Jeremiah 23:16 - Tedim Bible

¹⁶ A vanglian Topa in, “Note kiangah thu hong hilh a, a hong lamen khialsak kamsangte’ thu gennate ngai kei un. Amaute in a lungsim sung uh-a a geltawm uh hong gen uh ahi a, keima kiang pana hong pai thu ahi kei hi.

Tedim Bible Revision 2017

¹⁶ Vanglian Topa in, “Note kiangah thu hong hilh a, a hong lamen khialsak kamsangteʼ thugennate na ngai kei un. Amaute in a lungsim uh ah a geel tawm uh thu hong gen uh hi a, keima kiang pan a hong pai thu ahi kei hi.

Jeremiah 23:16 Referans Kwoze

Jeremiah 14:14

Tua ciangin Topa in, “Tua kamsangte in kei’ min suang-in zuauthu hong gen uh hi. Amaute ka sawl kei a, thu ka pia kei a, zong ka hopih kei hi. Note kianga hong gen uh thute a manlo mangmuhna, bangmah kimang lo aisanna leh amau leh amau’ lungsim kikhem tawmna thute ahi hi.

Ezekiel 13:6

Amaute’ maangmuhnate in zuaupi hi a, a thugen kholhnate uh zong thu zuau ahi hi. Keimah in amaute sawl lo napi-in, amaute in, ‘Topa in hih bangin gen hi,’ ci khem uh hi. Tua bang hi napi-in amaute’ thugente ka tun’sak ding a lamen lai uh hi.

Mattiu 7:15

“A sungah hangsan ngia hi napi-in tuuvun silh a, no kiangah hong pai thuzuau hilhte na kingaihsun un.

Ezekiel 13:3

Topa Pasian’ thugen in hih bang ahi hi: hih kamsang haite in gimna thuak ding uh hi. Amaute in amau’ lungsim bangin thugen tawmin, maangmu kineih uh hi.

1 JOHAN MASA 4:1

Ka itte aw, kha khempeuh um kei un. Khate in Pasian tawh kipawl hiam, kipawl lo hiam dongtelin, en un. Bang hang hiam na cih uh leh, zuauthu a gen kamsang tampi leitungah a paikhia zo uh hi.

Jeremiah 23:21

Topa in, “Keimah in ka sawlkhiat hi lo napi-in tua kamsangte a kuankhia teitei uh hi. Thu bangmah ka gen lohpi, kei’ min-in thu a gen mawkmawk uh hi.

2 KUMPI NIHNATE 17:15

Amaute in ama thukhamte, leh a pu a pate uh tawh a bawl a thuciamna, leh amaute tungah a piak hilhkholhnate simmawh uh hi. Amaute in a mawkna milimte zui-in a mawkna suak uh a, amaute tawh kibangin gamta kei un ci-in Topa in a thupiak tawh kisai-in, amaute in amau’ kim-a om minamte zui uh hi.

Micah 2:11

Zuau genin khemna tawh thu gen kawikawi a, “Note adingin leenggahzu leh kham theih zu tampi tak hong om ding hi,” a hong ci kamsangte pawl note’ deih kamsangte ahi hi.

Jeremiah 23:26

Zuauthu tawh thu hilh a, a phuahtawm uh thu a hilh kamsangte’ lungsim sungah zuauthu bang tanvei teeng lai ding ahi hiam?

Ezekiel 22:28

Kulh nin kimlai leikang tui tawh a kizut kaang bangin a kamsangte un hih bang mawhnate iimcip uh hi. A man lopi maang mu uh a, a man lopi-in mailam thu gen uh hi. Topa ahi keimah in amaute tungah thu gen lo napi-in, Topa Pasian in hih bangin thu gen hi, ci-in zuau phuakin mite tungah thu gen uh hi.

Ezekiel 13:23

Tua ahih ciangin tu-in na zuau maangmuhnate uh leh mi lam a khialsak thei na thugen kholhnate uh bei ta ding hi. Note’ khut sung panin ka mite ka honkhia ta dinga tua ciangin Topa ka hihna thu na thei ding uh hi,” hong ci hi.

Ezekiel 13:16

thu hoih lo napi-in, thu hoih hi, ci-in Jerusalem a lungmuan’ nadingin thu a gen kamsangte zong bei khin ta hi,’ ka ci ding hi. Topa Pasian ahi keimah in hih thu ka gen hi,” a ci hi.

Jeremiah 29:8

A vanglian Topa, Israel mite’ Pasian in kong gen-inah: note lak-a om na kamsangte uh leh na aisan theite uh’ khem sa-in ta kei un la, a mang mat hong gente uh na ngai kei un.

Jeremiah 9:20

Numeite aw, Topa’ kammal ngai dih un, a kam pan-a hong gingkhia thu na bil uhah lut sak un; na tanute uh kahdan hilh un la, na inn vengte ciat uh kah la hilh un.

Jeremiah 2:5

Topa in hih bangin ci hi: “Na pute na pate un kei kiang panin gamlapi paikhia-in, bangmah-a kimang lo milim peuh bia-in, amau mahmah zong bang mah-a kimang lo a suah khit nadingun kei’ tungah bang mawhna mu uh ahi hiam?

Paunak 19:27

Thuhilhna a mang nuam lo tapa in, pilna a thei kha lo ding tapa ahi hi.

ROM (Romans) 1:21

Amaute in Pasian a thei uh hi napi-in Pasian phat ding a kilawm zahin a phat kei uh a, ama hehpihna phat lo uh tham loin, amau in mawkna-in a ngaihsun uh a, ciamteh thei loin amau lungsim uh a mial hi.

Jeremiah 9:12

Hih thu a tel thei ding mipil kua ahi hiam? Hih thu a genkhia dingin Topa in kua hopih na hi hiam? Kuamah in hih gam a kantan nawn loh nadingin bang hangin kisia-in gamlak tawh kibang ahi hiam?

Kah la 2:9

Kulh kongpite cim gawpin lei in vukcip a, kongpi kalhna zawlte a kitan gawp hi. Kumpipa leh miliante salin a om khin uh hi. Thukham kihilh nawn lo a, kamsangte in Pasian kiang pan mang a mu nawn kei uh hi.

1 KUMPI MASATE 22:11

Tua ciangin Khene-anah’ tapa Zedekiah in ama adingin sik kite bawl a, “Topa in hih bangin ci hi: ‘Amaute a kisuksiat matengin hihte tawh Siria mite na nawt ding hi,’ ci hi,” a ci hi.

2 KHANG TANGTHU NIHNATE 18:5

Tua ciangin Israel kumpipa in kamsangte mihing zali khawmin amaute kiangah, “Ramothgilead sim dingin kuanto ding i hi hiam, tua ahih kei leh thuak ding ka hi hiam?” a ci hi. Tua ciangin amaute in, “Kuanto in; bang hang hiam cih leh Pasian in kumpipa’ khut sungah hong pia ding hi,” a ci uh hi.

Jeremiah 29:23

Bang hang hiam cih leh amaute Israel gamah hai gamtat uh hi: a innvengte’ zite mawhpih uh a, thu ka piak lohpi ka min tawh zuauthu a gen uh hi. Keimah Topa in ka mu a, teci ka hi hi, hong ci hi,” ci-in a gelh hi.