Jeremiah 11:17 - Tedim Bible

¹⁷ Israel mite leh Judah mite in mei halna tawh Baal bia-in hong heh sak-a siatna a bawl manun, nang a hong phut keimah a vanglian Topa in nang’ tungah siatna tun’ nading thu kong pia zo hi,” a ci hi.

Tedim Bible Revision 2017

¹⁷ Israel mite le Judah mite in meihalna tawh Baal bia-in hong hehsak uh a, hih bang siatna bawl uh ahih manin, amaute a phut keimah Vanglian Topa in amauteʼ tungah siatna a tun nading thu ka pia zo hi,” hong ci hi.

Jeremiah 11:17 Referans Kwoze

Isaiah 5:2

Amah in lei to-in suangte paikhia a, leenggui hoihte a suan hi; amah in a laizangah tausang khat lam a, tua sungah leenggah sukna khuk khat a to hi; amah in leenggah hoih hong gah ding lamen a, ahih hangin gam leenggah hong gah mawk hi.

Jeremiah 12:2

Nangmah in amaute na suan a, amau in zong zung kha-in, hong khangin, gah hong gah uh hi. A kam uh tawh nang hong phat uh a, a lungsim uh nang tawh kigamla hi.

Jeremiah 2:21

A kiteelteel leenggah gui ci hoihte bangin nang kong suan khin zo-a, ahih hangin nang kisia kik-in bang hangin leenggah gui a hoihlote na suak kik tazen hiam?

Jeremiah 19:15

“A vanglian Topa, Israel mite’ Pasian in a cih-inah, En un, hih khuapi leh a kim-a khuaneute’ tungah ka gensa siatna khempeuh ka tung sak ding hi. Bang hang hiam cih leh amaute in a lung uh a khauhsak uh a, ka thute a ngai nuam kei uh hi, a ci hi,” ka ci hi.

Ezekiel 17:5

Tua ciangin Israel gam panin leenggui no khat la-in, a khan’ theih nadingin tui a om tawntungna lei hoih mun khatah suan hi.

Jeremiah 45:4

Topa in nang’ tungah hih bang a gen dingin hong sawl hi: En in, keimah in ka lam sate ka phel kik a, ka phuh sate ka bot khia kik hi. Keimah in leitung buppi tua bangin ka hih ding hi.

Jeremiah 42:10

Hih gamah note na om suak uh leh note kong lam ding a, kong phel kei ding hi. Kong phut ding a, kong botkhia kei ding hi. Bang hang hiam cih leh note’ tungah siatna kong tun’ sak manin ka dah hi.

Jeremiah 40:2

Kumpi cing galkap mangpa in Jeremiah samkhia a, hopihin, “Topa na Pasian in hih mun siat nadingin thu gen khin zo hi.

Jeremiah 36:7

Amaute in Topa tungah thuum-in a vekpi-un a hoihlohna uh panin a kihei kha thei ding uh hi. Bang hang hiam cih leh hih mite tungah Topa in tun’sak dinga a gensa a hehna leh a thangpaihna lian mahmah hi,” a ci hi.

Jeremiah 35:17

Tua ahih manin keimah Topa, a vanglian Pasian, Israel mite’ Pasian in kong gen-inah: En un, Judah mite leh Jerusalem khua-a teeng mi khempeuh tungah a tung ding a, ka gen khiatsa siatna khempeuh ka tungsak ding hi. Bang hang hiam cih leh amau tungah ka gen hangin amau in ka thu hong ngai lo uh a, amaute ka sap hangin hong dawngkik lo uh hi, ci hi, ci-in va gen in,” a ci hi.

Jeremiah 26:19

Judah kumpipa Hezekiah leh Judah mi khempeuhte in amah that zenzen uh ahi hiam? Kumpipa in Topa zahtakin Topa’ pahtak ding a nget ciangin Topa in zong amau’ tunga siatna tun’sak dinga a gensa khelkik zaw hilo ahi hiam? Ahih hangin eite in eite’ tungah siatna lianpi khat i tungsak dekdek hi,” a ci uh hi.

Jeremiah 26:13

Tua ahih manin tu-in na nuntakdante uh leh na gamtatziate uh khel un la, Topa na Pasian uh’ thu ngai un. Tua hi leh Topa in note’ kisiat nading a gensa pen a khelkik ding hi.

Jeremiah 24:6

Amaute lim takin ka kem ding a, hih gamah ka lakik ding hi. Amaute ka khangto sak ding a, ka susia kei ding hi; ka suan ding a, ka botkhia kei ding hi.

Jeremiah 18:8

tua ka gen sa minam leh gam in a siatna panin a kihei kik leh, ama tung-a siatna tun’ sak ding-a ka seh sa pen ka kisikkik ding a, ka tungsak nawn kei ding hi.

Jeremiah 11:11

Tua ahih ciangin Topa in kong cih-inah, en un, a suahtak theih loh uh gimna amau’ tungah ka tungsak ding a, kei kiangah a hong kap liang uh zongin ka dawng nawn kei ding hi.

Jeremiah 7:9

Note in na gu-in, tual that-in, angkawmin, a hi lopi kiciam-in, Baal kiangah meihal biakna pia-in, na theih ngei loh uh pasian dangte delhin,

Isaiah 61:3

amaute pen a thuman mite kici-in, amah a kiminthan’sak theih nadingin Topa’ suan kungte a kicih theih nadingin, Zion ah a om a dah mite tungah vut tawh kibuak a, lukhu khuk tangin a hoih kumpi lukhu khuksak nading, tauna tangin lungdamna sathau nilhsak theih nading, a lunggimna tangin Pasian phatna puan a silh theih nadingun amah in kei hong sawl zo hi.

Late 80:8

Nangmah in, Izipt panin leenggui khat na la a, minamte hawlkhia-in, tua leenggui na suan hi.

Late 44:2

Na khut tawh minam dangte na hawlkhia a, ahih hangin amaute na phut hi; midangte na sugawp a, ahih hangin amaute na suakta sak hi;

2 SAMUEL NIHNA 7:10

Keimah in ka mi Israelte adingin mun khat ka seh ding a, amaute in amau’ mun-ah teengin a kinawngkaisak nawn loh nadingin amaute ka phut ding hi; nidang bangin mi ngongtatte in,

Jeremiah 1:14

Tua ciangin Topa in, “Leilu lam panin hih gam mi khempeuhte’ tungah siatna hong sosuk ding hi.

Jeremiah 7:18

Naupangte in sing tom-in, a pate un mei a tawh uh a, nupite in a nusian uh vantung kumpinu’ ading tangho a su uh a, kei hong hehsak nadingun, pasian dangte’ dawn dingin biakna a pia tazen uh hi.

Jeremiah 11:13

Bang hang hiam cih leh, Judah aw, na khua om zahzah uh pasian na nei uh a, Jerusalem khua kongzing om zahzah meihal biakna tawh Baal biak nading a zum huai biakna taute na bawl tazen uh hi.

Jeremiah 32:29

Hih khuapi a sim Khaldea mite hong pai-in khuapi mei tawh a hal ding uh a, ka heh nading-a inn khum tunga Baal milimte paknamtui halna tawh a biakna innte uh leh pasian dangte’ kianga tuidawn biakna a piakna uh innte zong a haltum ding uh hi.

Jeremiah 32:30

Bang hang hiam cih leh Israel mite leh Judah mite in a neu lai pek uh a, kipan ka muhna-ah siatna bekbek a bawl uh a, keimah Topa in kong cih-inah, Israel mite in a khut uh tawh milim a bawlna uh hangin kei hong heh sak uh hi.

Jeremiah 44:8

Note in si-in, leitunga minam dang khempeuhte in kihaamsiatna-a hong zat ding uh leh a hong simmawh nadingun bang hangin na khut uh tawh milim bawl-in na teen’ nadingun na zuat uh Izipt gamah pasian dangte’ kiangah paknamtui hal-in kei hong hehsak na hi uh hiam?

2 KHANG TANGTHU NIHNATE 28:25

Amah in pasian dangte tungah paknamtui hal nadingin Judah khuapi khempeuh ah mual dawn a, biak piaknate bawl a, a pu a pate’ Pasian, Topa a heh nadingin phin hi.

Jeremiah 18:15

Ahih hangin ka mite in kei hong mangngilh khin uh a, milim pasiante kiangah paknamtui a hal uh hi. Amau’ tot ding lampi-ah tuk uh ahih manin a tot ngei uh lampi lui zui nawnloin, lampi lopi a tawn uh hi.

Jeremiah 40:3

Ama’ gen mah bangin Topa in tu-in zong a hih khin zo hi. Note in Topa’ tungah mawhin a thu mang lo na hih manun, note’ tungah hih na hong tung ahi hi.

Jeremiah 44:5

Ahih hangin amaute in ka thu hong ngai loin a bil uh hong dawh lo uh a, a gitlohna uh panin kihei loin, pasian dangte’ kiangah paknamtui hal veve uh hi.

Hosea 10:1

Israel mite ahih leh a gah pha mahmah leenggui tawh kibang hi. Cithei semsem leh biakna tau tam semsem lam uh hi. A gam sung uh cithei semsem leh biakna khuampi hoih bawl semsem uh hi.