Jeremiah 24:10 - Tedim Bible

¹⁰ Namsau tawh kithahna, kialpi leh pulnatnate ka tungsak ding a, amaute leh a pu a pate’ kianga ka piaksa gam sungah khat beek ka nungta sak nawn kei ding hi.

Tedim Bible Revision 2017

¹⁰ Namsau tawh kithahna, kialpi le pulnatnate ka tungsak dinga, amaute le a pu a pateʼ kiangah ka piak sa gam sungah khat beek ka nungtasak nawn kei ding hi,” hong ci hi.

Jeremiah 24:10 Referans Kwoze

Isaiah 51:19

Nang tungah siatna leh maiman’na, kialpi leh namsau hih gentheihna thu nih hong tung zo hi—kua in nang hong dahpih ding ahi hiam? kua in nang hong hehnem ding ahi hiam?

Ezekiel 33:27

Amaute kiangah hih bangin gen in: Keimah in a nungta Topa Pasian ka hih mah bangin, khuapi siate sunga teeng mite gal-in si ding uh a, khuaneu-a teeng mite khempeuh gamsate in ne ding uh hi. Dum muanhuai sung leh leihawm sunga bute khempeuh pulnatna tawh si ding uh hi.

Ezekiel 7:15

Khua pua lamah gal kidona om a, khua sungah cinatna leh gilkialna om hi. Gamlak-a om mi khempeuh gal sungah si ding uh a, khua sunga om khempeuh cina leh gilkialin si ding uh hi.

Jeremiah 34:17

Tua ahih manin Topa in kong cih-inah “Mi khempeuh in na sanggam na mipihte uh khahkhia loin suahtakna pia lo-a ka thu hong mang lo na hih uh leh en un, Topa in kong cih-inah, note kong khahkhia-a, suahtakna kong pia ta hi. Namsau tawh kithahna, pulnatna leh kialpite tawh na sih nadingun note kong khah khia a, kong suaktasak hi. Leitung gam khempeuhte’ hong lipkhap dingin kong bawl ding hi.

Jeremiah 27:8

“‘Ahih hangin gam khat peuhpeuh ahih kei leh kumpi khat peuhpeuh in Babilon kumpipa Nebukhadnezzar’ na sem loin, Babilon kumpipa’ hakkol a ngawngah a puak kei leh, amah ka ukcip sak mateng tua gam, namsau tawh, kialpi tawh, pulnatna tawh ka daantat ding hi,’ Topa in kong ci hi.

Jeremiah 19:7

Hih munah Judah mite leh Jerusalem mite’ ngimna ka tangtung sak kei ding a, a galte’ namsau leh a that nuamte’ khutlum-in amaute ka sisak ding hi. Amau’ si luangte huih laka leng vasate leh lei lak a ganhingte’ an dingin ka pia ding hi.

Jeremiah 16:4

Natna lian tawh si ding uh a, kuamah in kah loin kuamah in lah a vui kei ding uh hi. Lei laka ek kitha bang ahi lel ding uh hi. Namsau kial tawh a si ding uh a, a siluangte uh huih laka leeng vasate leh lei laka ganhingte in a ne ding uh hi.

Jeremiah 15:2

Amaute in, “Koi-ah ding ka hi uh hiam?” ci-a hong dot uh leh hih bangin gen kik in: ‘Topa in, “Pulnatna tawh a si dingte a si ding uh a, namsau tawh a si dingte a si ding uh hi; kial tawh a puksi dingte a puk si ding uh a, sal-a kikai dingte zong a kikai ding uh hi,” a ci hi,’ va ci in.

Jeremiah 9:16

Amaute le a pute a pate’ theih ngei lohna gamdangah ka kithehthang sak ding a, a sih khit dong uh namsau ka nungdelh sak ding hi,” a ci hi.

Jeremiah 5:12

Amaute in Topa hong nial uh a, ‘Amah in bangmah hih lo ding hi; i tungah siatna hong tung lo ding a, gal ahi zongin kial ahi zongin i thuak kei ding hi.

Mangmuhna 6:8

Tua sakol tung tuang mi’ min in Sihna hi a, Hel gam in amah tawh a tonkhawm hi. Leitung seh li suah seh khat namsau tawh, kialpi tawh, pulnatna tawh, leitung gam sahangte tawh thah theihna thu amaute a pia hi.

Thu-hilhkikna 28:21

A luah dingin na lutna uh leitang panin note hong beisak matengin note lakah pulnatna a tun’ nadingin Topa in bawl ding hi.

Jeremiah 21:9

Hih khuapi sunga a om mi peuhmah namsau tawh ahi zongin, kial tawh a hi zongin, pulnatna tawh a hi zongin a si ding uh hi. Ahih hangin pusuak khia-a, note a hong do Khalde mite kianga a lut peuhmah a nungta ding uh a, a suakta liailiai ding uh hi.

Jeremiah 42:17

Izipt gamah pai-in a teeng khempeuh namsau tawh ahi zongin, kialpi tawh ahi zongin, pul natna tawh ahi zongin a si ding uh hi. Amaute’ tunga ka tun’sak ding gimna panin kuamah a suakta kei ding hi.

1 KUMPI MASATE 14:15

tui sunga pumpeng a kiliin’ mah bangin Topa in Israel vatin amau pute pate tungah a piak hih gam hoih panin Israel zung lot ding a, Eufrates gal khatah amaute thehthang ding hi; bang hang hiam cih leh amaute in Asherah milimte bawlin Topa a heh nadingin phin uh hi.

Jeremiah 9:15

Tua ahih manin a vanglian Topa, Israel mite’ Pasian in kong cih-inah: En in, hih mite gamsai-in ka vak ding a, gutui ka dawnsak ding hi.

Jeremiah 14:12

An a tan’ uh hangin amau’ thuumna ka ngai kei ding a, meihal biakna leh an tawh biaknate hong piak uh hangin ka sang kei ding hi. Amaute namsau tawh ahi zongin, kial tawh ahi zongin, pulnatna tawh ahi zongin ka sisak zaw ding hi,” hong ci hi.

Jeremiah 29:17

En un, amaute tungah namsau tawh kithahna, kialpi leh pulnatna ka tungsak ding a, amaute, a kine thei lo theigah muat ka bang sak ding hi.

Jeremiah 29:18

Amaute namsau, kialpi leh pulnatna tawh ka nung delh ding a, ka hawlkhiat nading mun khempeuh ah mite in kihaamsiatna-a a zat dingun simmawhna leh zahkonate ka thuaksak ding a, amaute’ thuakna hangin leitung gam khempeuh ka lausak ding hi.

Jeremiah 32:24

En in, khuapi lak nadingin kan a to khin zo uh hi. Namsau tawh kithahna hang, kialpi hang leh pulnatna hangin a sim Khaldea mite’ khut sungah khuapi a kipia ding hi. Na gensa bangin hong tun’ loh phamawh ahih manin en in, nangmah in na mu ta hi.

Jeremiah 32:25

Ahih hangin Topa Pasian aw, hih khuapi Khaldea mite’ khut sung tung ding hi napi, nangmah in, “A hong theihpih ding mi sam in la,tua lo lei in,” ci-in nong sawl teitei hi,’ ci-in thu ka ngen hi,” a ci hi.

Jeremiah 42:22

Tua ahih manin na teen’ nopna mun uhah namsau tawh thahna, gilkialna leh pulnatna tawh sihna na thuak ding uh hi, ci-in tu-in tel takpi-in thei ta un,” a ci hi.

Ezekiel 6:11

Tua ciangin Topa Pasian in, “Israel mite’ gitlohna leh a muhdahhuai a gamtatnate uh khempeuh hangin na khut singin lei tuan in la, a dahin kap in. Amaute gal sung leh kial leh natna hangin si ding uh hi.