Jeremiah 23:11 - Tedim Bible

¹¹ Topa in a cih-inah: “Kamsangte leh siampite in Pasian a zahtak kei uh hi. Ka biakinn sung nangawn ah amau’ gitlohna ka mu hi.

Tedim Bible Revision 2017

¹¹ Topa in a cih in ah, “Kamsangte le siampite in Pasian a zahtak kei uh hi. Ka biakinn sung nangawn ah amauʼ gitlohna ka mu hi.

Jeremiah 23:11 Referans Kwoze

Zefaniah 3:4

A kamsangte kihisak uh a, kamsang citak hi lo uh hi. A siampite in a siangtho nate ninsak a, amau’ angsung ding bek khualna-in Pasian’ thukham lehhei uh hi.

Jeremiah 6:13

Bang hang hiam cih leh a neupen pan a lianpen dongin, thuman lopi tawh sum zongin a huaiham uh hi. Kamsangte-a kipan siampite dongin thuman lo khin uh hi.

Ezekiel 23:39

Milim biakna-in ka tate a gawh khit uh ciangin tua ni mah-in ka biakinn-ah pai-in ninsak uh hi. Ka biakinn sungah hih bangin gamta tazen uh hi.

Jeremiah 32:34

Amaute in ka min tawh a kilo biakinn sung nangawn ah a kihhuai milimte a koih uh a, a ninsak uh hi.

Ezekiel 8:16

Tua ciangin biakinntual sungnung ah hong paipih hi. Tua lai-ah biakinn kongkhak gei, biaknatau leh innlim kikal san-ah mihing sawmnih leh nga khawng na om a, biaknatau nung ngatin nisuahna lam nga-in ni suak tuung na bia uh hi.

Jeremiah 11:15

Ka itte in siatna a bawl khit uh ciangin ka biakinn sungah bang thu nei thei nawn ding uh ahi hiam? Nong kamkhapte uh leh na kithoihna sate un na kisiat nading uh hong kipelh sak thei ding ahi hiam? Tua ciangin note na lungdam thei ding uh hiam?

Jeremiah 8:10

Tua ahih manin a zite uh midangte ka piaksak ding a, a lote uh zong midangte ka luahsak ding hi. Bang hang hiam cih leh a neupen pan a lianpen dongin thuman lopi tawh sum zongin a huaiham uh hi. Kamsangte akipan siampite dongin thuman lo khin uh hi.

Jeremiah 7:30

“Bang hang hiam cih leh, Topa in kong cih-inah, Judah mite in hoih ka sak loh nate a hih khin zo uh hi. Ka min tawh a kilo ka biakinn a nit sak nadingun kihhuai milimte a koih uh hi.

2 KHANG TANGTHU NIHNATE 36:14

A makai siampite leh mi khempeuh zong tua mah bangin citak lo mahmah uh a, minamte’ kihhuainate zui uh hi; amah in Jerusalem ah a siangtho-in a koih Topa’ inn amaute in ninsak uh hi.

Ezekiel 8:11

Tua lai-ah Israel minam makai sawmsagih na om a, tuate lakah Shafan’ tapa Jaazaniah zong na om hi. Amaute in paknamtui halna kuang khat ciat tawi uh a, paknamtui hal khute van lamah kahto biaibuai hi.

Ezekiel 7:20

Amaute in a kiphatsakpih uh kizepna a manphate, a muhdahhuai milim dingin bawl uh hi. Tua ahih manin amaute’ hauhna pen amau mah in a kih dingin ka bawl hi.

Jeremiah 23:15

Tua ahih manin tua kamsangte tawh kisai-in a vanglian Topa in kong gen-inah: “En un, keimah in amaute gamsai tawh ka vak ding a, gu kisawh tui ka dawnsak ding hi. Bang hang hiam cih leh Jerusalem khua kamsangte’ kiang panin gamsung mun khempeuh ah Pasian zahtak lohna hong kizel hi,” a ci hi.

Jeremiah 5:31

Kamsangte in thuman gen lo uh a, siampite in amau’ ut bangun a uk uh hi; ka mite in phamawh a sa kei sawnsawn uh hi, a tawpna hun hong tun’ ciangin bang na cih ding uh hiam?

2 KHANG TANGTHU NIHNATE 33:7

Tua ciangin Pasian in David leh a tapa Solomon tungah, “Amaute ka thupiak khempeuh, thukham khempeuh, ngeinate, leh Moses tung tawnin a kipia biakna ngeina, kipte zuih ding a kidop nak uh leh, Israel minam khempeuh sung panin ka teelkhiat hih inn sung leh Jerusalem sungah ka min ka koih tawntung ding hi; tua ciangin na pu na pate uh adingin ka sehsa gam panin Israelte ka khinkhia nawn kei ding hi,” a cih Pasian’ inn sungah amah in ama bawlsa milim koih hi.

2 KHANG TANGTHU NIHNATE 33:5

Tua ciangin amah in Topa’ inn tual nihte’ sungah vantung nate khempeuh adingin biakna taute lam hi.

Jeremiah 50:6

“Ka mite tuu mangthang bang ahi khin uh hi. Makai tuucingte in mualtung tengah lam khialin a gam man’ pih uh hi. Mual khat panin mual khatah a pai kawikawi uh a, a giahna inn uh a thei nawn kei uh hi.

Kah la 2:20

Topa aw hong en in. Na bawlsiat mite hong en dih in. Nupite in a it a tate’ sa uh ne tanghial uh hi. Siampite leh kamsangte in Biakinnpi sung mahmah ah thahna thuak uh hi.

Ezra 10:18

Siampite beh lak panin Jozadak’ tapa Jeshua leh a sanggamte beh sung panin Ma-aseiah, Eliezer, Jarib, leh Gadaliahte in gamdang numei a ten’pihna kimu hi.

Ezekiel 44:10

No Israel midangte tawh kei hong nusia khawmin milim a bia Levi mite in zong daan thuak ding uh hi.

Zefaniah 3:3

A uliante, a hawk thei humpinelkai gilkial bang a, a thukhente, keivom gilkial bang uh hi. Zing khuavak mateng a saguh nek a nusia nuam lo, a huaiham gamsate tawh kibang uh hi.