Jeremiah 30:14 - Tedim Bible

¹⁴ Na lawm ngaihte un hong mangngilh khin uh a, hong don nawn lo uh hi. Bang hang hiam cih leh na khialhnate uh lian lua-in, na mawhnate uh nasia lua ahih manin, galte bangin note kong bawl-a, nasia takin daan kong thuaksak hi.

Tedim Bible Revision 2017

¹⁴ Na lawm ngaihte un hong mangngilh khin uh a, hong don nawn lo uh hi. Bang hang hiam cih leh na khialhnate uh lian lua-in, na mawhnate uh nasia lua ahih manin, galte bangin note kong bawl a, nasia takin gim kong thuaksak hi.

Jeremiah 30:14 Referans Kwoze

Kah la 1:2

Amah zan khuavakin kap a, a khitui a biang tungah a tak kauhkauh hi. Amah a it ngeite khempeuh a hehnem ding khat beek a om nawn kei hi. A kipawl pihte khempeuh in kheemin, tu in a langpan’ khin ta uh hi.

Jeremiah 5:6

Tua ahih manin tuulak panin humpi khat in amaute that ding a, sehnel gam panin keivom khat in a petgawp ding hi. Kamkei khat in a khuapite uh vil gige a, a pusuak khia peuhpeuh balzan gawp ding hi; bang hang hiam cih leh amaute’ mawhna uh tamlua a, kei hong taisan mun lua uh hi.

JOB (Job) 30:21

Kei tungah nong gilo mahmah a, nong hih theih zahin kei nong bawlsia hi.

Jeremiah 22:20

Jerusalem khua mite aw, Lebanon Mual tungah kahto un la, awng un; Bashan gamah va kiko un. Abarim mual tungah va kiko un, bang hang hiam cih leh na pawlte un gal a lel khin uh hi.

Jeremiah 30:15

Bang hangin na sa-in kapkap na hi uh hiam? Na natna uh a dam thei ding hi lo hi. Na khialhnate uh lian lua-in, na mawhnate uh nasia lua ahih manin hih bangin note kong thuak sak hi.

Jeremiah 22:22

Na makaite uh huih in hong mut mangsak ding a, na pawlte uh sal-in kiman ding uh hi; tua ciangin na gitlohna uh hangin maizum-in na lunggam ding uh hi.

Jeremiah 4:30

A kisia ding nangmah in bang cih ding na hi hiam? Puan san silh-a kham tawh na kizep liatluat hangin, na mitte zemin na golsak hangin, a mawkna-a kizem na hi ta hi. Na lawm ngaihte in nang hong paaikhia uh a, hong that nuam uh hi.

Jeremiah 2:36

Bang hangin na lungsim khel ziauziau na hi hiam? Assiriate in nang hong maizumsak ngei bangin Iziptte in zong hong maizum sak ding uh hi.

JOB (Job) 19:11

Kei’ tungah Pasian’ hehna sogawp a, ama gal lian penin kei hong ngaihsun hi.

Hosea 5:14

Humpinelkai’ sukgawp bangin Israel leh Judah ka sugawp ding hi. Keimah teekteek in amaute balgawpin ka paisan ding hi. Amaute ka tal kaih gawp ding a, kuamah in hon zo lo ding hi.

Hosea 2:5

A nu uh a paktat hi a, tua ahih manin amaute, tua a paai numei in zumna mel thei loin a gamta ahi hi. Amah in, “Ka it pasal dangte kiangah ka pai ding hi; amaute in an leh tui, samul puan leh saihadial puan, leh oliv thau leh zu hong pia uh hi,” a ci zaw lai hi.

Ezekiel 23:22

“Oholibah aw, Topa Pasian ahi keima hong gen thu in: Tu-in nang in hih na lunggulh mite na cimtak ta hi. Ahi zongin nangma tungah amaute ka hehsak ding a, nang a hong umcih dingin ka hong paipih ding hi.

Ezekiel 23:9

Tua ahih ciangin a lunggulh mahmah, a it Assiria mite khut sungah amah ka pia hi.

Kah la 1:19

Ka kipawl pihte ka sapsap hangin a hong huh nuam kei uh hi. A nuntak nading uh an a zon’na lamun siampite leh makaite kongzing lakah a si uh hi.

Jeremiah 38:22

En in, Judah kumpipa’ inn sunga a kinusia numei khempeuh Babilon kumpipa’ uliante kiangah kipaipih uh a, tua numeite in Zedekiah’ kiangah, ‘Na lawm muan’te in hong khem uh a, nang hong zo ta uh hi; na khe buan sungah tum ahih manin, hong nungngat ta uh hi,’ ci-in a gen uh hi.

Jeremiah 6:23

Thal leh teipi tawi uh a, giloin hehpihna lungsim nei loin, a husa uh tuipi ging tawh kibang hi. Zion’ tanu aw, amaute sakol tungah tuangin, nangmah do dingin a kithawi uh hi!” a ci hi.

JOB (Job) 16:9

Pasian in a hehna tawh hong balnen ngiingei a, a ha hong gawi sanin hong heh et hi.

Late 107:17

Pawlkhatte, amaute’ khialhna hangin, gimna thuak uh a, amau lehdona hangin hailawh uh hi.

Isaiah 57:13

Nang cimawh-in na kiko ciangin na milim kaihkhopte kihonsak in! Huih in amaute mutkhia-in, husan’na in amaute seem khia ding hi. Ahih hangin kei hong beel mi in leitang ngah ding a, ka mual siangtho luah ding hi.

Jeremiah 14:17

“Jeremiah aw, amaute’ kiangah hih bangin va ci in: ‘Sun-le-zanin ka khitui luangluang hen la, kang ngei kei ta hen; bang hang hiam cih leh ka mite in nakpi-in liamna a thuak uh a, nakpi takin a kisat hi.

Jeremiah 32:30

Bang hang hiam cih leh Israel mite leh Judah mite in a neu lai pek uh a, kipan ka muhna-ah siatna bekbek a bawl uh a, keimah Topa in kong cih-inah, Israel mite in a khut uh tawh milim a bawlna uh hangin kei hong heh sak uh hi.

Jeremiah 44:22

Topa in na hoihlohnate uh leh na bawl uh kihhuainate hangin no hong thuak zo nawn lo hi. Tua ahih manin tuni mahmah-in zong na gam uh gamlak suak khin a, mite’ kihaamsiatna suakin kuamah teeng nawn lo hi.

Jeremiah 50:42

A thal uh leh a teipi uh tawi uh a, giloin hehpihna lungsim nei lo uh hi. A husa uh tuipi ging bang hi a, sakol tungah tuangin Babilon mite aw, nangmah do dingin a kithawi uh hi!

Obadiah 1:7

Na pawl teng in hong khem zo uh a, gamgi ciang dong a hong hawlkhia zo uh hi; na pawlte teng in a hong zo khin ta hi. Na ankuang umpihte in na nuai-ah thang siah khin uh a, “A pilna koi-ah a om hiam?” a hong ci uh hi.

Jeremiah 5:5

Mi liante’a kiangah pai-in, ka va kiho ding uh hi; amaute in Topa’ lampi a thei uh a, amau’ Pasian’ deihna a thei uh hi,” ci-in ka ngaihsun hi. Ahih hangin a vekpi-in ka ukna hong nial khin uh a, ka hakkol kuaitan-in ka henna khaute a sutat khin zo uh hi.

Jeremiah 32:29

Hih khuapi a sim Khaldea mite hong pai-in khuapi mei tawh a hal ding uh a, ka heh nading-a inn khum tunga Baal milimte paknamtui halna tawh a biakna innte uh leh pasian dangte’ kianga tuidawn biakna a piakna uh innte zong a haltum ding uh hi.

Jeremiah 32:34

Amaute in ka min tawh a kilo biakinn sung nangawn ah a kihhuai milimte a koih uh a, a ninsak uh hi.

Jeremiah 32:35

En-Hinnom Mualkuam-ah a tapate leh a tanute uh meihal biakna tawh Molek pasian a biak nadingun Baal biakna tau sangte a bawl uh hi. Hih a kihhuai na semin, Judah mite mawhna a bawl sak nadingun amaute ka sawl kei a, zong ka ngaihsun kha ngei beek kei hi.

Kah la 2:1

Topa in a heh manin khuamial tawh Jerusalem a tuamcip hi. A vantung minthan’na teng uh kisiatna a suaksak hi. Amah in a heh ni-in a Biakinnpi nangawn a susia hi.

Daniel 9:5

Kote ka hih uh leh ka gi kei uh a, ka mawh khin uh a, ka khial khin uh hi. Na hong sawlna bang ka mang kei uh a, na thupiakna leh na thukhamte ka taisan khin uh hi.

Daniel 9:11

Israelte khempeuh in na gensa thute leh na thukhamte khempeuh a palsat khin zo uh hi. Na tungah khialhna ka hong bawl manun, na nasem Moses thukham sunga kigelh bangin kote tungah samsiatna leh thukhenna a hong tung hi.

Daniel 9:13

Moses’ thukham sunga kigen daan khempeuh ka thuak uh hi. Topa Pasian aw, tu nangawnin zong nangma maipha hong zong loin, na thuman ka zuih theih nangun mawhna ka kisik kei uh hi.