Isaiah 30:1 - Tedim Bible

^1-2 Topa in, kei’ ngimna hi lopi-in thu vaihawmna a sem khia, kei’ kha tawh lopi-in kipawlna dang a bawl manun khialhna a bawl thuahthuah; keimah thu hong dong lopi-in Faro’ hutna sung a beel ding leh Izipt’ liahna bukna a zong dingin Izipt gamah paisuk ding a, a kuankhia a genhak naupangte in gimna ngah ta hen!” a ci hi.

Tedim Bible Revision 2017

^1-2 Topa in, “Keiʼ ngimna hi lopi-in thu vaihawmna a sem khia, keiʼ lungsim lopi-in kipawlna dang a bawl manun khialhna a bawl thuahthuah; keimah thu hong dong lopi-in Faroʼ hutna sung a beel ding le Egyptʼ liahna a zong dingin Egypt gamah pai suk dingin a kuan khia, a lehdo mite in gimna ngah tahen.

Isaiah 30:1 Referans Kwoze

Isaiah 65:2

A hoih loin gamta-in, amau’ ngaihsutna bang a zui teitei a genhak mite lam nga-in, sun ni tawntungin ka khut ka zak hi.

Isaiah 1:2

Vantungte aw, za un, leitung aw, ngai un; bang hang hiam cih leh Topa in thu hong gen khin zo hi: “Ka pattahsa tapate in kei hong lehdo uh hi.

Hosea 7:13

Amaute in kei hong taisanin hong lehdo ding uh ahih manin gimna ngahin siatna thuak ding uh hi. Amaute ka hotkhiat nop hangin amaute in kei hong lehgen zawsop uh hi.

ROM (Romans) 2:5

Tua bangin na lungkhauh leh, a kisik nuam lo na lungsim mah bangin Pasian’ hehna leh Pasian’ thuman thukhenna a kilat Ni ciangin na pumpi tungah hehna na khol hi.

Isaiah 63:10

Ahih hangin amaute in amah lehdo uh a, a Kha Siangtho dahsak uh hi; tua ahih ciangin amah pen amaute’ gal suak a, amahmah in amaute a do hi.

Isaiah 29:15

Topa’ kiang panin ama’ thu vaihawmna a seel cip, khuamial sungah a gamta, “Kua in hong mu ding hiam? Kua in hong thei ding hiam?’ a cite in gimna ngah ta hen.

2 TIMOTI NIHNA 3:13

A gilo leh mi kheem thei mite a hih uh leh, gilo semsem ding uh a, midangte kheemin, amau mahmah zong a kikheem ding uh hi.

Ezekiel 3:9

Suang khempeuh sangin a sakzaw, diamond suang zahin a sakin na lungsim kong bawl ding hi. Tua ahih manin hih a lehdo thei mite kihta kei in,” hong ci hi.

Ezekiel 2:3

“Ezekiel aw, kei hong langpan’ in a hong lehdo Israel minamte kiangah nang a hong sawl ka hi hi. A pu a pate uh mah bangin amaute in tu dongin kei hong lehdo uh hi.

Jeremiah 5:23

Ahih hangin hih mite lungsim khauhin hong langpan’ zen uh hi; hong kihei san uh a, hong paisan uh hi.

Isaiah 30:9

Bang hang hiam cih leh amaute pen, a lehdo mite, a zuau thei tapate, Topa’ hilhna thu a ngai nuam lo mite ahi uh hi;

Late 61:4

Na buk sungah hong omsak tawntung ta in! Nangma khate’ hutna sungah lungmuanga om dingin!

Thu-hilhkikna 29:19

Note lakah numei ahi a, pasal ahi a, innkuan ahi a, minam khat ahi zongin, tua minamte’ pasian na a sem dingin Topa i Pasian kiang panin tu ni-in a lungsim a heikhia a om khak ding kidawm un; tua hi kei leh note lakah gu a nei gah kha a gah singkung hong bang ding a, hih kiciamna kammalte za napi-in a lungsim ah amah thupha kipia tawmin, ‘Ka lungsim khauhna tawh ka gamta zongin ka suakta veve ding hi,’ a ci hong om kha ding hi. Hih in mihoih leh misia, a kibangin phiatkhiatna hong suak sak ding hi.

Thu-hilhkikna 9:24

Note kong theih ni-a kipan Topa na lehdo uh hi.

Jeremiah 4:17

Judah gam in kei hong langpan’ ahih manin a galte in lo hongte bangin a kimkot-ah a pang dimdiam uh hi, Topa in kong ci hi.

Isaiah 32:2

Amaute pen, huihpi panin belhna, guahpi panin bukna bang ding uh a, sehnel gam sunga tui luang bangin, nisa gam sunga om suangpi liim bang ding uh hi.

Isaiah 8:12

“Hih mite’ sawmsimna pawlpih kei un. Amaute’ kihtakte kihta kei un la, lau kei un.

Isaiah 4:5

Tua ciangin Zion Mual tung khempeuh leh ama kikhopnate tungah, sun-in meii sungah, zan-in meikuang khu tawh Topa in hong bawl ding a, Topa’ minthan’na tung khempeuh ah a kizal khat om ding hi.

Isaiah 1:5

Bang hangin note hong kisat beh lailai nadingin lehdo teitei na hi uh hiam? Israel aw, na lutang khempeuh liamma dim a, na lungsim leh na ngaihsutna gim mahmah hi.

Hosea 13:2

Tua hi napi-in amaute khial thuah semsem uh a, a biak ding uh milim bawl uh hi. Amau’ ngunte milimin bawl uh a, a hoih takin khutsiamte bawlsak uh hi. Tua ciangin, “Hihte tungah biakna pia un,” ci uh hi. Mihing in milim bia-in nam tazen uh hi.

Isaiah 5:18

Amaute in, “I muh theih nadingin amah manlang sakin, ama nasep kinawh sak ni; Israelte’ Siangtho Pa’ deihna i theihtheih nadingin nai sakin, tung sak ni!” ci-in ganhing kaih bangin khauzen tawh mawhna kai-in, khauhualpi tawh khialhna kai uh ahih manin gimna ngah ta uh hen.

Isaiah 28:20

Bang hang hiam cih leh paunak sungah, khe khuan’ nadingin lupna tom lua a, silh dingin puanza neu lua in nang hong tuam zo lo hi.

Isaiah 28:15

“Eite in sihna tawh thuciamna khat i bawl khin a, Leinuai tawh thukimna khat i nei zo hi; a tuumcip ding tuiciin in hong nawk ciangin ei hong ban lo ding hi; bang hang hiam cih leh zuau thu i beel a, zuauna ah i bu hi,” na ci uh hi.

Isaiah 8:19

Amaute in note kiangah, “Phun suau-suau-in a pau mualmual vankah theite leh aisan theite kiangah thu dong un. Mite in amaute’ pasian thu dongin, mihingte’ thu pen misite dot ding mah hilo ahi hiam?” hong ci ding uh hi.

Thu-hilhkikna 9:7

Topa na Pasian uh gamlakah phin-in na hehsakna uh phawk un la, mangngilh kei un; Izipt gam panin na paikhiat ni uh a, kipan hih lai na tun’ dongun Topa langpan’ in, na lehdo uh hi.

Gamlak-vakna 32:14

En un, Israel mite tungah Topa’ heh luatna a khangsak to lai dingin, khialhna’ tate, na pu na pate uh’ tangin hong khang na hi uh hiam!

Isaiah 1:23

Na uliante, mi lehdote hi a, gutate tawh a kikhawlte ahi hi. Mi khempeuh in sumgolh leh letsong deih uh hi. Amaute in pa nei lote pan’pih lo uh a, meigongnu’ thu amaute in sang lo uh hi.

Isaiah 8:11

Bang hang hiam cih leh Topa in ama vangliatna tawh nakpi takin kei tungah thu hong gen a, hih mite’ lampi ka zuih loh nadingin hong hilhkhol a,

Jeremiah 17:5

Topa in kong cih-inah: Mi bek muangin mi’ hatna bek suanga a lungsim Topa tawh a kilehngat mi in haamsiatna a ngah hi.

Jeremiah 37:7

“Topa ahi, Israel mite’ Pasian in kong cih-inah: Kei tung-a thu dong ding a, hong sawl Judah kumpipa kiangah hih bangin na va gen ding hi: ‘En in, nang hong huh ding a, hong pai Faro kumpipa’ galkapte a gam uhah ciahkik ding uh hi.

Jeremiah 42:19

Tua ciangin Jeremiah in Judah gama a om lai sunte kiangah, “Topa in note’ kiangah, Izipt gamah pai kei un, hong ci hi. Tu ni-in note kong hilh kholhnate tel takin thei un.

Ezekiel 11:2

Pasian in kei kiangah, “Ezekiel aw, hih mite pen khuapi sungah thu hoih lo a gen migilote ahi uh hi.

Ezekiel 24:3

Topa Pasian ahi keimah in amaute’ adingin gentehna-in ka gen ahi hih thugentehna pen a lehdo thei ka mite tungah hih bangin gen in: Mei tungah beel suang in la, a sungah tui a dimin buk in.

Ezekiel 29:16

Israel mite in muan’ leh suan’ in amaute nei kik ngei nawn lo ding uh hi. Iziptte a tuahsiat ciangin a suang khial kha ahih lamtak uh Israel mite in a phawk ding uh hi. Tua ciangin Topa Pasian ka hihna thu Israel mite in thei ding uh hi,” hong ci hi.

Zekhariah 4:6

Tua ciangin vantungmi in kei kiangah, “Topa in Zerubbabel’ tungah hih bangin thu gen hi; Thagum hat hang hi lo, vangliatna hang zong hi lo, keima tung panin na ngah Kha hang bek tawh na ma na tun’ zo ding hi.

Joshua 9:14

Tua ahih ciangin Israel mite in amau’ an ciam kha uh a, Topa tung panin lamlahna dong lo uh hi.

2 KUMPI NIHNATE 18:21

En un, a tungah a kingam mipa’ khut a sun ding pumpeeng kitam kung a bang lel Izipt tu-in na suang uh hi. Amah a suangte khempeuh tungah Izipt kumpipa Faro in tua bang lel ahi hi.

2 KUMPI NIHNATE 18:24

Tua ahih ciangin note in leengte leh sakol tuangte tawh kisai-in Izipt a suang kimlai-in bangci-in ka topa’ nasemte lakah a neupen galkap ukpa khat lehnawh zo ding na hi uh hiam?

Isaiah 1:4

Ah, a khial minam, mawhna tawh a gik mite, siatna a bawlte’ suan leh khakte, a gamtatsia tapate! Amaute in Topa nusia khin uh a, amaute in Israelte’ Siangtho Pa simmawh khin uh hi; amaute in amah nungngat uh hi.

Isaiah 31:1

Izipt gamah huhna ngen dingin paisuk a, sakolte suan’ in a nei, leengte a tam manin muang a, sakol tuangte a hat mahmah manin a suang, ahih hangin Israelte’ Siangtho Pa a suang lo, Topa thu a dong lote in gimna ngah ta hen!

Jeremiah 2:18

Tu-in Izipt gamah na pai manin bang phattuamna ngah ding na hi hiam? Nail guntui va dawn lel ding na hi hiam? Assiria gamah na pai manin bang phattuamna ngah ding na hi hiam? Eufrates guntui va dawn lel ding na hi hiam?

Hosea 11:6

Galte in a khuapi sung uh luhin, a khuapi kulh kongpi zawlte uh suktansak ding hi. Ka mite in thuhoih lo zui kha uh ahih manin gal in susia mang ding hi.