Jeremiah 34:22 - Tedim Bible

²² En un, Topa in kong cih-inah, keimah in thu ka pia ding a, hih khuapi-ah kong la kik ding hi. Amau in hih khuapi hong simin, hong la-in, mei tawh hong halsak ding uh hi. Judah gam khuapite kuama’ teen’ lohna mun awng ka suaksak ding hi,” a ci hi.

Tedim Bible Revision 2017

²² En un, Topa in kong cih in ah, keimah in thu ka pia dinga, hih khuapi ah hong paikik ding uh hi. Amaute in hih khuapi hong simin, hong la-in mei tawh hong halsak ding uh hi. Judah gam khuapite kuamaʼ ten lohna mun awng ka suaksak ding hi,” a hong ci hi.

Jeremiah 34:22 Referans Kwoze

Jeremiah 9:11

Jerusalem khua ninkholna ka bangsak ding a, se-alte’ teen’na ka suak sak ding hi. Judah khuapite gamlak ka suak sak ding a, kuamah a teeng nawn kei ding hi,” a ci hi.

Jeremiah 39:8

Khadea mite in kumpipa’ inn leh midangte’ innte a hal uh a, Jerusalem khua kulhpi a susia uh hi.

Jeremiah 52:13

Amah in Topa’ biakinnpi akipan kumpipa’ inn leh Jerusalem khua-a inn lian khempeuh a hal hi.

Jeremiah 52:7

Tua ciangin khua kulhpi kiphutlet a, khuapi kimkotah Khaldea mite om napi-in, galkapte in zan laitak-in kumpipa’ huan gei-a kulh tegel kikal-a kongpi tawnin a taikhia sim uh a, Arabah leizang lam a manawh uh hi.

Jeremiah 44:22

Topa in na hoihlohnate uh leh na bawl uh kihhuainate hangin no hong thuak zo nawn lo hi. Tua ahih manin tuni mahmah-in zong na gam uh gamlak suak khin a, mite’ kihaamsiatna suakin kuamah teeng nawn lo hi.

Jeremiah 33:10

“Topa in kong cih-inah, note in, ‘Hih munah mihing, ganhing om loin mun dai suak hi,’ ci-in na gen uh mah bangin Judah gam khuapite leh Jerusalem khua kongzingte awng a, mihing ganhing kuamah a teeng kei hi.

Mattiu 22:7

Kumpipa in a zak ciangin, heh mahmah a, a galkapte kuan sakin tua mi thatte khempeuh thatin a khua uh mei-in a halsak hi.

Zekhariah 7:14

Tua ahih manin Topa in “Huihpi’ mut khiat bangin amaute thehthang gawpin, a theih ngei lohna uh gam dangah amaute teeng ding uh hi. Amau’ nusiat leitang hoih in zong gamkhing suak ding a, a sungah kuamah om nawn loin daicip ding hi,” a ci hi.

Zekhariah 1:12

Tua ciangin Topa’ vantungmi in, “Vanglianpen Topa aw, Jerusalem khuapi leh Judah gam khuapite tungah kum sawmsagih sung na heh khin ta hi. Amaute hehpih loin bang tan vei om lai ding na hi hiam?” ci hi.

Micah 7:13

Ahi zongin a tunga teeng mite’ gitlohna hangin, leitung in sehnel gamkhing suak ding hi.

Amos 3:6

Khuapi sungah pataukohna gal peengkul a kitum ciangin, mite lau loin om mawk thei ahi hiam? Topa’ tun’ sak lohpi-in khuapi sungah, lauhuaina mawk tun’ ahi hiam?

Kah la 1:1

Khat vei lai-a mi a dim taka a teen’na Jerusalem khuapi in bang zah ta-a gamdai ahi hiam? Leitung bup in a zahtak khuapi tu-in meigong tawh a kibang hi. Leitung khuapi khempeuhte’ lak panin a thupipen tu-in sal-in a kiman khin zo hi.

Jeremiah 38:23

Na zite leh na tate khempeuh Khaldea mite kiangah kipaipih ding a, nangmahmah zong amaute’ khut sung panin na suakta kei ding hi. Babilon kumpipa in hong man ding a, hih khuapi mei tawh a kangtum ding hi,” a ci hi.

Jeremiah 32:29

Hih khuapi a sim Khaldea mite hong pai-in khuapi mei tawh a hal ding uh a, ka heh nading-a inn khum tunga Baal milimte paknamtui halna tawh a biakna innte uh leh pasian dangte’ kianga tuidawn biakna a piakna uh innte zong a haltum ding uh hi.

Jeremiah 4:7

Humpi khat a bukna sawl kawm lak pan hong kuankhia zo a, gamte susia dingpa hong paikhia khin zo hi. Na gam uh a kisia sak ding leh na khuapite uhah kuamah a teen’ loh nadingin a susia dingin ama’ omna panin hong kuankhia khin zo hi.

Isaiah 64:10

Nangma khuapi siangthote gamlak suak a, Zion zong gamlak suak a, Jerusalem khua gamkhing a suak hi.

Isaiah 37:26

‘Sawt pek-a kipan ka sehsa hi a, ka geelsa ahih lamtak za lo na hi hiam? Nang in khuapi muanhuaite siasakin suang kiciang bang na suahsak nading, a sunga teeng mite a thahatna uh bei-in, lungkia-in a om mawk nading leh amaute pen, lo lai-a kungnote leh lopa ngeekte, innkhum zang a, a po, a khan’khit ma-a a keutum lopate tawh a kibat nading, tu huna ka tun’sak thute pen tang lai pek pan-a ka ngaihsutna ahi hi.

Isaiah 24:12

Khuapi sungah gamkhin’na bek om a, kongpite kisat khamin kisia hi.

Isaiah 13:3

Keimah mah in ka tuamkoihsa mite thu pia khinin, ka hehna thu a sem khia dingin, ka gualzawhna ah a lungdam ka mi thahatte ka sam khin hi.

Isaiah 6:11

Tua ciangin keimah in “Topa aw, bang tanvei sawt ding ahi hiam?” ka ci hi. Amah in, khuapite-ah a teeng kuamah om loin hawm suakin, innte ah kuamah om loin kinusia a, leitang pen gamkhing suak kiuhkeuhin,

2 KHANG TANGTHU NIHNATE 36:17

Tua ahih ciangin amah in Khaldea mite’ kumpipa amaute’ lang khatah paipih a, amah in amau’ biakna inn sungah namsau tawh a tangvalte uh that a, tangval ahi a, nungak ahi a, a teek ahi a, a ham ahi zongin khasiat lo hi; amah in a vekpi-in ama khut sungah pia hi.

2 SAMUEL NIHNA 16:11

Tua ciangin David in Abishai leh a nasemte khempeuh kiangah, “En un, keima tapa mahmah in kei thah dingin hong zong hi; hih Benjamin mi in bangzahin tu-in hong zong zaw ding hiam! Ama thu-in omsak un, amah samsia sak un; bang hang hiam cih leh Topa in amah sawl hi.

2 KUMPI NIHNATE 25:6

Tua ciangin amaute in kumpipa man uh a, ama tungah thukhenna a pia, Riblah a, Babilon kumpipa kiangah amah paipih uh hi.

Jeremiah 34:2

“Topa Israel mite’ Pasian in kong cih inah: Judah kumpipa Zedekiah kiangah pai in la, hih bangin va gen in; ‘Topa in hong gen-inah, En in, keimah in hih khuapi Babilon kumpipa’ khut sungah ka pia ding a, amah in mei tawh a hal ding hi.

Jeremiah 50:13

Topa’ hehna hangin kuamah teeng lo ding a, gamlakpi a suak ding hi. Babilon khua a kantan khempeuh in lamdang sa-in khuapi siatna hangin zahko-in a phit san ding uh hi.

Ezekiel 13:22

Keima gen hilo pi-in, na thu zuau gen teng uh tawh mi hoihte na lunggimsak uh a, mi gilote a nuntak theih nadingun hong kihei loh nadingin na lehhanthot zawsop uh hi.

2 KUMPI NIHNATE 25:9

Amah in Topa’ inn, kumpipa’ inn leh Jerusalem khua sung inn khempeuh hal hi; inn lian khempeuh amah in haltum hi.

Jeremiah 2:15

Humpite bangin a galte in amah hawk uh a, nakpi takin a hawkgawp uh hi. A gam uh gam simtham a suah uh a, a khuapite cim-in kuamah teeng lo hi.