Isaiah 24:16 - Tedim Bible

¹⁶ Lei mong a gamla pen pek pan nangawnin “a thuman Pa in vanglian ta hen’ cih la i za ding hi. Ahih hangin keimah in, “Ka lungkham hi, ka lungkham hi. Gimna ngah hi ta ing! Bang hang hiam cih leh mi khemte in khemkhem lai-in sia semsem uh a, khem zawh thu ciam lailai uh hi,” ka ci hi.

Tedim Bible Revision 2017

¹⁶ Leimong a gamla pek pan nangawnin a thuman Israel minamte a kiphatna la i za ding hi. Ahih hangin keimah in, “Ka lungkham hi; ka lungkham hi. Gimna ngah hi ta ing! Bang hang hiam cih leh mi khemte in khemkhem lai-in sia semsem uh a, khem zawh thu mah ciamciam lai uh hi,” ka ci hi.

Isaiah 24:16 Referans Kwoze

Isaiah 21:2

A kihtak huai mangmuhna khat kei tungah hong kigen hi; A lehheekpa in lehheekin a sut thei mipa in sut hi, a susia thei mipa in susia hi. Elam galkapte aw, kuan to un, Media galkapte aw, umcih un; Babilon’ pian’sak ahi, khuisatnate khempeuh Pasian in beisak ta hi.

Jeremiah 5:11

Israel minamte leh Judah minamte, Topa in ka cih-inah, kei tungah hong thuman nawn het lo uh hi.

Isaiah 33:1

Hong kisusia nai lo, mi a susiapa aw, gimna a ngah ding na hi ta hi. Kuamah in hong khem nai loh mi khempa aw, gimna a ngah ding na hi ta hi. Na suksiat nawn loh ciangin nang hong kisusia ding a, na khem nawn loh ciangin nang hong kikhem ding hi.

Jeremiah 3:20

Ahih hangin thuman lo zi in a pasal a nusiat bangin Israel mite aw, Topa in kong cih in ah, no zong kei’ tungah nong thuman kei uh hi,’ ci-in va tangko in,” hong ci hi.

Mangmuhna 15:3

Tua mite in Pasian’ sila Moses’ la leh Tuuno’ la sa-in: “Vanglianpen Topa Pasian aw, Na bawlnate lianin, a lamdang mahmah hi! Mipawl khempeuhte’ Kumpipa aw, Na gamtatnate in a dikin, a man hi!

Sawltak 13:47

Bang hang hiam na cih uh leh, Pasian’ thupiakna in: ‘Leimong dongin gupna na pian’sak nadingin, Gentailte’ khuavak dingin ka hong koih zo hi,’ a ci hi,” ci-in lau loin a gen uh hi.

Marka 13:27

Tua lai takin amah in a vantungmite sawlin, amaute in a teelsa mite lei kiu li pan, lei mong khat pan van mong khat dongin a kikhawmsak ding uh hi.”

Habakkuk 1:3

Bang hangin hih bang siatnate leh lungkhamnate hong musak na hi hiam? Kisuksiatna leh kisukgawpna in hong umcih a, kitotna leh kiseelna, mun citeng ah om hi.

Micah 5:4

Amah in Topa’ thahatna tawh a tuute uk ding a, Topa ama Pasian’ min vangliatna tawh uk ding hi. Leitung mi khempeuh in ama liatna phawk ding uh ahih manin, ama mite lungmuang takin om thei ding uh hi.

Hosea 6:7

Ahi zongin ka ciamna gam a tun’ uh ciangin amaute in Adam khua-ah ka thuciamna palsat uh a, kei tungah hong thuman lo uh hi.

Hosea 5:7

Topa’ tungah amaute citak lo uh a, midangte tawh zawlta nei uh hi. Tu-in amaute leh a neihsa khempeuh uh kisusia ding hi.

Kah la 1:2

Amah zan khuavakin kap a, a khitui a biang tungah a tak kauhkauh hi. Amah a it ngeite khempeuh a hehnem ding khat beek a om nawn kei hi. A kipawl pihte khempeuh in kheemin, tu in a langpan’ khin ta uh hi.

Jeremiah 12:6

Bang hang hiam cih leh na sanggamte leh na innkuanpihte nangawn in nang hong zuak uh a, nang hong do ding mi honpi a kaikhawm uh hi. Kamkhum tawh nang a hong zol uh hangin um kei in,” ci-in hong dawng kik hi.

Isaiah 60:21

Na mihingte khempeuh thuman ding hi; keima min a than’ nadingin keima suansa kung, ka khut tawh ka sepsa ahi gam pen amaute in nei pai suak ding uh hi.

Isaiah 52:10

Topa in minam khempeuh mai-ah ama khut siangtho lakkhia khin a, ama mite honkhia hi. Lei mong khempeuh in i Pasian’ hotkhiatna mu ding uh hi.

Isaiah 48:8

Note pen a lehheek thei na hih lam uh ka thei a, na suah tung uh akipan mi lehdo thei na hihna uh ka thei hi. Tua ahih manin tanglai akipan na bil uh kihong ngei lo a, zong na thei ngei kei uh hi.

Isaiah 28:5

Tua ni ciangin Vanglianpen Topa pen ama mi a om laite’ adingin minthan’na kumpi lukhu leh hoihna lukhu hi ding hi;

Isaiah 26:15

Ahih hangin nangmah in ko minam nong khangsak hi, Topa aw, nangmah in minam na khangsak a, gamgi khempeuh na keeksak khin hi. Hih thu hangin nangma min a thang hi.

Isaiah 17:4

Tua ni ciangin Jakob’ liatna bei ding a, ama hauhna mangthang ding hi.

Isaiah 10:16

Tua ahih ciangin Topa, Vanglianpen Topa in ama mi thahat galkapte lakah natna lianpi tungsak ding a, tua natna in amaute sungah meikuang bangin kuang niloh ding hi.

Late 106:15

amah in amaute’ nget pen pia a, ahih hangin amaute sungah siatna tung sak hi.

Late 98:3

Amah thutakin, it tawntungna nei ahih manin Israelte' tunga a thuciamna tung sak hi. Leitung mi khempeuh in i Pasian’ gupkhiatna mu khin uh hi.

Late 67:7

Pasian in eite thupha hong pia khin hi; leimong dong khempeuhte in amah zahtak uh hen.

Late 58:10

Heh thukna a muh ciangin thuman mipa lungdam ding a, migilote’ si sungah amah in a khete sil ding hi.

Late 2:8

Keima tungah hong ngen in; nangma luah dingin minamte ka bawl ding a, leimong dongin nangma neihsa ka hisak ding hi.

Paikhiatna 15:11

“Topa aw, pasiante' lakah kua in nang tawh kibang ahi hiam? Kua in nang tawh kibangin, siangthona-ah lianin, minthang nasepna-ah kihtakhuai-in, nalamdang sem ahi hiam?

Jeremiah 12:1

Topa aw, nang tawh thu i kisel ciangin nang a tawntungin na man den hi; ahih hangin thu khat nang tungah kong dong nuam lai hi. Bang hangin mi gilote a dau pai a, mi khem hatte gualzo sese ahi hiam?

Siampi Laibu 26:39

Note sung panin galte’ leitangah a om laite amau’ mawhna hangin kiam ding uh hi; amau’ pute pate’ mawhna hangin amau zong amaute mah bangin kiam ding uh hi.

Late 65:8

lei mong pek-a omte in na hihsa limte a kihtak nadingun kihtakhuai gamtatna zangin, hotkhiatna tawh kote’ ngetna nong pia hi; nisuahna leh nitumna kikal-a om mite khempeuh lungdam-a awng dingin na bawl hi.

Late 119:158

Thuman lo mite enin ka kih hi, bang hang hiam cih leh amaute in nangma thupiaknate zui lo uh hi.

Isaiah 11:12

Amah in minamte’ adingin lan khat khai ding a, Israel mi a kihawlkhiate kaikhawmin, leitung kiuli panin Judah mi a kikhenthangte kaikhawm ding hi.

Isaiah 42:10

Topa’ tungah la thak sa un la, leimong panin amah phatna sa un! Tuipi leh a sunga omte, tuikulh gamte leh a tunga teeng mite aw, lasa un.

Habakkuk 1:13

Ahi zongin hih a gilo zuautat mite bangci thuak zawh na hi hiam? Hih bang siatna a mu dingin na mit siangtho lua a, a gamtat sia mite na thuak zo kei hi. Tua ahih manin, amaute sangin a dikzaw mite a suksiatna-ah, bang hangin daicip na hi hiam?

Isaiah 6:5

Tua ciangin keimah in, “Gim ngahpa hi ta ing! Bang hang hiam cih leh a mawknapi ka hi hi; ka kam-a ka thugen khempeuh mawhna vive hi a, a thugen khempeuh uh mawhna leh nitna ahi mite’ lakah ka teeng kha hi. Vanglianpen Topa, Kumpipa ka mu kha khin ta hi,” ka ci hi.