Isaiah 44:5 - Tedim Bible

⁵ Khat in, ‘Keimah in Topa aa ka hi hi,’ ci-in, a dang khat in Jakob’ min tawh ama min lo ding a, a dang khat leuleu in, ‘Topa aa,’ ci-in ama khut tungah gelhin, Israel min tawh amahmah kinophuah ding hi.”

Tedim Bible Revision 2017

⁵ “Khat in, ‘Kei pen Topa ka hi hi,’ ci-in, a dang khat in Jakob min tawh ama min lo dinga, a dang khat leuleu in, ‘Topa-aʼ, ci-in ama khut tungah gelhin, Israel min tawh a mahmah kinophuah ding hi,” ci hi.

Isaiah 44:5 Referans Kwoze

1 PETER MASA 2:9

Note na hih uh leh, khuamial sung pan a lamdang khuavak sungah a hong sampa’ vanglian hehpihna na lahkhiat nadingun, a hong teel mi pawl, man’na nuam a nei siampi pawl, mi siangtho pawl, Pasian in a uk, a neih mi pawlte na hi uh hi.

Galati 6:16

Hih ngeina a zui mi khempeuh tungah ahi zongin, Pasian’ Israel mi pawlte tungah ahi zongin nopna leh hehpihna om ta hen.

2 KORIN NIHNA 8:5

Tua bang a hih uh ciangin kote lawpna zah tham loin a hih uh a, Pasian deihna tawh kituakin a masa-in Pasian kiangah ahi zongin, kote kiangah ahi zongin, amau mahmah hong kipia uh hi.

Zekhariah 13:9

Tua a suakta seh khatte pen, meikhukah ngun a kisian’sak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ hong ngetna ka pia ding hi. Keima mi ahihna uh, amaute tungah ka gen ding a, amaute in, kei pen, amau’ Pasian ka hihna thu, a kam uh tawh pulak ding uh hi,” a ci hi.

Micah 4:2

Minam tampite hong pai-in, “Jakob’ Pasian’ biakinn, Topa’ mualah va paito ni. Tua lai-ah ama deihna hong hilh ding a, ama deihna bangin i gamta ding hi,” ci ding uh hi. Bang hang hiam cih leh Zion panin thuhilhna hong ging khia a, Jerusalem panin Topa’ thu hong pai khia hi.

Late 116:16

Topa aw, keimah in nangma nasem ka hi hi; nangma nasem ka hi a, na nasem nu’ ta ka hi hi. Keimah hong kikhihnate nong sutkhiatsak zo hi.

Nehemiah 9:38

Hih thute khempeuh hangin a kip thuciamna khat bawlin lai-in ka gelh uh a, ka uliante uh, ka Levi mite uh leh ka siampite un zong tua lai tungah a min uh gelh uh hi.

Paikhiatna 13:9

Na kam in Topa’ thu kham a gen tawntung theihna dingin hih in na khut tungah lim, na mitte kikalah phawkna khat hi ding hi; bang hang hiam cih leh Topa in a vangliatna khut tawh hih mun panin nang hong paikhiatpih hi.

Jeremiah 50:5

Zion khua lampi a dong ding uh a, tua khua lam maingat-in, ‘Hong pai un. A kimangngilh ngei nawn lo ding tawntung thuciamna khat Topa’ tungah ciam khawm dih ni,’ a ci ding uh hi.

Galati 6:17

Tu-a kipanin kuamah in kei hong nawngkaisak kei hen. Bang hang hiam na cih uh leh, ka pumpi tungah Zeisu’ ciamtehnate ka pua hi.

Jeremiah 32:10

Thukimna lai bawlin, min gelhin, gip khenin, a hong theihpih ding mite zong ka lak khit ciangin tawi khaina-ah sum ka teh hi.

2 KHANG TANGTHU NIHNATE 36:23

“Persia kumpipa Sairas in hih bangin ci hi, ‘Vantung Pasian, Topa in leitung kumpi gam khempeuh kei hong pia khin a, Judah gam sung Jerusalem khua ah ama adingin inn khat ka lamsak ding hong sawl hi. Note lakah ama mi ahi khempeuh, Topa a Pasian uh in ompih ta hen. Inn lam dingin Jerusalem ah amaute paito sak un,’ ci hi,” a ci hi.

Isaiah 2:3

mi tampite hong pai-in: “Hong pai un, amah in ama zia-le-tongte eite hong hilh theih nading leh ama lampite i zuih theih nadingin Jakob’ Pasian’ inn, Topa’ mual-ah paito ni,” a ci ding uh hi. Bang hang hiam cih leh Topa in Zion panin thu hong gen ding a, Jerusalem khua panin Topa’ thuhilhna hong paikhia ding hi.