Jeremiah 10:19 - Tedim Bible

¹⁹ Ka thuakna hangin ka gim hi! Ka liamna nasia mahmah hi. Ahih hangin, “Hih gimna ka thuak ding mah hi,” ka ci hi.

Tedim Bible Revision 2017

¹⁹ Ka thuakna hangin ka gim a, ka liamna nasia mahmah hi. Ahih hangin, “Hih gimna ka thuak ding mah hi,” ka ci hi.

Jeremiah 10:19 Referans Kwoze

Micah 7:9

Amah in ka thu hong sun’sakin, kei adingin thu hong khensak mateng Topa’ hehna ka thuak ding hi; bang hang hiam cih leh ama’ tungah ka mawh khin zo hi. Amah in khuavak ah hong paipih ding a, ama’ hotkhiatna ka mu ding hi.

Jeremiah 14:17

“Jeremiah aw, amaute’ kiangah hih bangin va ci in: ‘Sun-le-zanin ka khitui luangluang hen la, kang ngei kei ta hen; bang hang hiam cih leh ka mite in nakpi-in liamna a thuak uh a, nakpi takin a kisat hi.

Jeremiah 4:31

Nau suak ding numei kiko bang khat ka za hi, tacil a suak numei khat’ tauna tawh kibang hi. Zion’ tanu husam liang-a a kikona aw hi a, a khut tegel zakin, “Gimna ka thuak ding hi! Kei hong that ding uh hi!” a ci hi.

Late 39:9

Hih banga bawl nangmah na hih manin pau loin ka om a, ka kam ka ka kei hi.

Kah la 3:48

Ka mite a kisiat manin, ka khitui guntui luang a bang hi.

Kah la 1:2

Amah zan khuavakin kap a, a khitui a biang tungah a tak kauhkauh hi. Amah a it ngeite khempeuh a hehnem ding khat beek a om nawn kei hi. A kipawl pihte khempeuh in kheemin, tu in a langpan’ khin ta uh hi.

Jeremiah 17:13

Aw Topa, Israel mite’ lametpa aw, nang a hong taisan mite a zahhuai ding uh hi. Nang a hong lehngat san mite leivui laka min gelh bangin a mang thang ding uh hi. Bang hang hiam cih leh nuntakna ciktui ahi Topa a hong taisan zo uh hi.

Jeremiah 9:1

Aw, ka lu tuikhuk hi-in, ka mitte khitui nak hi tazen leh pawh, ka mite’ kithahlupna hangin a sun a zanin kapkap mai ning!

Jeremiah 8:21

Ka mite’ thuakna hangin ka lungsim kisia hi. Lung kham lua-in ka kap hi.

Jeremiah 4:19

Aw, ka lungtang, ka lungtang! Na ka sa mahmah hi! Ka lungtang kisai vanvan a, ka om hithiat thei kei hi; bang hang hiam cih leh peengkul mutna aw, gal kisimna aw ka za hi.

Isaiah 8:17

Jakob innkuante’ kiang panin a maitang a seel Topa ngakin amah ka muang ding hi.

Late 77:10

Tua ciangin ahih leh, “Sang Penpa khut taklam a kikhelna in keima kha-kham veina ahi hi,” ka ci hi.

Jeremiah 14:7

Ka mite in kei tungah, “Topa aw, ka mawhna-un in kote’ lang khatah hong pang ahi ta zongin, nangma’ min hangin hong hehpih in. Kote in tam veipi kong nungngat uh a, nang tungah kong khial zo uh hi.