Jeremiah 44:22 - Tedim Bible

²² Topa in na hoihlohnate uh leh na bawl uh kihhuainate hangin no hong thuak zo nawn lo hi. Tua ahih manin tuni mahmah-in zong na gam uh gamlak suak khin a, mite’ kihaamsiatna suakin kuamah teeng nawn lo hi.

Tedim Bible Revision 2017

²² Topa in na hoih lohnate uh le na bawl uh kihhuainate hangin note hong thuak zo nawn lo hi. Tua ahih manin tu ni mahmah in zong na gam uh gamlak suak khin a, miteʼ kihamsiatna suakin kuamah teeng nawn lo hi.

Jeremiah 44:22 Referans Kwoze

Jeremiah 25:18

Jerusalem leh Judah gama khuapite, a kumpite uh leh a gam uh uliante ka dawn sak a, tuni dongin gam simtham suakin, mite’ simmawhna thuakin, a min uh haamsiat nadingin a kizang hi.

Malakhi 2:17

Na thugen genna uh tawh Topa na gimsak uh hi. Note in, “Bangci gimsak ka hi uh hiam?” na ci uh hi. “Topa in a sia-a gamtate a hoihin ngaihsun a, zong itin amaute tungah lungkim takpi hi,” na cihna khawng uh leh, “A thutang gen Pasian koi lai-ah om ahi hiam?” ci-in na dotnate uh tawh na gimsak uh hi.

Jeremiah 44:12

Izipt gama teeng ding a, lungsim a khensat khin Judah mi a om laite, a vekpi-un ka si sak khin ding hi. Izipt gamah namsau tawh kithat sakin kial tawh ka puksisak ding hi. A neu penpen-a kipan a golpen dongin namsau leh kialpi tawh a si ding uh a, mite’ lipkhap, mite in kihaamsiatna-in a zat leh, mite’ simmawh ka suaksak ding hi.

Jeremiah 25:38

Topa’ namsau hangin ahi zongin a lauhuai ama’ hehna hangin ahi zongin, amau’ gam in gam simtham suak khin ahih manin humpi in a kua a nusiat bangin Topa in a mite a nusia zo hi.

Jeremiah 25:11

Gamsung khempeuh kisia-in gam simtham suak ding a, hih mite khempeuh kum sawmsagih sung Babilon kumpipa’ sal-in a om ding uh hi.

Jeremiah 18:16

Amau’ gam uh a mulkimhuai leh simmawhna tawh a kiphitsan den ding gam a suaksak uh hi. A kantan mi khempeuh a mulkim uh a, lamdang sa-in a lu uh a pei uh hi.

Isaiah 43:24

Kei’ adingin sum tawh paknamtui nong lei sak nai kei a, nangmah in biakna sa a thaute tawh nong taii sak nai kei hi. Ahih hangin nang in na khialhna tawh kei tungah vangik nong suan khin a, na mawhna tawh kei nong gimsak khin hi.

Isaiah 7:13

Tua ciangin Isaiah in, “David innkuan aw, ngai un! Mite na lunggim sakna uh thu neu sa a, ka Pasian zong lunggim sak na hi uh hiam?

ROM (Romans) 9:22

Pasian in ama hehna hong lak a, a vangliatna a kitheihsak nading a deih maninah a kisia ding a bawlsa, hehna a thuak beelte a lungneemna tawh a thuak leh, bang gen ding a om lai hiam?

Amos 2:13

Tu-in, a puak buhlomte in bawngleeng a netcip suk bangin, note na omna mun uhah kong nengcip suk ding hi.

Daniel 9:12

Na gensa bangin kote tung leh ko hong ukte tungah a nasia gimna nong tungsak zo hi. Leitunga om khuapi dang khatpeuh na hih ngei loh pen Jerusalem tungah na hih hi.

Ezekiel 5:13

“Ka lung a kim dongin kong hih ding a, ka hehna leh ka sinsona teng na thuak ding uh hi. Note tungah hih thute hong tun’ ciangin, note cihtaklohna hangin deihsakluatna tawh a hong heh pau ka hihna na phawk ding uh hi.

Jeremiah 44:6

Tua ahih manin Judah gam khuapite’ sung leh Jerusalem khua kongzing lakah ka hehna leh ka thangpaihna ka bua-a ka kuangsak hi. Tu ni-a na muh uh bangin tuate kisia-in gamlak suak khin ta hi.

Jeremiah 44:2

“A vanglian Topa, Israel mite’ Pasian in kong gen-inah: Note in Jerusalem khua leh Judah gam khuapi khempeuh tungah ka tun’sak gimna na mu zo uh hi. En un, tu ni-in tua khuate a siasa mahin om lai-a kuamah teeng lo hi.

Jeremiah 29:19

Bang hang hiam cih leh, Topa in kong cih-inah, ka nasem ka kamsangte’ tung tawnin kong puak ngitnget thute amaute in thupisim loin a hong mang kei uh hi.

Jeremiah 26:6

hih biakinnpi Shiloh khua ka bawl bangin ka bawl ding a, hih khuapi leitung gam khempeuhte’ kihaamsiatna-in ka zangsak ding hi,’ na ci ding hi,” a ci hi.

Jeremiah 24:9

Amaute ka hawlkhiat nading mun khempeuh mite in kihaamsiatna a, a zat dingun simmawhna leh zahkonate ka thuaksak ding a, amaute’ thuakna hangin leitung gam khempeuh ka lausak ding hi.

Jeremiah 15:6

Nangmah in kei nong taisan zo hi, Topa in kong ci hi, kei nong nungngat niloh hi; tua ahih manin ka khut kong zan-a kong susia hi—ka hehna ka ki-ipip zo nawn kei hi.

Isaiah 1:24

Tua ahih ciangin, Topa, Vanglianpen Topa, Israelte’ Vanglian Pa in hih bangin ci hi: “Ah, ka lang ahi note tungah ka hehna kong khahkhia ding a, ka gal ahi note tungah keimah in kong thuk ding hi.

Piancilna 19:13

bang hang hiam cih leh hih mite a kimawhsakna thu lianpi Topa’ tungah tung khin a, a susia dingin Topa in kote hong sawl khin ahih ciangin hih mun a susia ta ding ka hi uh hi,” ci uh hi.

Piancilna 6:3

Tua ciangin Topa in, “Ka Kha inmi tawh buai paisuak lo ding hi, bang hang hiam cih leh mihing pumpi in a si thei ci-le-sa hi a, a khan’ in kum za leh kum sawmnih hi ding hi,” ci hi.

Jeremiah 4:4

Judah mite leh Jerusalem khua mite aw, Topa’ tungah vun at un la, na lungtang uh vun at un. Na tua cih kei leh na bawl uh mawhnate hangin, ka hehna mei bangin hong kuangkhia ding a, a phelh zo kuamah om lo ding hi,” a ci hi.

Jeremiah 21:12

David’ suante aw! Topa in a cih-inah: Zingsang simin man takin thu khen un la, mi bawlsiapa’ khut sung pan a bawlsiatpa hon khia un. Tua bang na hih kei uh leh na siatna bawlnate hangun ka hehna mei bangin a kuang ding a, kuamah in a phelh zo kei ding hi.

Jeremiah 23:2

Tua ahih manin ka mipihte a kem gam ukte tawh kisai-in Topa, Israel mite’ Pasian in hong gen-inah, “Note in ka mite kikhenthang sakin na hawlkhia mang uh a, amaute na don kei uh hi. En un, Topa in kong cih-inah, na gamtat siate uh hangin daan kong pia ding hi.

Jeremiah 29:18

Amaute namsau, kialpi leh pulnatna tawh ka nung delh ding a, ka hawlkhiat nading mun khempeuh ah mite in kihaamsiatna-a a zat dingun simmawhna leh zahkonate ka thuaksak ding a, amaute’ thuakna hangin leitung gam khempeuh ka lausak ding hi.

Jeremiah 30:14

Na lawm ngaihte un hong mangngilh khin uh a, hong don nawn lo uh hi. Bang hang hiam cih leh na khialhnate uh lian lua-in, na mawhnate uh nasia lua ahih manin, galte bangin note kong bawl-a, nasia takin daan kong thuaksak hi.

Jeremiah 34:22

En un, Topa in kong cih-inah, keimah in thu ka pia ding a, hih khuapi-ah kong la kik ding hi. Amau in hih khuapi hong simin, hong la-in, mei tawh hong halsak ding uh hi. Judah gam khuapite kuama’ teen’ lohna mun awng ka suaksak ding hi,” a ci hi.

Jeremiah 42:18

“Bang hang hiam na cih uh leh a vanglian Topa, Israel mite’ Pasian in kong cih-inah: Jerusalem khua-a teeng mite’ tungah ka hehna leh ka thangpaihna a kibuak mah bangin Izipt gam na pai uh leh note tungah ka hehna hong kibua ding hi. Mite in note hong lipkhap ding a, kihaamsiatna-in hong zangin hong zahko ding uh hi. Note in hih mun na mu kik nawn kei ding uh hi, ci-in a gen hi,” a ci hi.

Jeremiah 48:9

Moab mite a leen’ khiat theih nadingun vasa’ kha pia un. A khuapite uh gamlak suak ding a, kuamah a teeng kei ding hi.

Ezekiel 39:23

Tua ciangin kei tungah hong khialhna hangin Israel mite sal suak uh a, amaute nungngatin, a galte uh khut sungah pia-in gal sungah a vekun a sisak ka hihna,

2 KUMPI NIHNATE 17:15

Amaute in ama thukhamte, leh a pu a pate uh tawh a bawl a thuciamna, leh amaute tungah a piak hilhkholhnate simmawh uh hi. Amaute in a mawkna milimte zui-in a mawkna suak uh a, amaute tawh kibangin gamta kei un ci-in Topa in a thupiak tawh kisai-in, amaute in amau’ kim-a om minamte zui uh hi.

Jeremiah 5:9

Hih thute hangin amaute daantat lo ding ka hi hiam? Topa in ka gen-inah, hi ci bang minam’ tungah thukkik lo ding ka hi hiam?

Daniel 9:11

Israelte khempeuh in na gensa thute leh na thukhamte khempeuh a palsat khin zo uh hi. Na tungah khialhna ka hong bawl manun, na nasem Moses thukham sunga kigelh bangin kote tungah samsiatna leh thukhenna a hong tung hi.