leh Jerusalem khua mite in meihal biakna tawh a biak uh a pasiante uh kiangah pai-in na va thuum ding uh a, ahih hangin hih gimna hong tun’ ciangin a honkhia thei tuan kei ding uh hi.

Jeremiah 11:17

Israel mite leh Judah mite in mei halna tawh Baal bia-in hong heh sak-a siatna a bawl manun, nang a hong phut keimah a vanglian Topa in nang’ tungah siatna tun’ nading thu kong pia zo hi,” a ci hi.

Hosea 4:13

Amaute in mual sangte’ dawn-a biakna munte-ah biakna pia uh a, a nuai liim hoih ahih manin mual neute tungah a po tawsaw kung, poplar kung, leh terebinth kungte nuai-ah paknamtui halin bia uh hi. Tua thu hangin na tanute uh numei paktat suak uh a, na mote un midang tawh mawhna a bawl uh hi.

Habakkuk 1:16

A ngente un amau’ deih peuhpeuh ngahsak ahih manin, amaute in a ngente uh bia-in, biak piakna zong pia uh hi.

Thu-hilhkikna 32:25

Namsau in amaute gamlakah susia in, inn sungah launa lianpi om ding a, tangval leh nungak, naungek nawi nete sam kangsate tawh susia khawm ding hi.

Jeremiah 32:30

Bang hang hiam cih leh Israel mite leh Judah mite in a neu lai pek uh a, kipan ka muhna-ah siatna bekbek a bawl uh a, keimah Topa in kong cih-inah, Israel mite in a khut uh tawh milim a bawlna uh hangin kei hong heh sak uh hi.

Ezekiel 9:6

Puteek, nungak tangval, numei naupang dong takin va that un la, ahi zongin a taltangah ciamtehna a nei peuhmah su kei un. Hih ka biakinn mahmah panin kipan pah un,” a cihna ka za hi. Tua ahih manin tua biakinn sunga ding Israel makaite, kipatna in nei pah uh hi.

Ezekiel 33:11

Amaute kiangah hih bangin gen in: Keimah in a nungta Topa Pasian ka hih mah bangin mawhnei mi khat a si ka muh ciangin nuam ka sa het kei hi. A mawh gamtatna khawlin a nuntak ding ka deihna hi zaw hi. Israel mite aw, na mawh gamtatnate uh khawl un. Bang hangin si nuam se na hi uh hiam?