Isaiah 51:3 - Tedim Bible

³ Bang hang hiam cih leh Topa in Zion hehnem ding hi; a kisia ama munte khempeuh puah pha-in, ama gamlakte Eden huan ka bang sak ding a, a kizang thei lo ama gamte Topa’ huan ka bang sak ding hi; ama sungah lungdamna leh kipakna, lungdam kohna leh la sakna aw om ding hi.

Tedim Bible Revision 2017

³ “Tu-in Zion ka hehnem ding hi. A kisia ama munte khempeuh puahpha-in, ama gamlakte Eden huan sung ka bangsak dinga, ama sehnel gamte Topa’ huan ka bangsak ding hi. Ama sungah lungdamna le kipahna, lungdamkohna le lasakna awging om ding hi.

Isaiah 51:3 Referans Kwoze

Isaiah 49:13

Vantung aw, lungdamin la sa un, leitung aw, lungdamin diang in; mual liante aw, lungdamin la sa-in awng khia un! Bang hang hiam cih leh Topa in ama mite hehnem ta a, gimna a thuak ama mite hehpih ding hi.

Isaiah 52:9

A kisia Jerusalem munte aw, lasa-in kiko khawm un; bang hang hiam cih leh Topa in ama mite hehnem ta a, Jerusalem tankhia khin ta hi.

Joel 2:3

A madawkte in a haltum thei meikuang bang a, a nungdalte in mei-am alh tawh kibang hi. Amau’ hong tun’ ma-in gam sung teng Eden huan bang hi a, amau’ khit ciangin a kinusia a keugawp gam tawh kibang hi. Amaute kiang pan a suakta bangmah om lo hi.

1 PETER MASA 1:8

Tua Topa note in na muh ngeiloh uh hangin na it uh hi. Tu-in zong na muh theih loh uh hangin umin, vangliatna tawh kipawl a kigen thei lo nopna lungsim tawh lungdamin, na kha uh gupkhiatna ahi note upna’ tupna mun na ngah uh hi.

Jeremiah 31:25

Bang hang hiam cih leh a gim mite ka tawldam sak ding a, gil kial a, a tha zawm mite khempeuh an ka vak kham ding hi,” a ci hi.

Piancilna 13:10

Lot zong khuadak a, Jordan gun kuam mun khempeuh in lim takin tui ngahin, Topa’ huan hita leh, Zoar lam-a Izipt gam tawh hita leh kibang hi ci-in mu hi; hih pen Topa in Sodom leh Gomorrah a suksiat hun ma ahi hi.

Isaiah 51:12

“Kei, keimah in note hong hehnempa ka hi hi; lopa bang ahi, a si thei mi, mihing tate lellelte bang hangin kihta na hi uh hiam?

Isaiah 44:26

a nasempa’ thu kip sakin, a kamtaite’ thugente a tangtungsak; ‘Jerusalem khua-ah mi teengin, Judah khuapite kilamkik ding a,, a kisia khuate ka lamkik ding hi’;

Isaiah 25:9

Tua ni ciangin, “En un, amah in eima Pasian hi; eite hong hon dingin amah i muang hi. Amah in eima Topa hi; amah i ngak hi; amah in eite hong gumkhia ahih manin lungdamin kipak ni,” kici ding hi.

Isaiah 12:1

Ni khat ni ciangin mite in, “Topa aw, kei’ tungah na heh hangin na hehna dam a, nangmah in kei hong hehnem na hih manin nang kong phat ding hi.

Late 85:8

Topa Pasian’ thu gen ding hong zasak dih un, bang hang hiam cih leh amah in ama lamah a lungsim uh tawh a kiheite, ama mi siangthote, a mite tungah kilemna thu gen ding hi.

Isaiah 49:8

Topa in ama mite kiangah, “Note hotkhiat ding hun a tun ciangin maipha kong pia ding a, huhna nong ngetna uh kong pia ding hi. Note hong kemin kong hu ding a, note tung tawnin mi khempeuh tawh thuciamna ka bawl ding hi. A kinusia na gam puahpha in a sung uhah, note a luah dingin kong teengsak kik ding hi.

Isaiah 35:6

tua ciangin khebai mipa pen sakhi bangin diangin lam ding a, a pau thei lo mipa in lungdamin la sa ding hi. Bang hang hiam cih leh gamlakah tui hong phulkhia ding a, sehnel gam sungah lui tui hong luang ding hi;

Isaiah 41:16

amaute na haih ding uh a, huih in amaute mutkhia ding a, huihpi in amaute thehthang ding hi. Tua ciangin Topa’ hangin na lungdam ding uh a, Israelte’ Siangtho Pa’ hangin na minthang ding uh hi.

Isaiah 43:19

En un, a thak na khat ka bawl hi; tu-in hong piang khia hi, note in thei lo na hi uh hiam? Gam lakah lam lianpi khat ka bawl ding a, sehnel gam sungah gunte ka bawl ding hi.

Isaiah 49:19

“A kisia, a kinusia nangma munte leh a kisusia nangma gamte in, nangma tunga a teeng mite’ adingin kawcik lua taktak ding a, nang hong valhtum mite pen gamlapi-ah om ding uh hi.

Isaiah 61:10

Topa hangin nakpi takin ka lungdam ding a, ka Pasian hangin kipakin ka diang ding hi; bang hang hiam cih leh zipipa in a lu kizemin, mo thaknu a suangmanphate tawh a kizep mah bangin amah in hotkhiatna puan kei hong silhsakin, thumanna puanpi tawk kei hong tuam khin hi.

Isaiah 65:18

Keima pian’saksa sungah lungdamin kipakin om tawntung un; bang hang hiam cih leh en un, Jerusalem khua lungdamna-in bawlin, a mite lung nuamin ka bawl hi.

Ezekiel 28:13

Pasian’ Eden huan sungah na teeng a, Suangmanpha nam khempeuh tawh na kizem hi. Karnelian, Topaz, leh Jasper, Khisolait, Beril, leh Onik, Safeiros, Karbankel, leh Emerald suangmanphate, nangma kizepna hi a, kham tawh kibawl kizepna tampi zong na nei hi. Hihte khempeuh nangma adingin na suah ni-in hong kibawlsak hi.

Ezekiel 36:11

A mihing a ganhing in kong pungsak ding a, a nidang sangin tam na phazaw ding uh hi. Ta tampi tak na nei ding uh hi. Ni dangin na om ngei bangun kong omsak kik ding a, a nidang sangin a cithei zaw-in kong bawl ding hi. Tua ciangin Topa ka hihna thu na thei ding uh hi.

Ezekiel 36:35

Hih leitang pen gammang tulak a bang ngei hi napi-in tu-in Eden Huan a batna leh a kisusia, a kiluhgawp, a kinusiacip khuapite pen tu-in a muanhuai kulh tawh ki-umin a sungah mi a ten’na thu mi khempeuh in gen belin nei ding uh hi.