Jeremiah 32:23 - Tedim Bible

²³ Amau zong hong lut-in a luah pah uh hi. Ahih hangin amaute in na thu hong mang loin, thukham hong zui lo uh a, hih ding a, na thupiakte khat beek a hih kei uh hi. Tua ahih manin amau’ tungah hih siatna khempeuh na tungsak hi.

Tedim Bible Revision 2017

²³ Amau zong lutin a luah pah uh hi. Ahih hangin amaute in na thu hong mang loin, thukham hong zui lo uh a, hih dinga na thupiakte khat beek a hih kei uh hi. Tua ahih manin amaute tungah hih siatna khempeuh na tungsak hi.

Jeremiah 32:23 Referans Kwoze

Ezra 9:7

Ka pu ka pate uh huna kipanin tu hun dong mawhna lianpi ka nei uh hi. Tua thu hangin ka kumpite uh leh ka siampite un gamdang kumpite khut sungah sihna, salsuahna, neihsa kisuhna, leh maizumna thuak uh a, tu hunin zong tua bangmah ka thuak uh hi.

Kah la 1:18

Topa in a thutang ahi hi. Bang hang hiam cih leh keimah in ama thu a mang lo ka hi hi. Mun khempeuh-a a om mite aw ka thu genna hong ngai un. Ka thuaknate hong mu dih un. Ka khangno numei pasalte sal-in a kipua khia hi.

Jeim 2:10

Bang hang hiam na cih uh leh, Thukham khempeuh a zuih hangin khatpeuh peuh a khial mi in, Thukham khempeuh a khial zo hi.

Galati 3:10

Thukham tawh kipawl gamtatna a suang mi khempeuh in hamsiatna nuai-a om mi ahi uh hi. Bang hang hiam na cih uh leh, “Thukham laibu sungah a kigelh thu khempeuh a zui tawntung lo mi khempeuh in hamsiatna a thuak uh hi,” ci-in Lai Siangtho sungah a kigelh hi.

Johan 15:14

Note in ka thupiakna bangin na hih uh leh, ka lawmte na hi ding uh hi.

Luka 17:10

Tuamah bangin note in zong thu khempeuh hong piak bang na hih khit uh ciangin, ‘Kote in a pha bawl lo nasemte ka hi uh hi. Nasemte ka hih uh ciangin a kituak bek ka hih zo uh hi,’ na ci ding uh hi,” ci-in a gen hi.

Ezekiel 20:21

“Ahi zongin a tate nangawn un kei hong dem uh hi. A zuite in nuntakna a ngah nading ahi ka thukhamte palsatin, ka thupiaknate mang lo uh a, sabbathte siasak uh hi. Tua ahih manin, ka hehna teng gamlakah thuaksak gawpin, amaute a sumai dingin ka kithawi hi.

Ezekiel 20:18

A tate uh kiangah, ‘Na pu na pate uh in a bawl thukhamte zui kei un la, amaute’ tat ngeinate zui kei un. A milim biaknate uh tawh zong kininsak kei un.

Ezekiel 20:8

Ahi zongin amaute in kei hong demin, ka thugen hong ngai lo uh hi. A muhdahhuai a milimte uh paikhia tuan lo uh a, Izipt pasiante zong nusia lo uh hi. Tua hi a, ka heh mahmahna teng Izipt gam sungah thuaksak gawp ning ci-in ka ngaihsun hi.–

Kah la 1:8

A minthan’na teng a bei hi, a guaktang in om ahih manin a maizum hi. Thuum in tau a, a zum manin a mai a hum hi. Jerusalem in mawhna lian bawl ahih manin a kihhuai mahmah hi.

Nehemiah 9:15

A gilkialna uh a vahsak dingin vantung panin an na pia a, a dangtakna uh a phasak dingin suangpi panin tui na phulsak a, amaute tungah piak dingin na kiciamsa gamah lutin a luah nadingun amaute na sawl hi.

Late 78:10

Amaute in Pasian’ thuciamna zui lo uh a, ama thukham bangin gamta nuam lo uh hi.

Jeremiah 2:7

Singgah leh a hoih nate na nek theih nadingun an tamna munah kong tun’pih hi. Ahih hangin no nong pai uh ciangin ka gam na nin sak uh a, ka neihsa gam a kihhuai mun na suak sak tazen uh hi.

Jeremiah 26:4

Nangmah in amaute’ kiangah, ‘Topa in hih bangin ci hi: Note in ka thu hong ngai loin, note’ mai-a kong lah sa ka thukham bangin na gamtat kei uh a,

Jeremiah 44:10

Amaute in tuni ciang dong kiniamkhiat lo uh a, hong zaktak loin, note leh na pute na pate kianga kong piak ka thukhamte leh ka ngeinate na zui kei uh hi.

Joshua 21:43

Tua bangin Topa in amau’ pate tungah piak dingin a kiciam leitang khempeuh Israel tungah pia hi; amaute in a ngah khit uh ciangin tua lai-ah teeng uh hi.

Jeremiah 7:26

ahih hangin amau in ka thu hong ngai loin, a bil uh hong ngat lo uh a, a lung uh a khauhsak uh hi. A pute a pate uh sangin a siazaw uh hi.