Jeremiah 30:6 - Tedim Bible

⁶ Tu-in ngaihsun dih un. Pasalte nau a suak ngei uh hiam? Tua ahih leh bang hangin pasal khempeuh in numei nausuak dingte bangin, a taai uh hum ahi hiam? Bang hangin a mai uhah si teeng lo ahi hiam?

Tedim Bible Revision 2017

⁶ Tu-in ngaihsun dih un. Pasalte nau a suak ngei uh hiam? Tua ahihleh bang hangin pasal khempeuh in numei nausuak dingte bangin a tai uh hum ahi uh hiam? Bang hangin a mai uh ah si teeng lo ahi hiam?

Jeremiah 30:6 Referans Kwoze

Nahum 2:10

Nineveh khuapi kisusia-in kinusiacip a, gamkhing suak hi. Launa lungsim tawh kidimin khukte liing kelkel a, mi khempeuh lunggimin a mai-ah si teeng lo hi.

Joel 2:6

Amaute hong nai ciangin mi khempeuh lau uh a, a maitangah si teeng kuamah om nawn lo hi.

Jeremiah 4:31

Nau suak ding numei kiko bang khat ka za hi, tacil a suak numei khat’ tauna tawh kibang hi. Zion’ tanu husam liang-a a kikona aw hi a, a khut tegel zakin, “Gimna ka thuak ding hi! Kei hong that ding uh hi!” a ci hi.

Isaiah 21:3

Tua ahih ciangin ka pumpi na hi; nausuak numei in na a sak bangin na ka sa hi; khuaza thei lo zah dongin a kuncip-in ka om a, ka muh nate hangin lamdang sa in ka om hi. khua mu thei lo zah dongin lungkia-in ka om hi.

1 THESALONIKA MASA 5:3

Amaute in, “Nopsakna a om hi, launa om lo hi,” ci-in a gen lai takun, ta gai numei tungah ta suah hun gimna a tun’ bangin amaute tungah kisiatna gal in thakhatin tung ding a, suahtakna neukha beek a ngah kei ding uh hi.

Hosea 13:13

Israel mite, naungeek bangin a suah khiat hun tung khin napi-in, a hai luat manin suak khia loin a nu sung mahah omom lai hi.

Jeremiah 22:23

Lebanon gam pan-a kila taamtaak inn sungah nuam takin na teeng uh hi. Ahih hangin gimna hong tun’ ciangin bang zah takin na tau ding uh hiam? Numei nausuak dingte na bang ding uh hi.

Jeremiah 6:24

Tua thu i za khin zo a, bangmah i cih thei kei hi. Lungkhamna in hong hencip a, nupi nau suak ding bangin na i sa hi.

Late 48:6

numei nausuak na a sa bangin amaute liinggawp uh hi.

Daniel 5:6

Tua ciangin kumpipa lau lua mahmah a, a mai daang gawpin a khut a liing kauhkauh hi.

Jeremiah 50:43

“Babilon kumpipa in tua thu a za khin zo a, bangmah a cih thei kei hi. Lungkhamin lumcip a, nupi nausuak ding bangin na a sa hi.

Jeremiah 49:24

Damaska khua mite thazaw uh a, taimang dingin a kithawi uh hi. Lungkhamna, dahna leh launa in amau lencip a, nupi nausuak ding bangin a om uh hi.

Isaiah 29:22

Tua ahih ciangin Abraham a honkhia Topa in Jakob innkuan tawh kisai thu a gen-inah: “Jakob maizum nawn lo ding a, a mai khing nawn lo ding hi.

Jeremiah 13:21

Nangma’ lawm ding a, na bawl mite teekteek in nang hong uk ni ciangin bang na ci ding hiam? Numei nau suakte in na a sak uh bangin nang zong na na sa ding hi.

Jeremiah 48:41

Khuapite kila-in kulhpite zong kila ding hi. Tua ni ciangin Moab galkapte in nupi nausuak dingte bangin a lau ding uh hi.

Jeremiah 49:22

En un, galte in muvanlai bangin manlang takin hong leengin Bozrah khua tungah a sim dingin a kha hong zal ding uh hi. Tua ni ciangin Edom galkapte in nupi nausuak dingte bangin a lau ding uh hi,” a ci hi.