Jeremiah 22:15 - Tedim Bible

¹⁵ Taamtaak sing tawh inn na lam manin kumpi kisa na hi hiam? Na pa in an ne tui dawn a, thumanna leh diktatna tawh na a sep manin a maa pai hilo ahi hiam?

Tedim Bible Revision 2017

¹⁵ Taamtak sing tawh inn na lam manin kumpi kisa na hi hiam? Na pa in an ne tui dawn a, thumanna le diktatna tawh na a sep manin a maa pai hi lo ahi hiam?

Jeremiah 22:15 Referans Kwoze

2 KUMPI NIHNATE 23:25

Ama hun ma-in, amah tawh a kibang, Moses’ thukham tawh kizui-in a lungsim khempeuh, a nuntakna khempeuh leh a thahatna khempeuh tawh Topa lamah a kihei kumpi om lo hi; ama nungah zong amah tawh a kibang khat zong hong khang lo hi.

Isaiah 3:10

Amaute tungah thu hoih ding hi, ci-in thuman mite kiangah gen un, bang hang hiam cih leh amaute in amau gamtatna hoih a gah ne ding uh hi.

Thuhilh-sia 10:17

A kumpipa in lungsim khentatna nei thei a, a makaite in annek tuidawn a hun thei a, amau ki-uk thei-in zu a kham lo makai a nei, gam khat peuhpeuh, a hampha gam ahi hi.

Paunak 25:5

Kumpipa kiang pan migilote nilkhia lehang, thuman-a ama ukna kip thei bek hi.

Paunak 29:4

Thuman-a a gamta kumpi in a gam kipsak a, sum bek a ngaihsun kumpipa in a gam siasak hi.

2 KUMPI NIHNATE 22:2

Amah in Topa’ mit-ah a man gamta-in, a pu David’ khekhap khempeuh zui cinten a, tak lamah ahi a, vei lamah ahi zongin pial lo hi.

Jeremiah 42:6

Nang kong sawlna uh Topa i Pasian’ hong gen bangbang hoih taleh sia taleh ka mang ding uh hi. Bang hang hiam cih leh Topa i Pasian’ thu mang leng, ei’ adingin na hong hoih ding hi,’ a ci uh hi.

Jeremiah 21:12

David’ suante aw! Topa in a cih-inah: Zingsang simin man takin thu khen un la, mi bawlsiapa’ khut sung pan a bawlsiatpa hon khia un. Tua bang na hih kei uh leh na siatna bawlnate hangun ka hehna mei bangin a kuang ding a, kuamah in a phelh zo kei ding hi.

Paunak 21:3

Topa in biakpiakna sangin, thuman thutang deihzaw hi.

1 KUMPI MASATE 10:9

Nang sungah lungdamin Israel kumpi tokhom tungah nang hong koih Topa na Pasian in thupha ngah ta hen! Topa in Israel it tawntung ahih manin nangmah in thutang leh thuman na sepkhiat theih nadingin amah in kumpi-in nang hong bawl hi,” a ci hi.

2 SAMUEL NIHNA 8:15

Tua ahih ciangin David in Israelte khempeuh uk hi; David in a mite khempeuh tungah thutang leh thuman zang hi.

1 KORIN MASA 10:31

Tua ahih ciangin note in anneek tuidawn akipan na khempeuh na bawl uh ciangin Pasian’ minthan’ nading ngaihsunin na hih un.

Sawltak 2:46

Amaute in biakna innpi sungah ni simin lungsim kituakin a om uh a, amau innah anlum balnenin, a siangtho lungdamna tawh anne tuidawn uh a, Pasian a phat uh hi.

Luka 11:41

Ahih hangin kuang sunglam a om nate mizawngte na pia un. Tua bang na hih uh leh, na khempeuh note mai-ah a siangtho ding hi.”

Jeremiah 23:5

“En un, Topa in kong cih-inah, keimah in David’ suan lak panin kumpi dingin a diktat Hiang khat ka khan’ khiatsak ni hong tung ding hi. Amah gam uk siam ding a, gam sungah thuman thutang tawh thu hong khen ding hi.

Jeremiah 22:18

Tua ahih manin Judah kumpipa Josiah’ tapa Jehoiakim’ thu tawh kisai-in Topa in hih bangin kong ci hi: “Amaute in, ‘Sanggampa aw,’ ‘Sanggamnu aw,’ ci-a a sih ciang uh a, a kikah bangun amah a sih ciangin a kah kei ding uh a, ‘Topa aw,’ ‘Kumpipa aw,’ ci-in a kah kei ding uh hi.

Jeremiah 22:3

Topa in a cih-inah, thumanin diktat un la, bawlsiatna a thuakte a bawlsiate’ khut sung panin honkhia un. Minam dangte, pa neilote leh meigongte simmawh bawl kha loin amau tungah ngongtat kha kei un la, hih munah zong mawhna nei lo mite that kei un.

Isaiah 33:16

Hih in a san’na munte ah teengin, kulh mualpi bukna-a a zang ding mipa ahi hi. Amah an kipia in, a dawn ding tui kitasam lo ding hi.

Isaiah 9:7

Tua huna kipanin a tawntungin David kumpi tokhom tungah maangin ama gam sungah thutan’na leh thumanna phutin a kipsak nadingin, alian semsem ama ukna leh nopsakna in mong nei lo ding hi. Vanglianpen Topa’ deih luatna in hih thu hong tungsak ding hi.

Thuhilh-sia 2:24

Mihing khat in a nasepna thamanin an ne tui dawnin nuam sa-in a om sangin a hoihzaw bangmah dang om lo hi. Ahi zongin tua nangawn zong, Pasian’ hang ahihna ka phawk hi.

Paunak 31:9

Amau’ ading thu genin a tangin thu khen in la, a zawng-a cimawh mite, amau’ adinga kilawm hamphatna ngah sak in.

Paunak 20:28

Kumpipa in itna tawh thuman, thutang, citakin a uk lai teng, a kumpi za-ah kip bek hi.

2 KHANG TANGTHU NIHNATE 34:2

Amah in Topa mit-ah a man gamta a, a pu David’ khekhap zui hi; tak lamah ahi a, vei lamah ahi zongin amah lam pial lo hi.

1 KHANG TANGTHU MASATE 3:15

Josiah’ tapate in: A tacil Johanan, a nihna Jehoiakim, a thumna Zedekiah, a lina Shallum ahi uh hi.

Thu-hilhkikna 4:40

Tua ahih ciangin note leh note khit-a na tate uh tungah thu hong nuamin, Topa na Pasian un a tawntung a, hong piak gam sungah na khan’ uh na sausak theih nadingun tu ni-a note kiangah kong gen ahi ama thukhamte leh a thupiaknate na zui ding uh hi,” a ci hi.

Jeremiah 7:5

“Bang hang hiam na cih uh leh na nuntakzia uh leh na gamtatnate uh na kikhel uh a, khat leh khat kikal-ah thuman thutak-a na vaihawm uh leh,

2 KHANG TANGTHU NIHNATE 35:22

Ahi zongin ama kiang panin Josiah kihei khia nuam lo a, amah tawh a kido theih nadingin a meel kiseel hi. Amah in Pasian’ kam pana Neko’ thugente ngai lo a, Megiddo zanglei a, galkidona ah va pawm hi.

2 KHANG TANGTHU NIHNATE 35:26

Tu-in Josiah’ gamtatna a om laite, leh Topa’ thukham sungah a kigelh bangin a nasep hoihte,