Jeremiah 22:3 - Tedim Bible

³ Topa in a cih-inah, thumanin diktat un la, bawlsiatna a thuakte a bawlsiate’ khut sung panin honkhia un. Minam dangte, pa neilote leh meigongte simmawh bawl kha loin amau tungah ngongtat kha kei un la, hih munah zong mawhna nei lo mite that kei un.

Tedim Bible Revision 2017

³ Topa in a cih in ah, thumanin dik tat unla, a bawlsiateʼ khut sung panin bawlsiatna a thuak mite hon khia un. Minam dangte, pa nei lote le meigongte simmawh bawl kha loin amauʼ tungah ngongtat kei unla, hih munah zong mawhna nei lo mite that kei un.

Jeremiah 22:3 Referans Kwoze

Jeremiah 21:12

David’ suante aw! Topa in a cih-inah: Zingsang simin man takin thu khen un la, mi bawlsiapa’ khut sung pan a bawlsiatpa hon khia un. Tua bang na hih kei uh leh na siatna bawlnate hangun ka hehna mei bangin a kuang ding a, kuamah in a phelh zo kei ding hi.

Micah 6:8

Mun khempeuh-a om no mihingte aw, Topa in a hoih nate hong gen khin zo hi. Topa in note tung panin hong kalh nate in: thuman thute sem ding a, itna kip nei tawntungin, kiniamkhiatna tawh Pasian’ thu man’ ding ahi hi.

Jeremiah 22:17

Ahih hangin note in thu manlo tawh ngah nading ahi zongin, mimawh lote’ sisan luan’ nading ahi zongin, mi nuaisiahna leh ngongtat nading ahi zongin, na mitte uh leh na lungsim uh na zang uh hi.

Jeim 1:27

I Pa Pasian mai-ah a nin lo, a siangtho biakna in pa nei lo naupangte leh meigong numeite a dah lai takun a en a keem thei a, ama pumpi zong leitung kihhuai nitna tawh kipelh nadingin a kikep theihna ahi hi.

Ezekiel 22:7

A nu a pa a zahtakbawl kuamah om lo hi. Peemtate kikhen gawp a, meigong leh tagahte zong kihih thothop hi.

Malakhi 3:5

Vanglianpen Topa in hih bangin ci hi: “Note tungah thukhen dingin ka hong pai ding a, ai tawite, numei tawh mawhte, a man lopi-a teci pangte, nasemte’ thaman piakna ah khemna a zangte, meigong, tagah, leh gamdang mite a zawhthawh bawlte, leh kei hong zahtak lo mi khempeuhte’ lang khatah thakhatin teci pangin thu ka khen ding hi.

Joel 3:19

Amaute in Judah gam simin, mawhnei lo mite that uh ahih manin, Izipt gam in sehnel gam suakin, Edom gam in gamsia suak ding hi.

Jeremiah 9:24

A kisa theite in, keimah, leitungah migitna, thumanna leh thu tan’na zang ka hihna leh tuate sungah nuam a sapa ka hi hi, cih hong telna leh hong theihna uhah kisathei uh hen,” Topa in kong ci hi.

Jeremiah 5:28

thau-in a mai uh zol hi. Gitlohna lamah a hun bek a theithei kei uh hi. Tagahte’ phattuam nading khual loin thu a man lo pi-in khen uh a, mizawngte tungah thuman lo uh hi.

Isaiah 1:23

Na uliante, mi lehdote hi a, gutate tawh a kikhawlte ahi hi. Mi khempeuh in sumgolh leh letsong deih uh hi. Amaute in pa nei lote pan’pih lo uh a, meigongnu’ thu amaute in sang lo uh hi.

Paunak 23:10

Taanglai gi-suang khin kei in la, tagahte’ leitang va keek kei in.

Late 68:5

Pa nei lote’ pa leh meigong numeite a hupa in, ama omna siangtho sunga om Pasian ahi hi.

Thu-hilhkikna 24:7

“Mi khat in Israel mi a sanggamte khat gu-in, amah in sila bangin bawl ahi a, a zuak ahi zongin a kimuh leh, tua gutapa si ding hi; tua bangin note lak panin siatna na siangsak ding uh hi.

Jeremiah 26:16

Tua ciangin kumpi uliante leh mi khempeuhte in siampite leh kamsangte tungah, “Hih pa in Topa in Pasian’ min tawh thu hong gen ahih manin sihdaan piak tuak lo hi,” a ci uh hi.

Paunak 6:17

kihihsakna, zuauthu genna, mawhnei lo mi thahna,

Late 94:21

Amaute in thuman mihoihte thah sawm uh a, a mawh baang lo mite, sihna daan thuak sak uh hi.

Late 94:6

Amaute in meigong numei leh khualmi thatlum uh a, pa nei lote suamlum uh hi;

JOB (Job) 24:9

Migilote in pa nei nawn lo naupangte sila-in nei uh a, mizawngte’ tate leiba taangin la uh hi.

JOB (Job) 22:9

Meigong numeite a huh nuam lo bek hi loin, mi tagahte bawlsia-in a neihsa uh na sut hi.

2 SAMUEL NIHNA 23:3

Israel Pasian kampau khin a, Israel Suangpi in kei kiangah hong ci khin hi: Mi khat in mite tungah thutang takin ukin Pasian zahtakna tawh a uk ciangin,

Thu-hilhkikna 27:19

“‘Peemta, pa nei lo, leh meigong numeite ading thutang a heikhiatsak mipa in gimna ngah ta hen,’ ci ding uh hi. Tua ciangin mi khempeuh in, ‘Amen,’ ci ding uh hi.

Thu-hilhkikna 25:1

“Mite kikalah thu kineihna om a, thukhen zumah amaute pai-in, thukhente in amau’ thu khensakin, a dikpa khahin a mawhpa lelsak a,

Thu-hilhkikna 10:18

Amah in pa nei lote leh meigong numeite adingin thutang semin, mi peemte itin an leh puan a pia hi.

Siampi Laibu 19:15

“Note in thukhenna ah thuman lo na hih kei ding uh hi; note in mizawngte langgen loin, a liante thu zui loin, thumanna tawh na vengte thu na khen ding uh hi.

Micah 3:11

Khuapi ukte in sumgolh ngah nading bekin thu khenin, siampite in sum ngah nading bekin thu gen uh a, kamsangte in zong sum ngah theih nading bek mahin, mailam thu genkhol uh hi. Tua bang hi napi-in amaute in Topa, muan’in nei uh a, “Topa in eite hong ompih a, i tungah siatna hong tung lo ding hi,” ci uh hi.

Paikhiatna 22:22

Meigong numei ahi a, tagah ahi zongin na gimsak kei ding uh hi.

Mattiu 23:23

“A simtat laitheite leh Farisaite aw, note in gimna na thuak ding uh hi. Bang hang hiam na cih uh leh, leengmasel, anis leh, kummin, sehsawm suah sehkhat na piak uh hangin, thuman thukhenna, midangte hehpihna, gamtatna phate ahi Thukham sungah a lianpen thute na tang kei uh hi. Adangte sangin, hihte na tan’ ding uh a kilawm zaw hi.

Paikhiatna 22:21

“Khual mi khat' tungah khialhna na bawl kei ding uh a, amah na nengniam kei ding uh hi, bang hang hiam cih leh note in Izipt leitangah khual mite na hi ngei uh hi.

Isaiah 58:6

“Kei’ deih antan’na pen hih bang ahi hi! Gitlohna khaute phelin, hakkol savun khaute phel a, a kinengniam mite khahkhia-in, hakkol khempeuh suktan ding ahi hi.

Isaiah 58:7

Na an uh a gilkialte tawh ne khawmin, inn nei lo mi zawngte a buk nading vaihawm sakin; tangguak-a om mi na muh uh ciangin puansilhsak a, na mi pihte uh kiang panin bu lo ding hilo na hi uh hiam?

Jeremiah 7:23

Ahih hangin, ‘Ka thu hong mang un; tua hi leh note’ Pasian ka hi ding-a, note in ka hoih zawk nadingin na khempeuh-ah kong thupiak bang na zui un,’ ci-in thu ka piazaw hi.

Jeremiah 19:4

Bang hang hiam cih leh hih mite in kei hong taisan khin zo uh a, amaute-a kipanin a pu a pate uh leh Judah kumpite’ theih ngei loh pasian dangte’ kiangah paknamtui a hal uh a, hih mun a ninsak uh hi. Hih mun mawhna nei lo mite thahna sisan tawh a dimsak uh a,

Kah la 3:36

zum thukhenna ah a maan-a thu a kikhen loh ciangin, Amah in a hong thei veve hi.

Ezekiel 18:12

Mizawng mi cimmawhte khem-in, mi’ na sut a, sum leitawi a lapa in khapna-a a piak nate pia kik loin kem suak hi. Milim bia-in a zumhuai-in gamta hi.

Ezekiel 45:9

“Topa Pasian in hih bangin ci hi: No Israel a uk uliante aw, na mawh gamtatna uh sau vei lua zo ta hi. Na ngongtatnate uh leh mi na nenniamnate uh khawl un la, thuman thutangin na sem un. Amau leitang panun ka mite notkhia nawn kei un. Topa Pasian keimah in hih thu kong gen hi.

Amos 5:24

Thutang, tui bangin luang khiasak un la, thuman, a kang ngei lo lui tui bangin luangsak un.

Thu-hilhkikna 24:17

“Peemta ahi a, pa nei lo mi thu ahi zongin tuate ading thutang na heisak kei ding uh a, meigong numei’ puan zong khapna na-in na lak sak kei ding uh hi;

Late 82:4

A ginalote leh a cimawhte hon un la, migilote’ khut sung panin amaute honkhia un.”

Ezekiel 18:7

Kuamah khem lo a, kuama’ na zong sut lo hi. Sum leitawi a lapa in khapna van a apte zong pia kik hi. Gilkialte an vakin, puan nei lote puan guan hi.

Amos 5:15

Thusia mudahin thupha deih un la, thukhen zumah a manin thu khen un. Tua hi leh, Josef minam a suakta sunte tungah, Topa, mihonpite’ Pasian hong thunuam kha thei ding hi.