Jeremiah 16:15 - Tedim Bible

¹⁵ Amaute in, ‘Leilu lam gam leh eite hong hawlkhiatna gam khempeuh pana Israel mite a hong lakhia Topa a nuntak bangin,’ a ci zaw ding uh hi. Bang hang hiam cih leh a pu a pate uh ka piaksa, amau’ neihsa gamah amaute ka lakik ding hi.

Tedim Bible Revision 2017

¹⁵ Amaute in, ‘Leilu lam gam le eite hong hawl khiatna gam khempeuh panin Israel mite a hong kaikhawm Topa a nuntak bangin,’ a ci zaw ding uh hi. Bang hang hiam cih leh a pu a pate uh ka piak sa, amauʼ neihsa gamah amaute ka paipih ding hi.

Jeremiah 16:15 Referans Kwoze

Jeremiah 32:37

En in, Ka hehna, ka thangpaihna leh ka lungkimlohna lianpi tawh ka hawlkhiatna gam khempeuh panin amaute ka kaikhawm ding a, hih munah tun’pih kikin, lungmuang takin ka teengsak ding hi.

Jeremiah 24:6

Amaute lim takin ka kem ding a, hih gamah ka lakik ding hi. Amaute ka khangto sak ding a, ka susia kei ding hi; ka suan ding a, ka botkhia kei ding hi.

Jeremiah 3:18

Tua hun ciangin Judah mite in Israel mite hong pawlpih ding uh a, leilu lam gam panin na pute na pate-uh’ luah dinga ka piak sa gamah hong paikhawm ding uh hi.

Amos 9:14

Ka mi Israelte, amaute’ gam ka tun’ kik ding a, a kisia a khuapite uh lampha kikin, a sungah teeng ding uh hi. Amaute in leenggui suanin, a zu dawn ding uh a, huan bawlin, a sunga piangte ne ding uh hi.

Ezekiel 39:28

Tua ciangin, minam dangte khut sungah sal-in amaute puakin, tua khit ciangin amaute khat zong siit loin kaikhawm kikin a gam sung uh ka tun’pih kimna hangin amaute Topa Pasian ka hihna thu, keima mite in hong thei ding uh hi.

Ezekiel 36:24

Gam khempeuh leh minam khempeuhte lak panin note hong kaikhawm kikin na gam uhah kong tun’pih kik ding hi.

Late 106:47

Topa, kote’ Pasian aw, kote hong hon in la, nangma min siangtho kong phat theih nading uh leh nangma tungah lungdamna kong koh theih nadingun, minamte lak panin kote hong kaikhawm kik in.

Jeremiah 31:8

En un, keimah in leilu lam gam panin amaute ka la ding a, leitung a gamla pen mun panin ka kaikhawm ding hi. Mittawte leh khelbaite zong hong kihel ding uh a, nupi gaite leh nau suak ding numeite-a kipan mi honpi hih lai munah hong ciahkik ding uh hi.

Jeremiah 30:10

“Tua ahih manin Topa in kong cih-inah; Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte-uh’ saltan’na panin kong honkhia ding hi. Jakob’ suante hong ciahkik ding uh a, nuam takin a teeng kik ding uh hi. Kuamah in amaute a lausak nawn kei ding hi.

Jeremiah 30:3

Bang hang hiam cih leh Topa in kong cih-inah, Israel leh Judah ka mite, a saltan’na uh kong beisak kik ni a hong tung ding hi. A pute a pate-uh’ tunga ka piaksa gamah ka tun’pih kik ding a, amaute in tua gam a tang kik ding uh hi, Topa in kong ci hi,” a ci hi.

Isaiah 14:1

Topa in Jakob hehpihin Israel teel kik ding a, amaute pen a gam uhah koih kik ding hi, khual mite in amaute pawlin Jakob innkuan beel ding uh hi.

Jeremiah 50:19

Israel mite pen a omna sa uh mun mah ah ka omsak kik ding a, Karmel leh Bashan mual ah an ne-in Efraim mual Gilead mualah lungkim takin a om ding uh hi.

Jeremiah 23:8

‘a hawlkhiatna leilu lam gam leh gam dangte khempeuh panin Israel mite’ suan leh khakte pai khiatpih a, a makaih Topa a nuntak bangin,’ ci-in a kiciam zaw ding uh hi. Tua ciangin amaute, amau’ gamsung mah ah a teeng ding uh hi,” a ci hi.

Jeremiah 23:7

“Tua ahih manin, en un, Topa in kong cih-inah, mite in, ‘Izipt gam panin Israel mite a hong paikhiatpih Topa a nuntak bangin,’ ci-in a kiciam nawn kei ding uh a,

Jeremiah 29:14

Topa in kong cih-inah, note in nong mu ding uh a, na saltan’na uh hong bei sakin, kong hawlkhiatna gam khempeuh leh mun khempeuh panin kong kaikhawm kik ding a, note kong lak khiatna gam mahah kong tun’pih kik ding hi, Topa in kong ci hi.

Joel 3:1

“Tua hun ciangin Judah leh Jerusalem, a nidang hun uh ka bangsak kik ding hi.

Piancilna 28:15

En in, keimah in nang tawh omin na paina peuhah kong kem ding a, hih leitangah nang kong paipih kik ding hi; bang hang hiam cih leh nang' tunga kong gensa thute ka hih khit matengin nang kong nusia kei ding hi,” ci hi.

Jeremiah 12:15

Ahih hangin amaute ka lakkhiat khit ciangin ka hehpih kik ding a, amau’ luah ding amau’ gam ciatciat uhah ka koihkik ding hi.

Jeremiah 23:3

Ka mite a om lai sun teng, ka hawl khiatna gamte panin ka kaikhawm kik ding a, a gam uhah ka ciahkik sak ding hi. Amaute pung-in a khang ding uh hi.

Amos 9:15

Amau adingin ka piak gam sungah amaute ka koih kik ding a, tua ka piaksa gam panin kuamah in amaute lakhia kik nawn lo ding hi, Topa, note’ Pasian in ci hi, a ci hi.