Isaiah 33:1 - Tedim Bible

¹ Hong kisusia nai lo, mi a susiapa aw, gimna a ngah ding na hi ta hi. Kuamah in hong khem nai loh mi khempa aw, gimna a ngah ding na hi ta hi. Na suksiat nawn loh ciangin nang hong kisusia ding a, na khem nawn loh ciangin nang hong kikhem ding hi.

Tedim Bible Revision 2017

¹ Hong kisusia nai lo, mi a susia pa aw, tu-in gimna a ngah ding na hi ta hi. Kuamah in hong khem nai loh, mi khem pa aw, tu-in gimna a ngah ding na hi ta hi. Na suksiat nawn loh ciangin nang hong kisusia dinga, na khem nawn loh ciangin nang hong kikhem ding hi.

Isaiah 33:1 Referans Kwoze

Mattiu 7:2

Bang hang hiam na cih uh leh, midangte tungah na khen uh bangin note in thukhenna na thuak ding uh hi. Midangte na piakna uh seeng bangin no zong seengin hong kipia kik ding hi.

Isaiah 24:16

Lei mong a gamla pen pek pan nangawnin “a thuman Pa in vanglian ta hen’ cih la i za ding hi. Ahih hangin keimah in, “Ka lungkham hi, ka lungkham hi. Gimna ngah hi ta ing! Bang hang hiam cih leh mi khemte in khemkhem lai-in sia semsem uh a, khem zawh thu ciam lailai uh hi,” ka ci hi.

Mangmuhna 17:17

Bang hang hiam na cih uh leh, amau lungsim kibang uh ahih theih nading ahi zongin, Pasian’ thute a kicingsak dongin, amaute gam sahang tungah ap ding ahi zongin, amau lungkim ding ahi zongin Pasian in ngaihsutna a pia hi.

Isaiah 21:2

A kihtak huai mangmuhna khat kei tungah hong kigen hi; A lehheekpa in lehheekin a sut thei mipa in sut hi, a susia thei mipa in susia hi. Elam galkapte aw, kuan to un, Media galkapte aw, umcih un; Babilon’ pian’sak ahi, khuisatnate khempeuh Pasian in beisak ta hi.

Isaiah 10:12

Topa in Zion Mual leh Jerusalem khua-ah ama nasep ding teng a zawh khit ciangin, amah in Assiria kumpipa kihisakin a kisialhna leh a kiphatsakna daantat ding hi.

Mangmuhna 13:10

A kiman dingte a kiman ding hi. Mi khatpeuh in namsau tawh midang a thah leh, tua in zong namsau tawh thahna a thuak ding hi. Hih thu-ah misiangthote’ thuakna leh upna a om hi.

Isaiah 17:14

En un, nitakin hong lausak vat a, zingsang ma-in amaute bei ta! Hih bang thute pen, eite hong susia-in eite hong luh gawpte’ thuak ding ahi hi.

Thukhente 1:7

Tua ciangin Adonibezek in, “A khutpite leh a khepi a ki-attan kumpi sawmsagihte in ka sabuai nuai-ah anneng kia tawm ngei uh hi; ka gamtatnasa bangin Pasian in kei hong thuk hi,” a ci hi. Tua ciangin amaute in Jerusalem-ah amah paipih uh a, tua mun-ah amah si hi.

Mangmuhna 16:6

Bang hang hiam na cih leh, amaute in misiangthote’ sisan leh kamsangte’ sisan a bua uh a, amaute sisan na dawnsak zo hi. Amaute zong a dawn dingun kilawm hi,” a cihna ka za hi.

Thukhente 9:23

Pasian in Abimelek leh Shekhem mite kikalah khagilo sawlin kigalneihna omsak hi; tua ciangin Shekhem mite in Abimelek lehdo uh hi;

Isaiah 14:25

Keimah in ka gam sungah Assiria mi ka susia ding a, ka mual tungah ka sikcip ding hi; ka mite’ tung panin Assiriate hakkol, amaute’ liangko panin Assiriate’ vangik kia khia ding hi,” a ci hi.

Isaiah 31:8

“Assiria pen mihing’ namsau ahi lo, namsau khat tawh puk ding a, mihing namsau ahi lo, namsau khat in susia ding hi; namsau panin tai ding uh a, a tangvalte uh zawhthawh thu tawh nasem dingin kikoih ding hi.

Isaiah 48:8

Note pen a lehheek thei na hih lam uh ka thei a, na suah tung uh akipan mi lehdo thei na hihna uh ka thei hi. Tua ahih manin tanglai akipan na bil uh kihong ngei lo a, zong na thei ngei kei uh hi.

Ezekiel 39:10

Amaute in mei cih dingin a kinusia galhiamte nei uh ahih manin gamlakah sing tom kul lo ding a, tulakah sing phuk ding zong kisam lo ding hi. Amaute in amau’ na a sutte’ na sutin, a suksiatsakte’ na suksiatsak ding uh hi. Topa Pasian in thu ka gen khin hi,” hong ci hi.

Paunak 22:23

Bang hang hiam cih leh Topa in amaute pan’pih ding a, amau a bawlsiate tungah phu laksak ding hi.

Zefaniah 3:19

En un, tua hun ciangin no hong bawlsiate, daan ka pia ding a, a khebaite honkhia-in, a kipaikhiatpih mite ka ciahpih ding hi. Amau’ maizumna, minthan’na ka suaksak ding a, mi khempeuh in amaute phat ding uh hi.