Isaiah 49:12 - Tedim Bible

¹² Ka mite a gamlapi panin hong pai ding uh a, leilu lam gam leh nitumna lam gamte panin hong pai-in, pawl khatte, leitaw lam Sinim gam panin hong ciah ding uh hi,” a ci hi.

Tedim Bible Revision 2017

¹² Ka mite a gamlapi panin hong pai ding uh a, leilu lam gam le nitumna lam gamte panin amaute hong pai-in, pawl khatte, leitaw lam Siene gam panin hong ciah ding uh hi,” a ci hi.

Isaiah 49:12 Referans Kwoze

Mangmuhna 11:15

Sagihna vantungmi in peengkul a tum ciangin, “Hih leitung gam in i Topa leh ama Khazih gam a suak zo hi. Amah in a tawntungin a uk ding hi,” ci-in vantungah nakpi-in a genna aw ka za hi.

Mangmuhna 7:9

Tua khit ciangin ka et leh, gam khempeuh, nam khempeuh, pawl khempeuh, kam khempeuh sung panin kuama sim zawh loh mihonpi in tokhom leh Tuuno mai-ah puanpak silhin, a khut uhah nisuh hiang tawi-in a ding uh ka mu hi.

Luka 13:29

Ni suahna lam leh ni tumna lam pan, khang lam leh sak lam panin amaute hong pai ding uh a, Pasian’ Gam sungah a tu ding uh hi.

Mattiu 8:11

Ke’n kong cih-inah, mi tampi in nisuahna lam, nitumna lam panin hong pai-in, Abraham, Isaak leh Jakobte tawh Vantung Gam sungah a tukhawm ding uh hi.

Zekhariah 2:11

Tua hun ciangin Topa kiangah minam tampi hong pai ding uh a, ama mite suak ding uh hi. Topa in note hong ompih ding a, tua ciangin note kiangah kei a hong sawlna thu na thei ding uh hi.

Micah 4:2

Minam tampite hong pai-in, “Jakob’ Pasian’ biakinn, Topa’ mualah va paito ni. Tua lai-ah ama deihna hong hilh ding a, ama deihna bangin i gamta ding hi,” ci ding uh hi. Bang hang hiam cih leh Zion panin thuhilhna hong ging khia a, Jerusalem panin Topa’ thu hong pai khia hi.

Late 72:17

Ama min kip tawntung hen la, ni a om lai teng a minthan’na kip suak hen! Ama hangin mite in thupha ngah hen la, minam khempeuh in amah pen thupha ngahpa, ci ta uh hen!

Late 22:27

Leimong khempeuh in phawkin Topa’ lamah kihei ding uh a, minamte’ innkuan khempeuh in ama mai-ah bia ding uh hi.

Isaiah 45:22

“Leitung mong khempeuhte aw, kei lamah hong kihei un la, hotkhiatna ngah un! Bang hang hiam cih leh keimah in Pasian ka hi a, kuamah dang om lo hi.

Isaiah 49:1

Tuipi kulh gamte aw, ka thu ngai un la, gamlapi-a om mihingte aw, ngai un. Ka suah ma-in Topa in kei hong sam a, ka nu’ sungah ka om lai-in amah in ka min hong phuak hi.

Isaiah 49:18

Na kimkotah khuadak to in la, mu in; na mi khempeuh hong kikhawm uh a, nang kiangah amaute hong ciah uh hi. Keimah in a nungta Topa ka hih mah bangin, na mite khempeuh hangin na kisial ding a, mothak nu in a zat bangin amaute khempeuh kizepna-in na ok ding hi.

Isaiah 55:5

En un, note in na theih loh uh minamte na sam ding uh a, amah in note hong minthang sak zo ahih manin, Topa na Pasian leh Israelte’ Siangtho Pa’ hangin note hong thei lo minamte note kiangah hong tai ding uh hi.

Isaiah 59:19

Tua ahih ciangin nisuahna pan nitumna kikal-a om mi khempeuh in amah zahtakin, a vangliatna kihta ding uh hi. Bang hang hiam cih leh Topa’ huih nung bang, tuipi khang bangin amah hong pai ding hi.

Isaiah 60:4

Na kimkotah khuadak in la, mu in; na mite kikaikhawmin a ciah dingin nang kiangah hong pai uh hi; na tapate gamlapi panin hong ciah ding a, naungek bangin na tanute’ ang sungah hong kipua ding hi.

Isaiah 11:12

Amah in minamte’ adingin lan khat khai ding a, Israel mi a kihawlkhiate kaikhawmin, leitung kiuli panin Judah mi a kikhenthangte kaikhawm ding hi.

Jeremiah 30:10

“Tua ahih manin Topa in kong cih-inah; Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte-uh’ saltan’na panin kong honkhia ding hi. Jakob’ suante hong ciahkik ding uh a, nuam takin a teeng kik ding uh hi. Kuamah in amaute a lausak nawn kei ding hi.

Zekhariah 6:15

Gamlapi-a teeng mite hong pai-in Topa’ inn lam nasep hong huh ding uh hi. Tua biakinn a kilam kik ciangin Vanglianpen Topa in note kiangah kei a hong sawlna thu na thei ding uh hi. Topa na Pasian uh’ thupiaknate cing takin na zuih nak uh leh tu-a ka gen bangin hong piang ding hi.