Jeremiah 15:8 - Tedim Bible

⁸ Tuipi-a sehnel om zah sangin nupi meigong ka tamsak zaw ding hi; na tangvalte uh a khan’ cin laitakin ka that ding a, a nute uh ka thuaksak ding hi. No’ tungah thakhat thu-in lungkhamna leh launa kong tungsak ding hi.

Tedim Bible Revision 2017

⁸ Tuipi a sehnel omzah sangin nupi meigong ka tamsak zaw ding hi. Na tangvalte uh a khan laitakin ka that dinga, a nute uh ka lunggimsak ding hi. Noteʼ tungah thakhat thu-in lungkhamna le launa ka hong tungsak ding hi.

Jeremiah 15:8 Referans Kwoze

Isaiah 3:25

Na mite pen namsau tawh si ding uh a, a vanglian na mitepen gal sungah kisia ding uh hi.

Luka 21:35

Tua mah bangin leitungah a teeng mi khempeuh tungah hong tung ding hi.

Jeremiah 5:6

Tua ahih manin tuulak panin humpi khat in amaute that ding a, sehnel gam panin keivom khat in a petgawp ding hi. Kamkei khat in a khuapite uh vil gige a, a pusuak khia peuhpeuh balzan gawp ding hi; bang hang hiam cih leh amaute’ mawhna uh tamlua a, kei hong taisan mun lua uh hi.

Jeremiah 4:16

Minamte’ kiangah va gen un la, Jerusalem’ kiangah va tangko un. “Gamlapi panin galte hong pai uh a, Judah gam khuapite’ lang khatah hong kiko uh hi.

Isaiah 3:26

Khuapi kongpi pen tau-in thuum ding hi; khuapi pen gamkhing suakin, a tangguak-a om nupi bangin lei lakah tucip ding hi.

Isaiah 4:1

Tua ni ciangin, nupi sagih in papi khat nei khawm ding uh a, “Kote in komau’ an ciat mah ne-in, komau’ puanciat mah ka silh ding uh hi, kote pen, nangma zi cih min bek hong pua sak in; ka minsiatna teng uh hong hum in,” ci ding uh hi.

Jeremiah 16:3

Bang hang hiam cih leh hih mun-a a suak tanu tapate leh a nute a pate uh tawh kisai-in Topa in ka cih-inah:

Jeremiah 18:21

Tua ahih manin a tate uh kial tawh puksi sak in la, amaute namsau-in si sak in. A zite uh tasel sak in la, meigong suaksak in. A pasalte uh pulnatna tawh si sak in la, a tangvalte uh gal sungah namsau tawh kithatlumsak in.

Jeremiah 22:7

Nang’ lang khatah a hong susia ding mi ka kithawisak ding a, a hei uh hong keng ding uh hi. Amaute in na sidar khuam hoihpente hong phuksak ding uh a, mei-ah hong khul sak ding uh hi.

Kah la 5:3

Ka pate uh gal in hong thahsak khin a, ka nute uh a meigong khin uh hi.

Ezekiel 22:25

A uliante uh pen ganhing a that humpinelkai hawk tawh kibang uh hi. Amaute in mi thatin, a sum leh a neihsa khempeuh laksak uh a, a mi thahna hangun numei tampi tak meigong suaksak uh hi.

Hosea 4:5

Na nasepnate uh a sun a zan cih om loin, a kiman’na mel om lo hi; kamsangte zong note bangmah hi lel hi. Na nu uh Israel ka susia ding hi.

Jeremiah 6:26

Ka tanu aw, ippi puan silh in la, vut lakah kikhuk in. Tapa khat neihsun sih suah bangin kap vangvang in, bang hang hiam cih leh a hong susia dingpa thakhat thu-in hong pai ding hi.