Isaiah 64:7 - Tedim Bible

⁷ Tua ahih ciangin nangmah hong pom dingin a hanciam tawm, nangma min a lo kuamah om lo hi; bang hang hiam cih leh kote kiang panin nang in na maitang na seel a, mawhna khut sungah kote nong pia hi.

Tedim Bible Revision 2017

⁷ Tua ahih ciangin nangmah a hong pom dingin a hanciam tawm, nangma min a lo kuamah om lo hi. Bang hang hiam cih leh kote kiang panin nang in na maitang na seel a, mawhna khut sungah kote na hong pia hi.

Isaiah 64:7 Referans Kwoze

Ezekiel 22:30

Keimah in ka hehna tawh ka suksiat ding hun ciangin kulh a ciang zo ding, kulh a kicipna munah a ding zo ding, leh gamsung a hu zo ding mi khat amaute lakah ka zong a, ahi zongin tua bang ding mi khat beek ka mu kei hi.

Hosea 7:14

Amaute in lungsim takpi tawh kei tungah huhna hong ngen lo uh a, a lupna tung panun phunphun bek uh hi. An leh leenggahzu hong ngen loin milimte a bia uh hi. Amaute in kei hong lehdo uh hi.

Isaiah 59:16

Amah in kuamah mu lo-a, nenniamna a thuak mite a huh ding mi khat beek a om lohna mu hi. Tua ahih ciangin amaute a honkhia ding, leh a dikna a kip nadingin ama khut a zang ding hi.

Hosea 7:7

A heh luatna uh tawh amau a ukte that lum uh hi. A kumpite uh khat khit khat a ban banin kithat a, ahi zongin kuamah in kei kiangah huhna hong ngen lo uh hi.

Isaiah 59:2

ahih hangin note’ mawhnate in note leh na Pasian uh kikhenna piangsak a, amah in hong zak theih loh nadingin na khialhnate un ama maitang liah hi.

Isaiah 54:8

Heh luatna hangin tomno sung nang kiang panin ka maitang ka seel a, ahih hangin tawntung itna tawh nang tungah hehpihna kong nei kik ding hi, nangmah hong Tankhia Topa in ci hi.

Isaiah 50:2

Bang hangin, kong pai ciangin mi khat zong om lo ahi hiam? Kong sap ciangin hong dawng ding khat zong om lo ahi hiam? Hong hon zo lo zah dingin ka khut tom lua ahi hiam? Tua ahih kei leh note khahkhiatna ding thahatna nei lo ka hi hiam? En un, keima taiina tawh tuipi ka keusak a, gunte pen sehnel gam ka suaksak hi; tui om loh manin a ngasate uih a, dangtakin si uh hi.

Isaiah 27:5

Tua ahih kei leh keima hutna sungah amaute om hen la, amaute in kei tawh kilemna bawl-in, amaute kei tawh kilem ta uh hen.”

Hosea 5:15

Ka mite in a mawhna hangun gimna thuakin kei hong zon’ kik mateng ka tuaci nusiat phot ding hi. A lungkham uh ciangin kei hong zong ding uh a,

Ezekiel 24:11

Tua ciangin a taubeel hawm mei-am tungah suang un la, sansak veva un. Tua hi leh a kang-op nin teng kangtumin hong siang kik ding hi.

Jeremiah 9:7

Tua ahih manin a vanglian Topa in a cih-inah: “En un, amaute a sian’tho nadingun ka suangtui dinga ka ze-et ding hi. Tua lo ka mite bang ka cih nawn ding hiam?

Isaiah 59:4

Kuamah in thutang tawh thu na nei kei uh a, thuman tak tawh kuamah thukhen zumah na pai kei uh hi; note in bangmah lopi suan’in nei-in zuau thu na gen uh a, siat nading thu ngaihsunin, gitlohna na piangsak uh hi.

Isaiah 57:17

Amau’ huaiham-mawhna hangin ka heh a, ka heh lungsim tawh amaute daan pia-in ka mai ka sel hi. Ahih hangin amaute a lungsim khauhin, a gamtat ngei bangun gamta veve uh hi.

Isaiah 56:4

Bang hang hiam cih leh Topa in hih bangin ci hi: “Keima sabbath nite tangin, kei hong lungdamsak thei nate teel a, ka thuciamna a lenkip a kiget mite tungah,

Isaiah 1:15

Thu ngenin na khutte uh nong zaak uh ciangin note kiang pan ka mai ka seel ding a, thu tampi na nget uh hangin, ke’n ka ngai tuan kei ding hi; bang hang hiam cih leh note’ khut in sisan tawh kidim hi.

Late 14:4

Topa’ tunga a ngen lo, an nek bang a ka mite a netum, siatna a bawlte in theihna nei lo ahi hiam?

JOB (Job) 8:4

Na tate ama tungah khial a, amau’ mawhna amaute a tuaksak hi.

Paikhiatna 32:12

Bang hangin Izipt in, ‘Mual tungah amaute a that ding leh leitung panin amaute a beisak dingin siatna ngaihsutna tawh amah in amaute paikhiatpih hi,’ ci ding ahi uh hiam? A kihtak-huai na hehna daaisak in la, na lungsim khelin na mite' tungah hih siatna tungsak kei in.

JOB (Job) 10:9

Leivui panin kei nong bawlna phawkkik in; leivui mah-in hong dengvui kik ding na hi hiam?

Late 100:3

Topa pen Pasian a hihna thei un! Eite hong bawlpa in amah hi a, eite in ama aa i hi hi; eite in ama mi i hi a, ama gan khahna sunga a tuute i hi hi.

Isaiah 45:9

“Amah a Bawlpa tawh a kido mipa, beel seekpa tawh a kido lei beel in gimna ngah ta hen! Tungman in amah a seekpa kiangah, ‘Nang in bang bawl na hi hiam, na nasep in khut nei lo hi,’ ci-in a thu sel ngam ahi hiam?

Isaiah 63:16

Bang hang hiam cih leh, Abraham in kote hong huh loin, Israel in kote hong phawk loh hangin, nangmah in kote’ Pa na hi hi; Topa aw, nangmah in kote’ Pa na hi a, nangmah in tanglai pek pan kote hong Tankhia-pa na hi hi.

Malakhi 1:6

Vanglianpen Topa in siampite tungah hih bangin hong ci hi: “Tapa in a pa zahtak a, nasempa in a topa kihta hi. Keimah in na pa uh hi napi, bang hangin hong zahtak lo a, na Topa uh hi napi, bang hangin hong kihta lo na hi uh hiam? No siampte in kei hong simmawh napi-in, ‘Bang hong ci simmawh ka hi uh hiam?’ na ci lai uh hi.

Malakhi 2:10

Eite khempeuh in, eite a hong piangsak Pasian ahi pa khat bek nei hilo i hi hiam? Tua hi napi-in bang hangin eite khat leh khat tungah citak loin, i pu i pate tawh a bawl, Pasian’ thuciamna palsat i hi hiam?