Isaiah 43:6 - Tedim Bible

^6-7 Keimah in leilu lam kiangah, Pia khia un, leitaw lam kiangah, Len nawn kei un; keima pian’sak ka bawlsa, keima minthan’ nading a, ka bawl, keima min tawh a kilote khempeuh ahi, ka tapate gamlapi panin, ka tanute leimong panin hong paipih un, ka ci ding hi.”

Tedim Bible Revision 2017

^6-7 Keimah in leilu lam kiangah, ‘Pia khia in,’ leitaw lam kiangah, ‘Len nawn kei in; keima piansak ka bawl sa, keima minthan nadingin ka piansak, keima min tawh a kilote khempeuh ahi, ka tapate a gamlapi panin, ka tanute leimong panin hong paipih un,’ ka ci ding hi,” a ci hi.

Isaiah 43:6 Referans Kwoze

Jeremiah 3:14

Hong kilehkik un, a zulhzau ka tate aw, Topa in kong ci hi; bang hang hiam na cih uh leh keimah in note’ Topa ka hi a, khuapi khat panin mi khat ta leh beh khat sung panin nih ta hong la-in, Zion khua-ah kong puak ding hi.

Isaiah 18:7

Tua hun ciangin, amau’ gam gunpi in a phelkhap, a vanglian a gualzo minam, a nai a gamla ah a kikihta mite, a tun sang mi, a ci nel mite kiang panin, Vanglianpen Topa’ min omna mun Zion Mual, Vanglianpen Topa’ tungah letsong hong kipuak ding hi.

Thu-hilhkikna 30:4

A kihawlkhia na mite uh vanmong pekah a om leh zong, Topa na Pasian un tua lai panin note hong khawmin, tua lai panin amah in hong paipih kik ding hi;

Isaiah 45:22

“Leitung mong khempeuhte aw, kei lamah hong kihei un la, hotkhiatna ngah un! Bang hang hiam cih leh keimah in Pasian ka hi a, kuamah dang om lo hi.

Isaiah 49:12

Ka mite a gamlapi panin hong pai ding uh a, leilu lam gam leh nitumna lam gamte panin hong pai-in, pawl khatte, leitaw lam Sinim gam panin hong ciah ding uh hi,” a ci hi.

Isaiah 49:22

Topa Pasian in: “En un, Gentailte tungah ka khut ka laamto ding a, mite tungah ka lim ka lakto ding hi; amaute in a ang sung uhah na tapate tawi-in hong paipih ding uh a, a liangko tung uhah na tanute hong pua ding uh hi.

Isaiah 54:3

Bang hang hiam cih leh taklam leh veilamah nangmah kizeelin, na suan leh khakte in minamte luah ding uh a, a kinusia khuapite mi tawh dim sak ding uh hi.

Isaiah 60:4

Na kimkotah khuadak in la, mu in; na mite kikaikhawmin a ciah dingin nang kiangah hong pai uh hi; na tapate gamlapi panin hong ciah ding a, naungek bangin na tanute’ ang sungah hong kipua ding hi.

Isaiah 60:9

Hih teembawte pen, tuipi gei leh tuikulh-a om teembawte hi a, Tarshish teembaw lianpite in hong makaih hi. Topa in nang hong minthangsak khin ahih manin, gamlapi panin tua teembawte in nangma mite hong puak uh a, a ngun a khamte uh tawh hong puak khawm hi. Topa na Pasian, Israelte’ Siangtho Pa Pahtawina-a hong puak uh ahi hi.

Isaiah 66:20

Israel mite in an tawh amau biakpiakna beel siangtho sungah tawi-in Topa’ innah hong paipih uh mah bangin, amaute in minam khempeuhte lak panin Topa’ tungah piak dingin na sanggamte khempeuh uh, sakolte, leengte, taalte, late, kalaoh hatte tungah hong pua-in ka mual siangtho Jerusalem ah hong paipih ding uh hi; Topa in ci hi.

Jeremiah 23:8

‘a hawlkhiatna leilu lam gam leh gam dangte khempeuh panin Israel mite’ suan leh khakte pai khiatpih a, a makaih Topa a nuntak bangin,’ ci-in a kiciam zaw ding uh hi. Tua ciangin amaute, amau’ gamsung mah ah a teeng ding uh hi,” a ci hi.

Jeremiah 29:14

Topa in kong cih-inah, note in nong mu ding uh a, na saltan’na uh hong bei sakin, kong hawlkhiatna gam khempeuh leh mun khempeuh panin kong kaikhawm kik ding a, note kong lak khiatna gam mahah kong tun’pih kik ding hi, Topa in kong ci hi.

Jeremiah 31:8

En un, keimah in leilu lam gam panin amaute ka la ding a, leitung a gamla pen mun panin ka kaikhawm ding hi. Mittawte leh khelbaite zong hong kihel ding uh a, nupi gaite leh nau suak ding numeite-a kipan mi honpi hih lai munah hong ciahkik ding uh hi.

Ezekiel 36:24

Gam khempeuh leh minam khempeuhte lak panin note hong kaikhawm kikin na gam uhah kong tun’pih kik ding hi.

Ezekiel 37:21

amaute kiangah, Topa Pasian in hih bangin ci hi, ci-in gen in: Amaute’ omna minam dangte lak panin Israel mite la-in ka kaikhawm ding a, amaute’ gamah ka paipih kik ding hi.

Joel 3:7

Tu-in amaute na zuakna uh mun, panin a la khia kik ding ka hi a, amaute tungah na bawl bangun note tungah kong bawl ding hi.

Zekhariah 6:6

Sakol vomte in a kaih leeng pen leilu lam Babilon gamah a pai ding hi a, sakol kangte nitumna lam, sakol gialte leitaw lam, sakol sante nisuahna lam gamah a pai ding ahi hi.

Isaiah 11:12

Amah in minamte’ adingin lan khat khai ding a, Israel mi a kihawlkhiate kaikhawmin, leitung kiuli panin Judah mi a kikhenthangte kaikhawm ding hi.

Isaiah 27:13

Tua ni ciangin peengkul lianpi khat kitum ding a, Assiria gam sunga a mangthang mite leh Izipt gam sunga a kihawlkhia mite hong pai-in Jerusalem mual siangtho tungah Topa bia ding uh hi.