Isaiah 9:19 - Tedim Bible

¹⁹ Vanglianpen Topa’ hehna hangin meikuang bangin gamsung kang a, mite pen mei-a kicih sing tawh kibang uh hi; kuamah in a sanggampa zahtuan lo hi.

Tedim Bible Revision 2017

¹⁹ Vanglian Topa’ hehna hangin meikuang bangin gam sung kaang a, mite pen mei a kicih sing tawh kibang uh hi. Kuamah in a sanggampa nangawn zah tuan lo hi.

Isaiah 9:19 Referans Kwoze

Micah 7:2

Leitungah mihoih teng bei khin ta a, Pasian tungah a thuman mi kuamah om nawn lo hi. Mi khempeuh in mi thah ding bek ngaihsun uh a, a kuamah peuh in a sanggampa ngen tawh beng hi.

Micah 7:6

Tu hunin tapate in pate hai bawlin, tanute in nute langpan’ uh a, mote in a teeknu uh lang neih uh hi. Mi khat adingin ama innkuanpihte mah a gal suak mawk hi.

2 PETER NIHNA 2:4

Bang hang hiam na cih uh leh, Pasian in a khial vantungmite pammaih sa loin, hel khua sungah a khiat khit ciangin thukhen Ni dongin khuamial khuk sungah a khum hi.

Sawltak 2:20

Topa’ Ni vanglian leh lamdang hong tun’ ma-in Ni hong mial ding a, Kha in sisan a suak ding hi.

Mattiu 27:45

Sun laitak nai sawm leh nai nih pan a kipan, nai thum dongin leitung khempeuhah khua mial hi.

Amos 5:18

Topa’ ni hong tun’ ding a ngaklah note’ adingin, bangzahin lauhuai ding hiam? Note’ adingin tua ni a hoihna bang om ding hiam? Tua ni in lungzin’ ni hi a, lungtaii ni hi lo hi.

Joel 2:2

Tua ni a mial, a lungzin’ huai ni, meii kai-in khuazin’ ni hi ding hi. Mual tungah meiipi a kai bangin, sim zawh lohin kauphe honpi hong leeng hi. Cik mahin hih bang om ngei nai lo a, cik mah ciangin zong omkik nawn lo ding hi.

Ezekiel 9:5

Tua ciangin Pasian in a midangte kiangah, “Khua sung khempeuh ah amah va zui un la, mi va that un. Kuamah hingkhawi kei un la, kuamah khasiat kei un.

Jeremiah 13:16

Topa in khua mialsak a, khuamialna mual tungah na tuk ma-un na lamet uh khuavak pen khua mial bikbek a suah ma-in, Topa na Pasian uh pahtawi un.

Isaiah 60:2

Khuamial in leitung tuam a, minam dangte khuamial in tuamcip ding a, ahi zongin nangma tungah Topa’ khuavak hong taang ding hi. Ama minthan’na in nang hong ompih ding hi.

Isaiah 24:6

Tua ahih ciangin Topa in leitung samsiatin susia a, a tunga teeng mite in amau’ mawhna hangun kangtum uh hi; tua ahih ciangin leitunga teeng mite tawm semsem hi.

Isaiah 13:18

Amau’ thalte in tangvalte that ding hi; amaute in gil sung pan a, piang naungeekte hehpih lo ding uh hi; amaute’ mit in naupangte khasiat lo ding hi.

Isaiah 13:13

Tua ahih ciangin ama sinso ni-in Vanglianpen Topa’ hehna hangin vantung lau-in ka liingsak ding a, ama omna panin leitung kisingkhia ding hi.

Isaiah 13:9

En un, leitung gamkhing suaksakin, leitung mawh neite a susia dingin gitlohna, hehna leh sinso-na tawh Topa’ ni nasia takin hong tung hi.

Isaiah 8:22

amaute in lei lak a et suk hangun, lungkhamna leh khumialna, lungzing-a gimna bek om hi; khuamial ngeungau sungah amaute kihawlkhia ding hi.

Isaiah 5:30

Tua ni ciangin amaute in tuipi ging bangin Israel tungah ngik ding uh hi. Mi khatpeuh in leitang en leh, khuamialna leh lungzin’na bek om hi; meiite in khua mialsak hi.

Isaiah 1:31

A thahat mipa pen patlom tawh kibang ding a, ama nasepna pen mei-ek suak ding hi; kuamah in phelh zo loin amaute gel kangtum khawm ding uh hi.

Isaiah 3:5

Mite khat leh khat, mi khempeuh in a lawmte ciat, mi khempeuh in a veengte ciat, kinencip gawp ding uh hi; khangnote pen uhamte tungah, migina lote pen miliante tungah kiphasak ding uh hi.

Isaiah 5:24

Tua ahih ciangin, mei in buhkung keute kangtum a, meikuang sungah lopa keute a kattum bangin, amaute’ zung pen muatna hi ding a, amaute’ pak palhte pen leivui bangin van-ah leengto ding hi; bang hang hiam cih leh Vanglianpen Topa’ thu nialin, Israelte’ Siangtho Pa’ thu simmawh uh hi.

Isaiah 10:6

Pasian thu a ngaihsun lo minam leh keimah hong hehsak mite’ neihsa sutin lak sakin, amaute pen konglak buannawng bangin a tuancil dingin amaute sawlin thu ka pia hi.

Isaiah 26:11

Topa aw, na khut kisang lap a, na galte in mu lo uh hi. Amaute, maizumna thuak sak in la, amaute’ adingin na geelsa meite, amaute haltum sak in. Na mite ading na hanciamna thu, na galte tungah kilangsak in.

Isaiah 33:14

Zion-a om mawhnei mite lau uh a, Pasian thu a ngaihsun lo mite lau-in lingcip uh hi. Amaute in, “Pasian’ thukhenna in a kuang tawntung mei tawh kibang hi. Tua bang meikuang kua in thuak zo ding i hi hiam?” ci uh hi.

Isaiah 42:25

Tua ahih ciangin amah in, ama hehna-so leh gal kidonate eite tungah hong tungsak hi. Israel mi khempeuh lakah mei bangin ama hehna hong kuang a, ahih hangin eite in bangmah i thei kei hi. Tua i thuakna hangin bangmah i phawk khia thei tuan kei hi.

Ezekiel 20:47

Leitaw lam tulakte kiangah thu gen in la, Topa’ thugen ngai un. Topa Pasian in hih bangin ci hi: ‘En un, tu-in gam hal a kipan ding ka hi a, na sunga om singkung a hing, a keu-in kangtum mang ding hi. Kuamah in tua meikuang phelh zo lo ding hi. A taw panin a khung dongin kangtum mang ding hi.

Joel 2:3

A madawkte in a haltum thei meikuang bang a, a nungdalte in mei-am alh tawh kibang hi. Amau’ hong tun’ ma-in gam sung teng Eden huan bang hi a, amau’ khit ciangin a kinusia a keugawp gam tawh kibang hi. Amaute kiang pan a suakta bangmah om lo hi.

Obadiah 1:18

Tua ciangin Jakob innkuante mei ahi ding uh a, Josef innkuante meikuang ahi ding uh hi. Esau innkuante niinpa ahi ding uh a, amaute in a hal ding uh hi. A kangtum khin ding uh a, Esau innkuante khat beek a suakta kei ding uh hi. Bang hang hiam cih leh Topa in a gen zo hi.

Zekhariah 11:6

Tua ahih ciangin hih gam-a a teeng mite ka hehpih nawn kei ding hi. Amaute a ukpa leh a kumpipa’ khut nuai-ah mi khempeuh ka koih ding hi. Gam uk mite in gam sung teng susia gawp dinga amau’ suksiatna panin kuamah ka honkhia kei ding hi,” hong ci hi.

Malakhi 4:1

Vanglianpen Topa in hih bangin ci hi: “En un, mi kiphasak khempeuh leh migilo khempeuh, a zung a hiang cih om loin buhtu bangin a kattum ding hun hong tung ding hi. Tua ni ciangin khat zong suakta loin a vekpi-in kangtum khin ding uh hi.

Siampi Laibu 26:26

Keimah in note’ nuntakna an ka suksiat ciangin, nupi sawm in meibung khat sungah na anlum uh em ding a, na anlum uh a tawi tehin hong pia kik ding hi; note in na ne ding uh a, na kham zo kei ding uh hi.

Zekhariah 11:9

Tua ciangin kei zong tuuhonte kiangah, “Note ka hong cing nawn kei ding hi. A si ding teng si un la, a kisusia ding teng siacip un. A om lai sun teng khat leh khat kisanek un,” ka ci hi.