Jeremiah 29:11 - Tedim Bible

¹¹ Bang hang hiam na cih uh leh Topa in kong cih-inah, note’ mai lamah lametna kong piak ding, na siat nading uh hi loin na phattuam nading uh geelna ka neihte kei bek in ka thei hi.

Tedim Bible Revision 2017

¹¹ Bang hang hiam cih leh Topa in kong cih in ah, mai lamah lametna kong piak ding, note siat nading hi loin na nopsak nading uh geelna ka neihte kei bek in ka thei hi.

Jeremiah 29:11 Referans Kwoze

Late 33:11

Topa’ thu ngaihsutna kip ngitnget a, a lungsim ngaihsutna khang tawntungin kip hi.

Micah 4:12

Ahi zongin hih minamte in Topa’ lungsim tawng thei lo uh a, ancilna phualah anphalte kaihkhop bangin, kaikhawmin a cil gawp ding ahih lam phawk lo uh hi.

Late 40:5

Topa ka Pasian aw, na sepna lamdangte leh ko’ adinga na ngaihsutnate tampi na phasak a, kuamah tawh teh theih na hi kei hi! Tuate pulakin gen ding hi leng, sim zawh ding hi lo hi.

JOB (Job) 23:13

Amah in a lungsim kheel mi hi lo a, kuamah in amah nial zo lo hi. Ama hihnopte kuamah in khaktan zo lo hi.

Kah la 3:26

Tua ahih ciangin thuakzawhna tawh ngak kenkan zo leng hoih pen hi, a hong hotkhiat nadingin Amah ngak ni.

Hosea 3:5

Tua khit ciangin Israel mite in Topa amau’ Pasian leh a kumpipa uh David lamah hong kihei kik ding uh hi. Tua hun ciangin amaute in Topa zahtakin, ama letsongte sang ding uh hi.

Zekhariah 1:6

Ahi zongin ka nasem ahi kamsangte’ tung tawnin ka hilhkholhna leh ka thupiaknate in note dongin hong su kha lo ding sa na hi uh hiam? Tua ahih ciangin a tawpna-ah amaute kisik uh a, hih dinga ka lungsimah ka geelsa bangin amau’ gamtatna tawh kizui-in daan ka piakna thu phawk uh hi,’ ci in,” a ci hi.

Jeremiah 23:5

“En un, Topa in kong cih-inah, keimah in David’ suan lak panin kumpi dingin a diktat Hiang khat ka khan’ khiatsak ni hong tung ding hi. Amah gam uk siam ding a, gam sungah thuman thutang tawh thu hong khen ding hi.

Jeremiah 23:6

Ama’ hun hong tun ciangin Judah mite a kihonkhia ding a, Israel mite lungmuang takin a teeng ding uh hi. Amah a kilawh nadingin a min, Topa IN EITE’ DIKTATNA AHI HI, ci-in a kiphuak ding hi.

Jeremiah 30:9

Topa, amau’ Pasian’ na ahi zongin, amaute’ kumpi-a ka koih ding David’ na ahi zongin a sem zaw ding uh hi.

Jeremiah 30:10

“Tua ahih manin Topa in kong cih-inah; Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte-uh’ saltan’na panin kong honkhia ding hi. Jakob’ suante hong ciahkik ding uh a, nuam takin a teeng kik ding uh hi. Kuamah in amaute a lausak nawn kei ding hi.

Ezekiel 11:16

Tua ahih ciangin na salpihte kiangah hih bangin keima thugente va gen sawn in: A gamlapi gamah a teeng dingin puak khia-in, gam dangah a thehthangpa in keimah ka hi hi. Ahi zongin amaute’ omna gam dangah tawl khat sung bek kei a hong bia dingin ka om sak ahi hi.

Zekhariah 13:9

Tua a suakta seh khatte pen, meikhukah ngun a kisian’sak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ hong ngetna ka pia ding hi. Keima mi ahihna uh, amaute tungah ka gen ding a, amaute in, kei pen, amau’ Pasian ka hihna thu, a kam uh tawh pulak ding uh hi,” a ci hi.

Late 85:9

I gam sungah minthan’na a om theih nadingin amah a zahtakte’ adingin ama hotkhiatna hong om takpi hi.

Isaiah 27:4

Leenggui lo tungah ka heh nawn kei hi. Lingte leh lingkungte om hi leh keimah kuan khia-in tuate ka haltum ding hi.

Jeremiah 24:5

Hih mun panin Khaldea mite’ gam a, ka puakkhiat Judah mi sal tangte hih theigah hoihte bangin a hoih-in ka ngaihsun ding hi.

Jeremiah 33:6

Ahih hangin en in, keimah in hih khuapi ka damsak ding a, cidamin ka om sak ding hi. A mite cidam sakin nopna leh lungmuan’na a kicing ka lak ding hi.