Jeremiah 38:23 - Tedim Bible

²³ Na zite leh na tate khempeuh Khaldea mite kiangah kipaipih ding a, nangmahmah zong amaute’ khut sung panin na suakta kei ding hi. Babilon kumpipa in hong man ding a, hih khuapi mei tawh a kangtum ding hi,” a ci hi.

Tedim Bible Revision 2017

²³ Na nupite le na tate khempeuh Babylon mite kiangah kipaipih dinga, nang mahmah zong amauteʼ khut sung panin na suakta kei ding hi. Babylon kumpipa in hong man dinga, hih khuapi mei tawh a kaang tum ding hi,” ka ci hi.

Jeremiah 38:23 Referans Kwoze

Jeremiah 41:10

Tua ciangin kumpi cing galkapmang Nebuzaradan in, Ahikam’ tapa Gedaliah’ uk dinga a piak kumpipa’ tanute leh Mizpah khua-a a kinusia mite khempeuh-a kipan Mizpah khua-a a om lai mi vannuai khempeuh Nethaniah’ tapa Ishmael in a man a, Ammon gam lam zuanin a paikhiatpih hi.

Jeremiah 39:6

Riblah khua-ah Babilon kumpipa in Zedekiah’ muh mahin a tapate thahlup sak a, Judah gam kumpi ulian khempeuh zong a thatlum hi.

Jeremiah 38:18

Ahih hangin Babilon kumpipa’ uliante na belh kei leh hih khuapi Khaldea mite’ khut sungah kipia ding a, amau in mei tawh hal-in amaute’ khut sung pan na suakta kei ding hi,” a ci hi.

2 KUMPI NIHNATE 25:7

Amaute in Zedekiah’ muhna ah a tapate thatin, Zedekiah’ mitte khelkhia uh a, amah kol bulhin Babilon ah paipih uh hi.

Ezekiel 43:3

Hih ka maang muhna pen, Pasian in Jerusalem khuapi susia dingin a pai lai-a ka muh leh Khebar Gun gei-a ka muh tawh kibang hi. Tua ciangin thakhatin leilak kiden’na-in ka boksuk hi.

Ezekiel 14:9

Kamsang khatpeuh peuh kikhemin a man loin thu hong dawn’ leh, Topa ahi keima’ khem hi ding hi. Israel mite lak panin tua kamsangpa ka la khia ding hi.

Jeremiah 6:12

A innte uh midang in luah ding a, a lote leh a zite uh a taan ding uh hi. Bang hang hiam cih leh Topa in kong cih-inah, hih mite’ lang khatah ka khut zan-in daan ka tat ding hi.

Jeremiah 32:4

Judah kumpipa Zedekiah zong Khaldea mite’ khut sung pan a suakta kei ding a, Babilon kumpipa’ khut sungah a kipia taktak ding hi. Amah tawh maitang kimu-in a ki-en ding uh a, a kiho ding uh hi.

Jeremiah 37:8

Tua ciangin Khaldea mite hong kileh kikin hih khuapi hong sim ding uh a, khuapi la-in mei tawh a hal ding uh hi.

Jeremiah 38:24

Tua ciangin Zedekiah in Jeremiah’ kiangah, “Hih thute kuamah thei sak kei in. Tua hi leh na si kei ding hi.

Jeremiah 39:5

Ahih hangin Khaldea galkapte in a nung delh uh a, Jerikho leizangah Zedekiah a pha uh hi. A mat khit uh ciangin Hamath gam Riblah khua-ah, Babilon kumpipa Nebukhadnezzar’ kiangah a paipih uh a, amah in thukhenna a pia hi.

Ezekiel 17:15

Ahi zongin Judah Kumpipa in amah lehdo veve a, sakol galkapte leh galkap honpite a ngen dingin Izipt gamah mi paisim sak hi. A deihna bangin tangtung ding ahi hiam? Tua banga a gamtatna tawh suakta zo ding ahi hiam? A thuciamna palsat napi-in daan thuak loin om thei ding ahi hiam?

Gamlak-vakna 4:18

“Levi mite lakah Kohath minamte a siat loh nadingin hih in;

Jeremiah 21:10

Bang hang hiam cih leh Topa in kong cih-inah, hih khuapi’ hoih nading hi lo siat nadingin ka lungsim ka khensat khin zo hi. Babilon kumpipa’ khut sungah ka pia ding a, amah in mei tawh a hal ding hi,’ na ci ding hi.

Jeremiah 34:3

Ama’ khut sung panin na suakta kei ding a, hong kimanin ama’ khut sungah nang hong kipia taktak ding hi. Nangmah in Babilon kumpipa tawh maitang kimu-in na kiho ding uh a, Babilon khua-ah na pai ding hi.