Jeremiah 44:6 - Tedim Bible

⁶ Tua ahih manin Judah gam khuapite’ sung leh Jerusalem khua kongzing lakah ka hehna leh ka thangpaihna ka bua-a ka kuangsak hi. Tu ni-a na muh uh bangin tuate kisia-in gamlak suak khin ta hi.

Tedim Bible Revision 2017

⁶ Tua ahih manin Judah gam khuapite sung le Jerusalem khua kongzing lakah ka hehna le ka thangpaihna ka bua a, ka kuangsak hi. Tu ni-a na muh uh bangin tuate kisia-in gamlak suak khinta hi.

Jeremiah 44:6 Referans Kwoze

Jeremiah 7:20

Tua ahih manin Topa in kong cih-inah: En in, ka hehna leh ka thangpaihna hih munah ka bua ding-a, mihingte tung leh ganhingte tung, lo lai-a singkungte leh lei laka singgahte tungah ka sung ding hi. Ka hehna a kuang ding a, a kisumit kei ding hi.

Ezekiel 8:18

Tua ahih manin amaute in ka heh mahmahna thuak ding uh a, amaute ka zah kei ding a, zong ka khasiat kei ding hi. Amaute in a tha neih tawpun kei tungah thu hong nget uh hangin amaute’ thungetna ka ngai kei ding hi,” hong ci hi.

Jeremiah 42:18

“Bang hang hiam na cih uh leh a vanglian Topa, Israel mite’ Pasian in kong cih-inah: Jerusalem khua-a teeng mite’ tungah ka hehna leh ka thangpaihna a kibuak mah bangin Izipt gam na pai uh leh note tungah ka hehna hong kibua ding hi. Mite in note hong lipkhap ding a, kihaamsiatna-in hong zangin hong zahko ding uh hi. Note in hih mun na mu kik nawn kei ding uh hi, ci-in a gen hi,” a ci hi.

Jeremiah 21:5

Keimahmah in hehna leh thangpaihna lianpi tawh ka ban zan-in, a hat mahmah ka khut tawh note kong do ding hi.

Jeremiah 7:34

Tua ciangin Judah gam khuapite leh Jerusalem khua kongzing lakah gualnopna leh lungdamna awte leh zi nei thakte leh mothakte’ awte ka gingsak nawn kei ding hi; bang hang hiam cih leh tua mun kinusia ding hi.

Isaiah 51:20

Na mite gim khin a, ngenthang sunga sanang a awk bangin lamlian kiu khempeuh ah amaute lum uh hi; Topa’ hehna, na Pasian’ taiina amaute in thuak uh hi.

Isaiah 51:17

Topa’ khut sung panin ama hehna hai a dawn khin, hoina haipi a tawdat dongin a dawn khin Jerusalem aw, nangmah khanglo in nangmah khanglo in la, dingto in.

Isaiah 6:11

Tua ciangin keimah in “Topa aw, bang tanvei sawt ding ahi hiam?” ka ci hi. Amah in, khuapite-ah a teeng kuamah om loin hawm suakin, innte ah kuamah om loin kinusia a, leitang pen gamkhing suak kiuhkeuhin,

Nahum 1:2

Topa Pasian in amah a demte koihkhong lo a, amah a langpangte daantatin, a galte thukkik hi.

Daniel 9:12

Na gensa bangin kote tung leh ko hong ukte tungah a nasia gimna nong tungsak zo hi. Leitunga om khuapi dang khatpeuh na hih ngei loh pen Jerusalem tungah na hih hi.

Ezekiel 24:13

Jerusalem aw, na gamtat hoih lohnate in nang hong ninsak khin hi. A sian’suah dingin kong hanciamciam hangin a nin mahin na om lai veve hi. Ka heh mahmahna na thuak khit matengin na siang kik ngei kei ding hi.

Ezekiel 24:8

Ka heh suakin a phu a kilak theih nadingin a man’than’ theih loh nading munah a sisante tua ci-in ka omsak hi.

Ezekiel 20:33

“Keimah in a nungta Topa Pasian ka hih mah bangin, khut khauh tak leh ka vangliatna leh ka hehna tawh note kong uk gawp taktak ding hi.

Ezekiel 6:12

A gamla-a omte cina-in si ding uh a, a nai-a omte gal sungah si ding uh hi. A om lai sunte gilkialin puksi ding uh hi. Amaute in keima hehna thuak ding uh hi.

Ezekiel 5:13

“Ka lung a kim dongin kong hih ding a, ka hehna leh ka sinsona teng na thuak ding uh hi. Note tungah hih thute hong tun’ ciangin, note cihtaklohna hangin deihsakluatna tawh a hong heh pau ka hihna na phawk ding uh hi.

Jeremiah 36:7

Amaute in Topa tungah thuum-in a vekpi-un a hoihlohna uh panin a kihei kha thei ding uh hi. Bang hang hiam cih leh hih mite tungah Topa in tun’sak dinga a gensa a hehna leh a thangpaihna lian mahmah hi,” a ci hi.

Jeremiah 21:12

David’ suante aw! Topa in a cih-inah: Zingsang simin man takin thu khen un la, mi bawlsiapa’ khut sung pan a bawlsiatpa hon khia un. Tua bang na hih kei uh leh na siatna bawlnate hangun ka hehna mei bangin a kuang ding a, kuamah in a phelh zo kei ding hi.

Jeremiah 4:4

Judah mite leh Jerusalem khua mite aw, Topa’ tungah vun at un la, na lungtang uh vun at un. Na tua cih kei leh na bawl uh mawhnate hangin, ka hehna mei bangin hong kuangkhia ding a, a phelh zo kuamah om lo ding hi,” a ci hi.

Siampi Laibu 26:28

note tawh a kilehngatin ka heh ngawh pah ding a, note’ khialhna hangin keimahmah in a zah sagih vei-in kong thuhilh ding hi.

Siampi Laibu 26:31

Keimah in na khuapite uh siasakin, na biakinnte uh gamkhing ka suaksak ding a, nomau’ gim namtuite ka diik kei ding hi.

Isaiah 1:7

Na gam uh khing a, na khuapite uh mei tawh kihal hi; na muh tangpi mahun gamdang mite in na gam uh hong laksak a, theih ngei lohte’ lotthal bangin na khempeuh susia gawp uh hi.

Jeremiah 4:27

Bang hang hiam cih leh Topa in, “Gam buppi gamlak suak ding a, ahih hangin ka susia suak sam kei ding hi.

Jeremiah 7:17

Judah gam khuapite sung leh Jerusalem khua kongzing lakah bang hih uh cih mu lo na hi hiam?

Jeremiah 34:22

En un, Topa in kong cih-inah, keimah in thu ka pia ding a, hih khuapi-ah kong la kik ding hi. Amau in hih khuapi hong simin, hong la-in, mei tawh hong halsak ding uh hi. Judah gam khuapite kuama’ teen’ lohna mun awng ka suaksak ding hi,” a ci hi.

Kah la 1:13

Amah in vantung panin meikuang hong khia a, ka sung lam a hong kang hi. Amah in thang hong siah a, awk-in lei lakah ka kipuk hi. Tua bangin natna ka thuak tawntung hi.

Ezekiel 20:34

Gam khempeuh-a note kong thehthangna panin kong kaihkhop kik ciangin note tungah ka vangliatna leh ka hehna kong lak ding hi.

Zekhariah 1:2

Topa in Zekhariah kiangah, “Mite tungah hih bangin thu gen in la, ‘Na pu na pate uh tungah Topa ahi keimah ka heh mahmah hi.

Zekhariah 7:14

Tua ahih manin Topa in “Huihpi’ mut khiat bangin amaute thehthang gawpin, a theih ngei lohna uh gam dangah amaute teeng ding uh hi. Amau’ nusiat leitang hoih in zong gamkhing suak ding a, a sungah kuamah om nawn loin daicip ding hi,” a ci hi.

Jeremiah 8:3

Hih a gilo minamte’ laka a omlai sun teng in ka hawlkhiatna munah nuntak ding sangin sih ding a teelzaw ding uh hi, a vanglian Topa in kong ci hi.

Jeremiah 44:22

Topa in na hoihlohnate uh leh na bawl uh kihhuainate hangin no hong thuak zo nawn lo hi. Tua ahih manin tuni mahmah-in zong na gam uh gamlak suak khin a, mite’ kihaamsiatna suakin kuamah teeng nawn lo hi.

Kah la 1:1

Khat vei lai-a mi a dim taka a teen’na Jerusalem khuapi in bang zah ta-a gamdai ahi hiam? Leitung bup in a zahtak khuapi tu-in meigong tawh a kibang hi. Leitung khuapi khempeuhte’ lak panin a thupipen tu-in sal-in a kiman khin zo hi.

Kah la 5:18

Zion mual in gamdaihna-ah kinusia khin ahih manin se-alte a kawivak uh hi.

Zekhariah 1:6

Ahi zongin ka nasem ahi kamsangte’ tung tawnin ka hilhkholhna leh ka thupiaknate in note dongin hong su kha lo ding sa na hi uh hiam? Tua ahih ciangin a tawpna-ah amaute kisik uh a, hih dinga ka lungsimah ka geelsa bangin amau’ gamtatna tawh kizui-in daan ka piakna thu phawk uh hi,’ ci in,” a ci hi.