Jeim 1:12 - Tedim Bible

¹² Ze-etna a thuak zo mi in thupha a ngah ding hi. Bang hang hiam na cih uh leh, ze-etna a thuak zawh khit ciangin Topa in a it mite a ciamna bangin nuntakna kumpi lukhu a ngah ding hi.

Tedim Bible Revision 2017

¹² A hoih takpi mah hiam, ci-in sinna a thuak ciangin a nang zote a hampha mahmah ahi hi. Tua bangin a nang zote in, amah a itte tungah Pasian in a piak dingin a ciam nuntakna lukhu a ngah ding uh hi.

Jeim 1:12 Referans Kwoze

1 PETER MASA 5:10

Khazih hangin note, ama vangliat tawntung minthan’na ah hong sam, hehpihna thupha khempeuh’ Pasian in tawlkhat gimna na thuak khit uh ciangin, hong cingsak, hong kipsak, hong khauhsak ding hi.

Mangmuhna 2:10

Nang in na thuak ding lai takte kihta kei in. Ze-etna na thuak nadingun note kimkhat Dawimangpa in thong sungah hong khia-in, note in nisawm sung gimna na thuak ding uh hi. Nangmah in sihna na thuak dongin thumanin om in. Tua hi leh, nuntakna kumpilukhu nang kong pia ding hi.

Jeim 5:11

En un, a thuak zo mite in thupha a ngah mite a hi uh ci-in i gen hi. Job’ thuakna thu na za zo uh hi. Pasian in ama thu a zawh khit ciangin a hehpih theih mahmahna thu zong na thei zo uh hi.

ROM (Romans) 8:28

Pasian a it mite ahi uh, a geelna banga a sap mite adingin na khempeuh in hoih nadingin a piang uh hi cih i thei hi.

Mattiu 10:22

Keima min hangin, mite khempeuh in note hong mudah ding uh hi. A tawp dongin a thuak zote in gupna a ngah ding uh hi.

1 KORIN MASA 9:25

Pawikhamna sungah a kidemte khempeuh in na khempeuh ah a pumpi uh a kham cip thei uh hi. Tuate in a vulgawp thei pahtakna lukhu a ngah nop manun a kidem uh hi. Eite i hih leh, a vul thei lo, a sia thei lo pahtakna lukhu ngah nadingin i kidem hi.

1 PETER MASA 3:14

Thuman thutak hangin gimna na thuak uh leh, thupha na ngah ding uh hi. Amaute’ tawn’na na lau kei un, na lungmang kei un.

2 TIMOTI NIHNA 4:8

Tu-a kipanin dikna lukhu, keimah ading a kikoih khol zo hi. Tua Ni ciangin thuman tawh a khenpa in tua lukhu kei hong pia ding hi. Keimah bek hong pia kei ding hi, ama kilat ding thu a lamente khempeuh zong a pia ding hi.

Jeim 2:5

Ka it ka u ka naute aw, ngai un. Leitung mite mai-ah mizawngte in upna tawh a dim nading ahi zongin, Pasian in a it mite a thuciamna gam a luah nading ahi zongin, tua mite a teel hilo ahi hiam?

1 PETER MASA 5:4

Tua bang ahih leh, Tuucing Ukpa hong kilat ciangin note in, a vul thei lo vangliatna lukhu na ngah ding uh hi.

1 KORIN MASA 2:9

Lai Siangtho sungah a kigelh mah bangin: “Pasian a itte adingin Pasian bawlsate in, mittang tawh kimu lo, bil tawh kiza lo, mite’ lungsim sungah a tum lo nate ahi hi,” a ci hi.

Thu-hilhkikna 8:2

A thupiakte na zui uh hiam na zui kei uh hiam cih a theih nadingin note hong niamkhiatin na lungsim uhah bang om hiam cih a theih nadingin Topa na Pasian un gamlakah hih kum sawmli sung note hong paipihna lampi khempeuh na ciamteh ding uh hi.

Paunak 17:3

Kham leh ngunte, mei sungah kize-et a, mihingte’ lungsim, Topa in ze-et hi.

Zekhariah 13:9

Tua a suakta seh khatte pen, meikhukah ngun a kisian’sak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ hong ngetna ka pia ding hi. Keima mi ahihna uh, amaute tungah ka gen ding a, amaute in, kei pen, amau’ Pasian ka hihna thu, a kam uh tawh pulak ding uh hi,” a ci hi.

Mangmuhna 3:21

Keimah in ka zawh khit ciangin ka Pa tawh tokhom tungah ka tut khawm bangin, a zo mi in kei tawh ka tokhom tungah tut khawm theihna thu ka pia ding hi.

1 PETER MASA 4:13

Note in Khazih’ gimna a zom na hih uh ciangin ama minthan’na hong kilat ciangin lungdam mahmahna tawh na nuam nadingun, tu-in zong nuam un.

1 KORIN MASA 8:3

Mikhat in Pasian a it leh, Pasian in tua mi a thei hi.

Mangmuhna 3:19

Ka it khempeuhte a mawhna uh lakin ka hilh thei hi. Tua ahih ciangin lungsim citak-in kisikkik in.

Thu-hilhkikna 13:3

tua kamsangpa ahi a, mang manpa thu ahi zongin na ngai kei ding uh hi; bang hang hiam cih leh Topa note’ Pasian na lungsim khempeuh uh leh na nuntakna khempeuh uh tawh na it uh hiam cih a kitheihna dingin, Topa na Pasian un no hong ze-etna ahi hi.

Hebru 10:32

Note khuavak sungah na tun’ khit uh ciangin mite mai-ah kisiatna, bawlsiatna thuakin, tua bang a thuakte tawh kipawl khat na hi uh ahi zongin, gimna lian mahmahte dona, nidang lai-a na thuak uh na ngaihsun un.

Late 119:71

Nangma ngeina kipte ka sin theih nadingin gimna ka thuak pen kei’ adingin hoih mahmah hi.

Thu-hilhkikna 7:9

Tua ahih ciangin Topa na Pasian uh Pasian hi a, amah itin a thupiakna a zuite tungah khang tul khat dongin thuciamna leh itna kip lenin a thuman Pasian,

Hebru 6:15

Tua mah bangin Abraham in thuakin a ngak khit ciangin a thuciamna bangin a ngah hi.

Mattiu 25:34

Tua ciangin a ziatlamah a omte kiangah Kumpipa in, ‘Ka Pa kiangah hehpihna ngahte aw, leitung pian’cil akipan, note ading a kibawlkholsa Gamah hong pai un la hong luah un.

Late 119:67

Dan nong piak ma-in lam ka pial thei zel-a, ahih hangin tu-in na thu ka zui hi.

Nehemiah 1:5

Ka thungetna-ah, “Aw vantung Pasian, Topa, nang hong itin na thupiakna a zuite tungah na thuciamna lim takin a zui, a lian a kihtak-huai Pasian aw,

Hebru 11:17

Abraham in ze-etna a thuak ciangin upna tawh Isaak biakna-ah a pia hi. “Isaak tung bekah na suan na khak kici ding hi,” ci-a thupiak kholhna akipan thuciamnate lungdamin a sang mi hi-in, khat bek a neih tapa a pia hi.

Late 119:75

Topa aw, na biakna ngeina kipte man hi ci-in ka thei a, na thumanna hangin kei dan nong pia hi.

1 JOHAN MASA 4:19

Pasian in eite hong it masak maninah eite in amah i it hi.

Isaiah 64:4

Amah in a ngakte’ ading na a sempa’ thu tanglai pek panin kuamah in thei ngei lo, kuama bil in za ngei lo, kuama mit in nang sim loh Pasian dang mu ngei lo hi.

Late 5:11

Ahih hangin nang hong belte khempeuh lungdam sak in la, nuamna la sasak tawntung in; na min a deihte, nangma sungah gualzo-a a lungdam theih nadingin amaute na hu hi.

Paikhiatna 20:6

ahih hangin kei hong it-in ka thupiakte a zui mi a khang tul tampite' tungah itna kip a lakpa ka hi hi.

Hebru 12:5

Tua tham loin: “Ka tapa aw, Topa’ thuhilhna ciamteh loin om kei in, na mawhna hong teldot ciangin lungkia kei in.

JOB (Job) 5:17

Pasian in a taii mite minuamsa hizaw ahih manin, Vanglianpa’ taiina thupisan’ in.

Late 94:12

Topa aw, migilote’ adingin gum khat a kitawh hun matengin, haksat hun a tawlngak theih nadingin na thukham na hilh mi, na thuhilh mi in mi nuamsa ahi hi.

Piancilna 22:1

Hih thute khit ciangin Pasian in Abraham ze-et a, ama kiangah, “Abraham!” ci hi. Amah in, “Hiah om ing,” ci hi.

JOB (Job) 2:10

Ahih hangin amah in a zi kiangah, “Numei haite’ kampau bangin na pau hi. Pasian’ tung panin a hoih sang i hih ciangin siatna zong sang lo ding i hi hiam?” a ci hi. Hih thu khempeuh ah Job in a kampau nangawnin khial lo hi.

Late 11:5

Topa in midikte leh migilote en tel a, a ngongtat nuam mi a lungsim in mudah hi.

Luka 6:22

Mite in Mihing Tapa hangin note muhdah uh a, hong hawlkhiat uh a, hong kosiat uh a, na min uh hong siatsak ciangin, thupha na ngah ding uh hi.

ROM (Romans) 5:4

Thuakzawhna in teci kilatsakna a piangsak hi. Teci kilatsakna in lawpna a piangsak hi.

2 TIMOTI NIHNA 2:15

Nangmah in zumhuaina om loin thuman thutak a man takin a khen theipa na suah nadingin Pasian mai-ah a deihhuai mi suakin, na pumpi na piak nadingin ah hahkat in.

1 PETER MASA 4:14

Khazih’ min hangin kosiatna na thuak uh leh, thupha na ngah ding uh hi. Bang hang hiam na cih uh leh, minthan’na tawh kipawl kha ahi Pasian’ Kha Siangtho in note tungah a om hi.