Isaiah 34:2 - Tedim Bible

² Bang hang hiam cih leh minamte khempeuh tungah Topa lungham-in, amaute khempeuh tungah heh mahmah a, a siamang dingin amaute koih-in, thah dingin pia khin ta hi.

Tedim Bible Revision 2017

² Bang hang hiam cih leh minam khempeuh tungah Topa lunghamin, amaute khempeuh tungah heh mahmah a, a si mang dingin amaute koihin, thah dingin a pia khinta hi.

Isaiah 34:2 Referans Kwoze

Zefaniah 3:8

Topa in hih bangin thu gen a, “Tua ahih ciangin minamte ka mawhsak ni hun dong kei hong ngak phot dih un. Minamte leh kumpi gamte kaikhawmin, ka hehna ka thuaksak ding, ka lungsim ka khentat khin hi. Ka heh luatna meikuang tawh, leitung khempeuh kangtum ding hi.

Zekhariah 14:3

Tua ciangin Topa hong kuankhia ding a, a beisa hun-a a sim ngei bangin hih minam dangte hong sim ding hi.

Isaiah 30:25

Na galte uh’ tausangte pukin mi tampi a sih ni-in, mualsang leh mual neute tung khempeuh ah lui tui luang ding hi.

Isaiah 13:5

Leitung buppi susia dingin Topa leh ama hehna galhiamte gamlapi van mong panin hong pai hi.

Mangmuhna 20:15

Nuntakna laibu sungah a min om lo mi peuhmah tua mei li sungah a khiasuk hi.

Mangmuhna 20:9

Amaute zanglei tungah a kahtoh khit uh ciangin siangtho giahna phual leh a ithuai khuapi a uum uh ciangin, vantung panin mei kia-in tua mite a valh hi.

ROM (Romans) 1:18

Gitlohna tawh thuman thutak a nial mite a gitlohna tungah Pasian’ hehna in vantung panin hong kilang hi.

Isaiah 10:5

Assiria-te in gimna ngah hen, keima hehna molhtum leh ka lungdamna ciangkhut ahi uh hi.

Isaiah 13:6

Topa’ ni hong nai ahih manin nakpi-in kap un; Vanglian Pa’ kiang panin suksiatna hong tung ta ding hi.

Isaiah 26:20

Ka mite aw, hong pai-in na inn sung uhah tum un la, na kongte uh khak un; hehna a dam matengin tawlkhat sung bu un.

Isaiah 61:2

Topa maipha ngah kum, a galte tungah Pasian phulak ding hun a tun’na thu a gen ding, a thuum mi khempeuh a hehnem ding;

Isaiah 63:6

Ka sin sona tawh mihingte cil-in, ka hehna hangin amaute zu kham ka bang sak a, amaute’ sisan leitungah ka thehthang hi.

Isaiah 65:12

namsau tawh a si dingin kong seh ding a, hong that dingte’ mai-ah na ngawng uh na dawh ding uh hi; bang hang hiam cih leh kong sap ciangin note in nong dawng kei uh a, thu ka gen ciangin nong ngai kei uh hi. Keima thu, man’ loh ding mah na utzaw uh a, a sia na gamta uh hi.

Isaiah 66:14

Hih thu hong piang na muh uh ciangin na lungdam ding uh hi; na guhte uh lopano a hing kilkel tawh kibang ding hi. Tua ciangin ka nasemte tungah ka huhna, leh ka galte tungah ka hehna ka lahna thu na thei ding uh hi, ci hi.

Jeremiah 25:32

“A vanglian Topa in a cih-inah: En un, gam khat panin gam khatah siatna a paipai hi. Leitung a gamlapen mun panin huihpi hong nung hi!

Jeremiah 25:33

“Tua ni-a Topa’ thahlup mite leitung mong khat panin mong khat dongah a kithehthang ding uh hi. Amaute kuamah in a kah kei ding a, kikaikhawm loin kiphum lo ding uh ahih manin lei lakah ek nusiat bangin a kinusia ding uh hi.

Paikhiatna 8:14

Amaute in a lom lomin tuate khawm uh a, gamsung teng uih hi.

Joshua 11:20

Bang hang hiam cih leh Topa in Moses a thupiakna bangin amaute a kisuksiat mang nading leh hehpihna ngah loin a kibeisak theih nadingin Israelte a do nadingin a lungsim uh khauhsak ding Topa’ bawl ahi hi.

Late 2:5

Tua ciangin hehna tawh amau kiangah thu gen ding a, heh luatna tawh amaute linglawng sakin,

Isaiah 66:16

Bang hang hiam cih leh Topa in mei tawh thukhenna sem ding a, a mawh mi khempeuh tungah a namsau tawh thukhen ding hi; Topa in a thah mite tam mahmah ding hi.

Jeremiah 25:31

A awging in leitung mong dongah kithawn ding hi, bang hang hiam cih leh gamte’ lang khatah Topa pang hi. Amah in mi khempeuh thu sit ding a, mi gilote namsau tawh a thatlum ding hi, Topa in ci hi.

Ezekiel 36:5

Topa Pasian ahi keimah in a kimkot-a om minam dangte, leh a diak diakin Edom mite tungah ka heh luatna tawh thu ka gen hi. Amaute in lungdamin nuihna leh simmawhna tawh keima leitang la-in tang uh hi.