Isaiah 61:3 - Tedim Bible

³ amaute pen a thuman mite kici-in, amah a kiminthan’sak theih nadingin Topa’ suan kungte a kicih theih nadingin, Zion ah a om a dah mite tungah vut tawh kibuak a, lukhu khuk tangin a hoih kumpi lukhu khuksak nading, tauna tangin lungdamna sathau nilhsak theih nading, a lunggimna tangin Pasian phatna puan a silh theih nadingun amah in kei hong sawl zo hi.

Tedim Bible Revision 2017

³ amaute pen a thuman mite kici-in, amah a kiminthansak theih nadingin Topa in a mite kem hi, a kicih theih nadingin Zion ah a om a dah mite a lungdam nading, a lungkham mite in phatna la a sak theih nading, a lunggim mite in Pasian a phat theih nadingin amah in kei hong sawl zo hi.

Isaiah 61:3 Referans Kwoze

Late 30:11

Topa ka Pasian aw, nangma tungah lungdamna kong koh tawntung theih nading, ka lungsim in nang hong phat theih nading, a dai om mawk loh nadingin, ka thuumna ka taunate lamna tawh nong heisak a, dahna lim ahi ka puanhampi hong suahsakin nuamna nong guan hi.

Johan 16:20

Ke’n aman takpi kong cih-inah, note kapin na kiko ding uh hi. Leitung mite ahih leh, a lungdam ding uh hi. Note na dah ding uh hangin, na dahna uh lungdamna a suak ding hi.

Isaiah 61:10

Topa hangin nakpi takin ka lungdam ding a, ka Pasian hangin kipakin ka diang ding hi; bang hang hiam cih leh zipipa in a lu kizemin, mo thaknu a suangmanphate tawh a kizep mah bangin amah in hotkhiatna puan kei hong silhsakin, thumanna puanpi tawk kei hong tuam khin hi.

Thuhilh-sia 9:8

Na puante siangin paaksak tawntung in la, na sam gumsak ngei kei in.

Late 45:7

thumanna deihin gitlohna na mudah hi. Tua ahih ciangin Pasian ahi, nangma Pasian in, na gualpihte tungah kikhaito-in lungdamna sathau tawh nang hong nilh zo a,

1 PETER MASA 2:9

Note na hih uh leh, khuamial sung pan a lamdang khuavak sungah a hong sampa’ vanglian hehpihna na lahkhiat nadingun, a hong teel mi pawl, man’na nuam a nei siampi pawl, mi siangtho pawl, Pasian in a uk, a neih mi pawlte na hi uh hi.

Late 23:5

Ka galte omna mai-ah kei’ ading an nong lui hi; ka lu sathau nong nilh a, ka hai a dimlet hi.

1 KORIN MASA 6:20

Bang hang hiam na cih uh leh, man tawh a kilei zo na hi uh hi. Tua ahih ciangin na pumpi sung uhah Pasian na phat un.

Zekhariah 3:5

Tua ciangin a sawltak vanmite thu pia a, Joshua’ lu tungah dial siangtho a khipsak ding uh sawl hi. Topa’ vantungmi tua munah a din’ sung mahin, amaute in zong Joshua, dial siangtho khimsakin, tua khit ciangin puan siangtho zong silhsak uh hi.

Mattiu 5:16

Tua mah bangin, midangte in na gamtatna phate a muh uh ciangin, vantungah a om na Pa uh Pasian’ min a phat nadingun, na khuavak uh mite mai-ah na tangsak un.”

Esther 8:15

Tua ciangin kumpi puansan leh a kang silhin, kham tawh kibawl kumpi lukhu lianpi khu-in, saihadial puan neel leh puansan silhsa-in kumpipa’ omna panin Mordekai paikhia hi; tua ciangin Susa khuapi sunga mi khempeuh lungdamin awng uh hi.

1 PETER MASA 4:14

Khazih’ min hangin kosiatna na thuak uh leh, thupha na ngah ding uh hi. Bang hang hiam na cih uh leh, minthan’na tawh kipawl kha ahi Pasian’ Kha Siangtho in note tungah a om hi.

Luka 15:22

Ahih hangin a pa in, ‘Puan hoih bel hong la meengmeeng un la, silhsak un. Ama khut ah zungbuhte hong butsak un.

Esther 9:22

Tua nite pen Judah mite a galte uh tung panin a suahtak ni, dahna leh thuumnate lungdamna leh lungnopna a suah kha ahi hi. Tua ahih manin amaute in pawi bawl ni leh lungdam ni-in nei-in, anlimnono khat leh khat kikholh ni leh mi zawngte tungah letsong piak ni-in a zat dingun thupia hi.

Johan 15:8

Note in tampi na gah uh leh, ka Pa’ minthan’na na kilangsak ding uh a, note in ka nungzuite na hi takpi ding uh hi.

Late 104:15

mihing lungsim a nuamsak ding leenggahzu, a maitang a zolsak ding sathau, mihing lungsim a hatsak ding an na piangsak hi.

Isaiah 12:1

Ni khat ni ciangin mite in, “Topa aw, kei’ tungah na heh hangin na hehna dam a, nangmah in kei hong hehnem na hih manin nang kong phat ding hi.

Mattiu 15:13

Zeisu in, “Vantungah a om ka Pa in a suan loh kung khempeuh kibotkhia ding hi.

1 KORIN MASA 3:9

Bang hang hiam na cih uh leh, kote in Pasian tawh nasem khawm mi ka hi uh a, note in Pasian’ huan, Pasian’ inn na hi uh hi.

Hebru 1:9

Nang in dikna thu na deih a, Gitlohna thu na mudah hi; Tua ahih ciangin nangma Pasian ahi Pasian in, Nangma lawmte khempeuh sangin Nang hong pahtawi zaw-in, Lungdamna sathau tawh hong nilh zo hi,” a ci hi.

Late 149:4

Bang hang hiam cih leh ama mite tungah Topa lungdam a, miniamte gualzo sakin a pahtawi hi.

Isaiah 26:2

Upna ah a kip thuman minamte a lut theih nadingin kulh kongpite hong ta un.

Isaiah 44:23

Vantungte aw, Topa in tua thu sem khin ahih manin lungdam in la sa un; Anuai-a om leitung aw, awng un; mualte aw, la sa-in awng khia un, tulak leh a sunga sing om khempeuh aw, awng un! Bang hang hiam cih leh Topa in Jakob tankhia khin a, Israel sungah amah kiminthangsak ding hi.

Isaiah 46:13

Ka dikna kong tungsak ta a, gamla nawn lo hi; ka hotkhiatna zekai lo ding hi; keima minthan’na ahi Israel adingin, Jerusalem ka honkhia ding hi.”

Isaiah 52:1

Zion aw, khanglo in, khanglo in la, na tha khauhsak in; khuapi siangtho Jerusalem aw, na puan hoihte silh in; bang hang hiam cih leh vun ki-at lo mite leh a nin mite nang sungah hong pai nawn lo ding hi.

Jeremiah 31:13

Tua ciangin nungakte laam-in a lungdam ding uh a, tangvalte leh papite zong a nuam ding uh hi. Amaute’ kahnate lungdamna ka suaksak ding a, hehpihin a dahnate uh kipahna ka suaksak ding hi.

Ezekiel 34:29

Amaute tungah logam hoih pia ding ka hih manin gam sungah gilkial dangtak om nawn lo ding hi. Minam dangte in amaute simmawh bawl nawn lo ding uh hi.

Ezekiel 47:7

tua lai mun ka tun ciangin a gun lang nih tuakah singkung tampi tak a po ka mu hi.