Isaiah 42:6 - Tedim Bible

^6-7 “Keimah in Topa ka hi a, thumanna tawh nangmah hong samin, ka khut tawh nang hong lenin kong kem hi; mittawte a vaksak ding, leinuai thong sung panin thongkiate a lakhia ding, thong sung a mialna mun a, a tu mite a lakhia dingin, mite tungah thuciamna ahi ding, Gentailte tungah khuavak ahi dingin nang kong koih khin hi.

Tedim Bible Revision 2017

^6-7 “Kei pen Topa ka hi a, thumanna tawh nangmah hong samin, ka khut tawh hong lenin nang ka hong kem hi. Mittawte a vaksak ding, leinuai thong sung panin thongkiate a la khia ding, thong sung a mialna munah a tu mite a la khia ding, mite tungah thuciamna ahi ding, minam dangte tungah khuavak ahi dingin nang ka hong koih khin hi.

Isaiah 42:6 Referans Kwoze

Luka 2:32

Ka mitin ka mu zo hi,” a ci hi.

Sawltak 13:47

Bang hang hiam na cih uh leh, Pasian’ thupiakna in: ‘Leimong dongin gupna na pian’sak nadingin, Gentailte’ khuavak dingin ka hong koih zo hi,’ a ci hi,” ci-in lau loin a gen uh hi.

Johan 8:12

Khatvei Zeisu in, “Keimah in hih leitung khuavak ka hi hi. Ka nung hong zuite in khuamial lakah pai loin nuntakna khuavak a ngah ding hi,” a ci hi.

Isaiah 49:8

Topa in ama mite kiangah, “Note hotkhiat ding hun a tun ciangin maipha kong pia ding a, huhna nong ngetna uh kong pia ding hi. Note hong kemin kong hu ding a, note tung tawnin mi khempeuh tawh thuciamna ka bawl ding hi. A kinusia na gam puahpha in a sung uhah, note a luah dingin kong teengsak kik ding hi.

Isaiah 49:6

amah in, “Jakob minamte a laamto ding leh ka kepsa Israel mite a ngei uh a bangsak kik ding in keima nasem na hihna pen a baih lua mahmah nasep ahi hi; keima hotkhiatna in lei mong dong a tun’ theih nadingin Gentailte tungah khuavak dingin nang kong pia ding hi,” hong ci hi.

1 PETER MASA 2:9

Note na hih uh leh, khuamial sung pan a lamdang khuavak sungah a hong sampa’ vanglian hehpihna na lahkhiat nadingun, a hong teel mi pawl, man’na nuam a nei siampi pawl, mi siangtho pawl, Pasian in a uk, a neih mi pawlte na hi uh hi.

Isaiah 26:3

Topa aw, nang hong muang a, nangma tungah a lungsim kip mipa, lungnopna kicing na pia ding hi.

Hebru 13:20

A tawntung kiciamna sisan hangin Tuucing lianpa ahi, i Topa Zeisu sihna pan a thokiksak nopna Pasian in,

Hebru 9:15

Tua ahih ciangin thuciamna masa hun lai takin mawhna a tatkhiat nadingin, sihna thuakna om zo ahih ciangin a sap mite in a luah tawntungna tawh kipawl thuciamna ngah nading, tua Topa in thuciamna thak khamna a suak hi.

Sawltak 26:23

Khazih in sihna thuak ding a, sihna pan a thokik masabel ahih ciangin, Judah mipawl leh Gentailte kiangah khuavakna thu a piang ding hi ci-in Moses akipan Pasian’ kamsangte’ thugenna mah kei in behlap loin milian, mineute kiangah teci-in ka pang hi,” a ci hi.

2 KORIN NIHNA 1:20

Thuciamnate in bang zahin a tam hangin Pasian’ minthan’na kilatsak nadingin, “Ahi hi,” cih ding ahi zongin, kote hangin, “Amen,” cih ding ahi zongin ahi hi.

Isaiah 43:1

Ahih hangin, Jakob aw, nangmah hong piangsakpa, Israel aw, nangmah hong bawlpa, Topa in tu in hih bang ci hi: “Nangmah hong honkhia khin ka hih manin lau kei in; na min tawh nang kong sam khin zo a, nang in kei’ aa na hi hi.

Isaiah 42:1

Keimah in ka huh, keima teel, ama sungah ka lungkimna ka nasempa en un; ka Kha tawh amah ka kidimsak a, amah in minam khempeuh tungah thuman tungsak ding hi.

Isaiah 41:13

Bang hang hiam cih leh keimah Topa na Pasian in na khut taklam ka len hi; Lau kei in, nangmah kong huh ding hi,” nang tunga hong cipa in keimah ka hi hi.

Hebru 8:6

Tu-in ahih leh, Zeisu in a phazaw thuciamnate tungah kip-a a kikoih a phazaw thuciam kikhapna ahih mah bangin, tua sang a lianzaw biakna nasepna za a ngah hi.

Hebru 7:26

Tua bang siampi ukpa in siangtho-in, dikin, kihhuaina om loin, mawhneite tawh kikhen khia a, vante sangin a sangzaw munah a tung mi ahih ciangin, eite ading a kilawm hi.

Isaiah 45:13

Thumanna sungah amah khua ka phawksak a, keimah in ama lampi khempeuh ka mamsak ding hi; amah in nasep thaman ahi a, letsong ahi zongin ngaihsun loin keima khuapi lamin sal-a om ka mite khahkhia ding hi,” Vanglianpen Topa in ci hi.

Mattiu 26:28

Bang hang hiam na cih uh leh, hih in mi tampite’ mawhna kimaisak nading a kibuasa, thuciamna thak ka sisan ahi hi.

Isaiah 32:1

En un, ni khat ni ciangin thumanna tawh kumpi khat hong maang ding a, thutan’na tawh uliante in hong uk ding uh hi.

Hebru 7:2

Abraham in a ngah sum khempeuh seh sawm suah seh khat khenin a piak, Salem Kumpipa ahi, Sang Bel Pasian’ Siampi Melkhizedek in, a min bulpi a khiatna pen dikna’ Kumpipa, tua tham loin, nopsakna’ Kumpipa a cihnopna, Salem Kumpipa hi a,

Isaiah 27:3

Keimah, Topa in tua lo hongpa ka hi a, a hun hunin tui ka buak hi. Khatpeuh in a suksiat loh nadingin sun leh zan-in ka hong a,

Isaiah 41:2

A nasem dingin dikna tawh samin, nisuahna pan-a mipa kua in hanthawn ahi hiam? Amah in ama khut sungah minamte piakhia ahih manin, amah in kumpite tuancil hi; amah in a namsau tawh amaute leivui bangin bawl a, ama thal tawh nahpa leeng bang sak hi.

Isaiah 45:1

Kulh kongpite a kikhak loh nadingin ama mai-ah kongkhakte a honsak ding, kumpite’ vangliatnate a lakkhiat sak ding, ama mai-ah minamte a zawh sak dingin, a taklam khut a len, a sathau nilhpa Sairas tungah Topa in hih bangin ci hi:

Jeremiah 12:16

Tua ciangin, ka mite’ omdan hoih takin a sin uh a, Baal min tawh kiciam dingin ka mite a sinsak mah bangun ‘Topa a nuntak bangin,’ ci-a kei’ min tawh kiciam ding a sin uh leh ka mite’ lakah kip takin a om ding uh hi.