Jeremiah 34:14 - Tedim Bible

¹⁴ note kianga nasem dinga hong kizuak na Hebru mipihte uh in no adingin kum guk na hong sep sak khit a kum sagihna sungin na khah khia ding uh a, na na uh na sem sak nawn kei ding uh hi, ka ci hi. Ahih hangin na pute na pate un ka thu hong ngai lo uh a, hong mang lo uh hi.

Tedim Bible Revision 2017

¹⁴ note kiangah nasem dinga hong kizuak na Hebru mipihte uh in note adingin kum guk, na hong sepsak khit a kum sagihna sungin na khah khia ding uh a, na na uh na semsak nawn kei ding uh hi, ka ci hi. Ahih hangin na pu na pate un ka thu hong ngai lo uh a, hong mang lo uh hi.

Jeremiah 34:14 Referans Kwoze

Thu-hilhkikna 15:12

“Na sanggampa, Hebru pasal khat ahi a, Hebru numei khat ahi zongin nang tungah hong kizuak leh, amah in nangma’ na kum guk sung hong sem ding a, a kum sagih ciangin nang kiang panin suakta-in amah na paikhia sak ding hi.

1 KUMPI MASATE 9:22

Ahih hangin Solomon in Israel mite sila-in bawl lo hi; amaute in galkapte, ama nuai-ah a uliante, ama nuai-ah a ukte, a galkapmangte, a leeng ukte leh a sakol tuangte ahi uh hi.

ROM (Romans) 7:24

Lunggim mi ka hi takpi hi! Hih a si ding pumpi panin kua in hong honkhia ding hiam?

Amos 8:6

Khedap bu khat man dingin, mizawngte sila-in i zuak nuam a, i mangbuh hoih lote, sum tampi i khawng nuam hi,” na ci uh hi.

Amos 2:6

Topa in hih bangin ci hi: Israelte a khialh kikkik nilohna hangun, pel loin amaute daan ka tat ding hi. Bang hang hiam cih leh amaute in, leiba a loh zawh loh man bekin midik kim lai zuak uh a, khedap bu khat man a loh zawh loh man bekin mi cimawhte sila-in zuak uh hi.

Ezekiel 20:8

Ahi zongin amaute in kei hong demin, ka thugen hong ngai lo uh hi. A muhdahhuai a milimte uh paikhia tuan lo uh a, Izipt pasiante zong nusia lo uh hi. Tua hi a, ka heh mahmahna teng Izipt gam sungah thuaksak gawp ning ci-in ka ngaihsun hi.–

Ezekiel 20:4

“Ezekiel aw, amaute tungah thukhen dingin na kiging nai hiam? Na kigin’ khit leh amaute tungah thu khen in. A pu a pate uh’ gamtat hoih lohna teng amaute phawksak in.

Jeremiah 32:30

Bang hang hiam cih leh Israel mite leh Judah mite in a neu lai pek uh a, kipan ka muhna-ah siatna bekbek a bawl uh a, keimah Topa in kong cih-inah, Israel mite in a khut uh tawh milim a bawlna uh hangin kei hong heh sak uh hi.

Isaiah 58:6

“Kei’ deih antan’na pen hih bang ahi hi! Gitlohna khaute phelin, hakkol savun khaute phel a, a kinengniam mite khahkhia-in, hakkol khempeuh suktan ding ahi hi.

Isaiah 50:1

Topa in: “Amah ka ciahsakna, na nu a kimakna lai koi-ah om ahi hiam? Tua ahih kei leh, nang kong zuakna ka lei batnate koi pen ahi hiam? En un, nomau’ mawhna hangin note hong kizuak a, nomau’ khialhna hangin na nu uh kipaikhiasak hi.

Nehemiah 9:30

Kum tampi sung lungduaina tawh amaute na thuak a, na kamsangte tung tawnin na Kha Siangtho tawh amaute na hilhkhol hi; ahi zongin amaute in ngai nuam lo uh hi. Tua ahih ciangin gamdang mite khut sungah amaute na pia hi.

2 KHANG TANGTHU NIHNATE 36:16

ahih hangin a mite tungah Topa’ hehna a suah ciang dong, a hehna a kidamsak zawh nawn loh ciang dongin amaute in Pasian’ kamtaite zahpihin, a thute simmawhin, a kamsangte thusim lo niloh uh hi.

2 KHANG TANGTHU NIHNATE 28:10

Tu-in note in Judah mi leh Jerusalem mi, numei leh pasalte, na sal dingun nuaisiah na sawm uh hi. Topa na Pasian uh tungah nomau mahmah in khialhna nei hilo na hi uh hiam?

1 KUMPI MASATE 21:25

Ama zi Jezebel in a hanthot Ahab bangin Topa’ muhna ah a sia gamta dingin amahmah a kipia tawm mi kuamah om lo hi.

Jeremiah 35:15

Ka nasem ahi kamsangte khempeuh note kiangah hong sawl tawntungin, ‘Tu-in note khempeuh na hoih lohna-uh panin kihei un la, na gamtat hoihlote uh kipuah pha un. pasian dangte nung delh loin, ama’ na na sep kei uh leh note leh na pute na pate’ kianga kong piak gam sungah na teeng ding uh hi,’ ci-in hong gen uh hi. Ahih hangin note in na bil uh nong ngat kei uh a, ka thu nong ngai kei uh hi.

Siampi Laibu 25:10

Note in a kum sawmngana siangtho sakin, gam sunga a teeng mi khempeuhte tungah suahtakna na genthang ding uh hi; note in nomau neihsa ciatah pai kikin note in nomau innkuanpihte ciat kiangah na ciahkik uh ciangin note adingin jubili hi ding hi.

Thu-hilhkikna 15:1

“Kum sagih a cin’ simin maisakna na pia ding uh hi.

Thu-hilhkikna 15:9

Na lungsim ah ngaihsutna hoih lo hong omin, ‘Kum sagihna, maisakna kum hong nai hi,’ ci-in na sanggampa gal mi etin amah bangmah na piak loh ciangin na lang khatah Topa tungah amah kiko-in, nang tungah khialhna a suah khak ding kingaihsun in.

Jeremiah 11:7

Bang hang hiam cih leh na pute na pate uh tungah Izipt gam pana ka lakkhiat pan-a kipan tuni ciang dong ka thu hong mang un, ci-in tam veipi, nakpi takin ka hilh ngitnget hi.