Jeremiah 18:8 - Tedim Bible

⁸ tua ka gen sa minam leh gam in a siatna panin a kihei kik leh, ama tung-a siatna tun’ sak ding-a ka seh sa pen ka kisikkik ding a, ka tungsak nawn kei ding hi.

Tedim Bible Revision 2017

⁸ tua ka gen sa minam le gam a siatna panin a kiheikik leh, ama tungah siatna tunsak dingin ka seh sa pen ka kisikkik dinga, ka tungsak nawn kei ding hi.

Jeremiah 18:8 Referans Kwoze

Ezekiel 18:21

“Mi gilo khat in a mawh bawlna khawlin ka thukham zui hen la, a hoih a manin gamta leh, tua mipa si lo ding hi; pel loin nungta ding hi.

Jeremiah 26:13

Tua ahih manin tu-in na nuntakdante uh leh na gamtatziate uh khel un la, Topa na Pasian uh’ thu ngai un. Tua hi leh Topa in note’ kisiat nading a gensa pen a khelkik ding hi.

Hosea 11:8

Israel aw, bang ci-a hong nusia thei ding a, bang ci-a hong paidak thei ding ka hi hiam? Bang ci-in Admah khua banga hong bawl ding a, bang ci-in Zeboi-im khua bangin hong bawl ding ka hi hiam? Note hong khasiat mahmah ka hih manin tua banga hih ding ka lungsim ah om lo hi.

Jeremiah 26:3

Amaute in na thu gen hong ngai-in, a gitlohna uh pan a kihei kha thei ding uh hi. Tua hi leh amau’ gitlohna hanga amau suksiat ding a, ka ngaihsut sa ka khelkik ding hi.

Thukhente 2:18

Topa in amaute adingin thukhente a khan’sak peuhpeuh ciangin thukhente tawh Topa om a, thukhente nuntak sung tawntung a galte uh khut sung panin amaute hon hi; bang hang hiam cih leh a gimsak a nengniamte’ hangin amau’ tauna in Topa’ hehpih nading piangsak hi.

Late 106:45

Amaute ading a ngaihsutna-in ama thuciamna a phawk a, ama itna kip lianpi tawh kizui-in a kolsak hi.

Late 135:14

Bang hang hiam cih leh Topa in ama mite’ thu khenin, ama nasemte tungah hehpihna nei ding hi.

Late 90:13

Topa aw, hong kihei kik in! Bang tan sauvei ding ahi hiam? Na nasemte hong hehpih in!

2 KHANG TANGTHU NIHNATE 12:6

Tua ciangin Israel uliante leh kumpipa kiniamkhiatin “Topa thuman hi,” a ci uh hi.

Thu-hilhkikna 32:36

Bang hang hiam cih leh amaute’ vang a beina leh sila leh sila a hilote’ a beina a muh ciangin Topa in a mite’ dikna kilangsak ding a, ama nasemte tungah hehpihna nei ding hi.

Paikhiatna 32:12

Bang hangin Izipt in, ‘Mual tungah amaute a that ding leh leitung panin amaute a beisak dingin siatna ngaihsutna tawh amah in amaute paikhiatpih hi,’ ci ding ahi uh hiam? A kihtak-huai na hehna daaisak in la, na lungsim khelin na mite' tungah hih siatna tungsak kei in.

Jonah 4:2

Topa’ kiangah thungen a, “Kong ngen hi, Topa aw, ka gam sungah ka om lai pekin hi ci mah in teh, ci hilo ka hi hiam? Tarshish khua-ah hanciam-a ka tai simna zong tua hang mah ahi hi; bang hang hiam cih leh nangmah in a hehpih thei Pasian, a heh hak, a migi mahmah, siatna tun’ sak nading a kisik kik nuam Pasian na hihna kong thei hi.

Ezekiel 33:13

Midik khat tungah nuntakna ding kam ka ciam hangin, a beisa-a ama hoihna suangin mawh gamtat ding hong kipan leh, ama gamtat hoihnasate ka phawksak kei ding hi. Ama mawh gamtatna hangin si veve ding hi.

Ezekiel 33:11

Amaute kiangah hih bangin gen in: Keimah in a nungta Topa Pasian ka hih mah bangin mawhnei mi khat a si ka muh ciangin nuam ka sa het kei hi. A mawh gamtatna khawlin a nuntak ding ka deihna hi zaw hi. Israel mite aw, na mawh gamtatnate uh khawl un. Bang hangin si nuam se na hi uh hiam?

Jeremiah 42:10

Hih gamah note na om suak uh leh note kong lam ding a, kong phel kei ding hi. Kong phut ding a, kong botkhia kei ding hi. Bang hang hiam cih leh note’ tungah siatna kong tun’ sak manin ka dah hi.

Jeremiah 36:3

Judah mite in amau tunga tun’sak dinga ka ngaihsut siatna khempeuh za-in mi khempeuh in a siatna lampi-uh panin kiheina-in a nei kha thei ding uh a, keimah in zong amau’ khialhna leh amau’ mawhnate ka maisak kha thei ding hi,” a ci hi.

Jeremiah 26:19

Judah kumpipa Hezekiah leh Judah mi khempeuhte in amah that zenzen uh ahi hiam? Kumpipa in Topa zahtakin Topa’ pahtak ding a nget ciangin Topa in zong amau’ tunga siatna tun’sak dinga a gensa khelkik zaw hilo ahi hiam? Ahih hangin eite in eite’ tungah siatna lianpi khat i tungsak dekdek hi,” a ci uh hi.

Jeremiah 15:6

Nangmah in kei nong taisan zo hi, Topa in kong ci hi, kei nong nungngat niloh hi; tua ahih manin ka khut kong zan-a kong susia hi—ka hehna ka ki-ipip zo nawn kei hi.

Jeremiah 12:16

Tua ciangin, ka mite’ omdan hoih takin a sin uh a, Baal min tawh kiciam dingin ka mite a sinsak mah bangun ‘Topa a nuntak bangin,’ ci-a kei’ min tawh kiciam ding a sin uh leh ka mite’ lakah kip takin a om ding uh hi.

Ezekiel 33:14

Migilo khat kiangah, na si taktak ding hi, ci-in ka hilhkholh hangin, a mawh gamtatna khawlin a man a hoihin hong gamta kik hen la,

Paikhiatna 32:14

Tua hi a, Topa in a lungsim khel a, ama' mite' tungah a tun’sak ding siatna tungsak nawn lo hi.

Ezekiel 33:12

“Ezekiel aw, tu-in Israel mite kiangah hih bangin gen in: Midik khat in mawhna bawl leh, a beisa-a ama hoihna in amah suaktasak thei lo hi. Mi gilo khat a gitlohna khawl leh daan kipia lo ding a, midik khat in mawhna bawl leh nungta suak tuan lo ding hi.

Amos 5:15

Thusia mudahin thupha deih un la, thukhen zumah a manin thu khen un. Tua hi leh, Josef minam a suakta sunte tungah, Topa, mihonpite’ Pasian hong thunuam kha thei ding hi.