Jeremiah 4:16 - Tedim Bible

¹⁶ Minamte’ kiangah va gen un la, Jerusalem’ kiangah va tangko un. “Gamlapi panin galte hong pai uh a, Judah gam khuapite’ lang khatah hong kiko uh hi.

Tedim Bible Revision 2017

¹⁶ Minamte kiangah va gen unla, Jerusalem kiangah va taangko un. “Gamlapi panin mite hong pai uh a, Judah gam khuapite langpangin hong kiko uh hi.

Jeremiah 4:16 Referans Kwoze

Ezekiel 21:22

Jerusalem ah a pai ding ai a phatna a lak a thaltangte a taklam khutah tawi hi. Tua ai in Jerusalem ah a pai nading, gal nan’ nading phung a cian’ nading galsim nadingin a kiko nading, kulhpite satkham nading molhtumte a bawl nading, kidal nading phung bawlin dumte a tawh nading gen hi.

Jeremiah 5:15

En un, Israel minamte aw, Topa in kong cih-inah, gamlapi panin note hong sim dingin gam khat kong kuansak ding hi. Tua gam in tanglai peka a om sa, a hat mahmah, amaute’ pau na theih loh uh gam khat ahi hi.

Isaiah 39:3

Tua ciangin Kumpipa Hezekiah kiangah kamsangpa Isaiah hong pai-in, “Hih mite in bang gen ahi hiam? Koi lai panin nang kiangah hong pai ahi hiam?” a ci hi. Hezekiah in, “Amaute, a gamlapi, Babilon gam panin kei kiangah hong pai uh ahi hi,” a ci hi.

Jeremiah 50:2

“Gam khempeuh ah genin tangko un; dial khai un la, im kei un. ‘Babilon’ khuapi kila ta hi. Bel pasian maizum ta, a Merodak pasian kitangawp ta hi. A milimte uh maizum ta a, a pasiante uh kisiagawp ta hi,’ ci-in tangko un.

Jeremiah 39:1

Judah gamah Zedekiah kumpi a suah zawh kum kua leh kha sawm a phak laitakin, Babilon kumpipa Nebukhadnezzar leh a galkap khempeuh Jerusalem khua sim dingin hong pai uh hi.

Jeremiah 31:10

“Aw, gamdangte aw, Topa’ kammal ngai un la, gamla pi, tuipi gei-a omte kiangah va gen sawn un. ‘Israel mite a kithehthangsak pa in a kaikhawm kik ding a, tuucingpa in a tuute a cin’ bangin a cing ding hi,’ va ci un.

Jeremiah 16:6

Hih gamah miliante leh mineute a si ding uh a, kivui loin, amau adingin kuamah kap loin, kuamah in a pumpi uh kui liam loin, a sam uh a met kei ding uh hi.

Jeremiah 6:18

Tua ahih manin Topa in: “Gamdangte aw, ngai un. Mite aw, amau’ tungah bang tung ding hiam, cih thei un.

Jeremiah 5:6

Tua ahih manin tuulak panin humpi khat in amaute that ding a, sehnel gam panin keivom khat in a petgawp ding hi. Kamkei khat in a khuapite uh vil gige a, a pusuak khia peuhpeuh balzan gawp ding hi; bang hang hiam cih leh amaute’ mawhna uh tamlua a, kei hong taisan mun lua uh hi.

Jeremiah 4:17

Judah gam in kei hong langpan’ ahih manin a galte in lo hongte bangin a kimkot-ah a pang dimdiam uh hi, Topa in kong ci hi.

Jeremiah 2:15

Humpite bangin a galte in amah hawk uh a, nakpi takin a hawkgawp uh hi. A gam uh gam simtham a suah uh a, a khuapite cim-in kuamah teeng lo hi.

Isaiah 34:1

Minamte aw, thu za dingin hong nai un, mihingte aw, ngai un. Leitang leh a tunga om khempeuh aw, ngai un; leitung leh a tung pan a, hong paite khempeuh in ngai un.

Jeremiah 1:15

Bang hang hiam cih leh leilu-a om gam khempeuh keimah in ka sam a, amaute hong pai-in Jerusalem khua kongpite-ah ahi zongin, khua kimkot-a kulh kimte-ah ahi zongin, Judah gam khuapi khempeuh kimte-ah ahi zongin a kumpi tokhomte uh hong phut ciat ding uh hi.

Jeremiah 8:19

Ngai un, gamsung mun khempeuh panin ka mite’ tanute kap uh hi: “Zion khua-ah Topa om nawn lo ahi hiam? A kumpipa uh om nawn lo ahi hiam?” a ci uh hi. Topa in dawng kik a, “Bang hangin a milim bawl tawmte uh leh a gamdang milimte uh tawh kei hong hehsak uh ahi hiam?” a ci hi.

Jeremiah 6:19

Leitung aw, ngai in! En in, hih mite tungah a thuak ding mah uh-a kilawm siatna ka tung sak ding hi; bang hang hiam cih leh ka thu hong ngai lo uh a, ka thukhamte a nial uh hi.

Jeremiah 6:22

Topa in, “En un, leilu lam gam panin mi hong pai uh a, leimong gamlapen panin gam lian khat galsim dingin kithawithawi hi.

Jeremiah 6:23

Thal leh teipi tawi uh a, giloin hehpihna lungsim nei loin, a husa uh tuipi ging tawh kibang hi. Zion’ tanu aw, amaute sakol tungah tuangin, nangmah do dingin a kithawi uh hi!” a ci hi.