Isaiah 44:19 - Tedim Bible

¹⁹ A kimkhat meikhuk-ah cihin, a aam tungah moh zong ka em a, sa hang-in ka ne khin zo hi; a om lai teng a kihhuai-in bawl buang ding ka hi hiam? Sing bek khat’ mai-ah kun buang ding ka hi hiam? a ci ding, thu a ngaihsun, theihna leh thu muhna a nei khat beek om lo hi.

Tedim Bible Revision 2017

¹⁹ A kim khat meikhuk ah cihin, a aam tungah moh zong ka em a, sa hangin ka ne khinzo hi. A om lai teng a kihhuai-in bawl buang ding ka hi hiam? Sing bek khat mai ah kun buang ding ka hi hiam, a ci ding, thu a ngaihsun, theihna le thumuhna a nei khat beek om lo hi.

Isaiah 44:19 Referans Kwoze

Thu-hilhkikna 27:15

“Topa adingin a kihhuai ahi, khutsiampa khut tawh a kibawl, a kiseek ahi a, a kisung ahi zongin milim bawlin, mun simtham ah a koih mipa in gimna ngah ta hen,’ ci ding uh hi. Tua ciangin mi khempeuh in dawngin, ‘Amen,’ ci ding uh hi.

1 KUMPI MASATE 11:7

Tua ciangin Solomon in Jerusalem nisuahna lam mual tungah Moab mite’ aa ahi, a kihhuai Khemosh leh Ammon mite’ aa ahi a kihhuai Molek adingin mual tunga biakna khat lam hi.

1 KUMPI MASATE 11:5

Bang hang hiam cih leh Sidon mite’ nusian Ashtoreth, leh Ammon mite’ aa ahi a kihhuai Milkom, Solomon in bia hi.

Hosea 7:2

Amau’ gamtatsiatna khempeuh ka phawk lam tak amaute in ngaihsutin nei kha lo uh hi. Amau’ mawhna in amaute gakcip a, ka muhna mahmah-ah om gige uh hi.

Ezekiel 40:4

Tua mipa in kei kiangah, “Ezekiel aw, tu-a kong lah ding nate, na mit tawh lim takin en-in, na bil tawh lim takin ngai in la, lim takin ngaihsun in. Hih lai-ah nang kong paipihna pen hih thu hang mah ahi hi. Na muh na khempeuhte, Israel mite tungah a gen ding na hi hi,” hong ci hi.

Isaiah 45:20

“Minam sung panin a suakta lai note aw, nomau kikaikhawmin hong pai un la, hong nai un! Amau’ sing milim a pua kawikawi mite in theihna nei lo uh a, a honkhia thei lo pasian tungah thu ngenngen uh hi.

Isaiah 5:13

Tua ahih ciangin thu theihlohna hangin ka mite sal suak uh hi; amau’ mi liante gilkialin si dek uh a, a mihonte uh dangtakin keu uh hi.

2 KUMPI NIHNATE 23:13

Tua ciangin Israel kumpipa Solomon in Sidon mite’ kihhuaina Ashtoreth’ ading, leh Moabte’ kihhuaina Khemosh’ ading, leh Ammon mite’ kihhuaina Milkom’ ading a lam, Jerusalem nisuahna lam Oliv Mual leitaw lam-a om mual tunga biaknate kumpipa in susia hi.

Thu-hilhkikna 32:46

amaute kiangah, “Hih thu khempeuh lim takin a hih theih nadingun na tate uh tungah na hilh theih nadingun, tu ni-a note tungah kong piak thu khempeuh na lungsim uhah koih un.

Paikhiatna 7:23

Faro kihei-in a inn sungah pai a, amah in a lungsim nangawnah tua thu ngaihsutin nei nawn lo hi.

Haggai 1:5

Tu laitak-a na omzia uh lim takin ngaihsun un.

Isaiah 46:8

“Thu a palsat mite aw, hih thu phawkin ngaihsun un la, lungngai pha un.

2 KUMPI NIHNATE 23:14

Tua ciangin amah in a khuampite satkhamin, Asherah milimte phuk a, mihing guh tawh a dim tua munte a vuk hi.

Isaiah 44:18

Amaute in bangmah thei lo, amaute in bangmah khentel thei lo uh hi; bang hang hiam cih leh amaute in bangmah a muh loh nadingun amah in a mit uh humsakin, bangmah a theih loh nadingun a lungsim uh khaksak hi.

Isaiah 66:3

“Biakna-in bawngtal a gopa in mihing zong that hi; biak piakna-in tuuno a gopa in ui ngawng zong tan hi; an tawh biak piakna a bawlpa in vok si zong pia hi; paknamtui tawh phawkna biak piakna a bawlpa in milim zong bia-in thupha pia hi. Hih mite in amau’ ut bang ciatin gamta uh a, amau’ kihhuai gamtatna uhah nuam sa uh hi.

Hosea 4:12

Ka mite in aisanin sing them peuh thu dotin nei uh a, amau thu theih nopte, ciangkang peuhin gen tazen hi. Amaute in kei hong taisan uh a, a paktat numei bangin pasian dangte zuan uh hi.