Isaiah 23:11 - Tedim Bible

¹¹ Topa in tuipi tungah a khut zan a, kumpi gamte kiliingsak gawp hi; Sum bawlna phualpite a kisuksiat nading Topa in thupia zo hi.

Tedim Bible Revision 2017

¹¹ Topa in tuipi tungah a khut zan a, kumpi gamte lumlet gawp hi. Sumbawlna phualpite a kisuksiatna ding Topa in thu pia zo hi.

Isaiah 23:11 Referans Kwoze

Paikhiatna 14:21

Tua ciangin Moses in tuipi tungah a khut zan hi; Topa in zan tawntung nisuahna huihpi hat tawh tuipi leh luan’sakin, tuipi pen leikeu-in bawl a, tuite kikhen hi.

Johan 2:16

Vakhu zuakte kiangah zong, “Hih nate na paimangpih un. Ka Pa’ inn sumzuakna inn na suaksak kei un,” a ci hi.

Marka 11:17

“Ka inn in mipawl khempeuhte thungetna inn a kici ding hi,’ ci-in Lai Siangtho sungah kigelh hilo ahi hiam? Ahih hangin note in tua inn guta buluhte omna na piangsak tazen uh hi,” ci-in a hilh hi.

Zekhariah 14:21

Jerusalem khua sung leh Judah gam sunga om beelte khempeuh, Vanglianpen Topa biakna-in zat dingin a tuamin kisiangthosak ding hi. Biakna pia dingin a hong pai mi khempeuh in tua beelte zangin, biakna sa huanna-in nei ding uh hi. Tua ni hong tun’ ciangin, Vanglianpen Topa’ biakinn ah sumzuak van zuak cihte om nawn lo ding hi.

Haggai 2:7

Minam khempeuh lokgawp ding ka hih manin, a neihsa uh sum leh paiite, hih munah hong kipuak ding a, biakinn sungah a dimin van hong om ding hi.

Nahum 1:14

Topa in Assiria mite tawh kisai-in hih bangin thu pia hi: “Note na cimang ding uh a, note’ pasiante’ biakinn sunga om milimte ka susia ding hi. Note siahuai lua na hih manun, na hankhuk ding uh a bawlbawl ka hi ta hi,” ci hi.

Ezekiel 31:16

Mi site’ omna Leinuai khua-ah tua singkung ka khiat suk ciangin, a kiatna ging in minam khempeuh lok gawp ding hi. Tua singkung a kiat manin, Eden singkung khempeuh, leh a hoihpen, lim takin tui a ngah Lebanon singkungte khempeuh in zong Leinuai-ah nuamtuam na sa ding uh hi.

Ezekiel 26:10

A sakolte’ paina leivui khute in khuapi tuamcip ding hi. Van pua leeng leh leeng galkapte’ gin’na in khuapi kulhte cimsak ding a, a kisusiasa kulh kongpi-a pai bangin hong lut lel ding uh hi.

Jeremiah 47:7

Topa in ka sawl nak leh bangci-in khawl dide thei ding ahi hiam? Ashkelon khua leh tuipi gei teng sim dingin ka sawlsa ahi hi,” a ci hi.

Isaiah 25:2

Bang hang hiam cih leh nang in khuapi pen ninbulomtang na suah a, a muanhuai khuapi a sia na suaksak hi; mi kiphasakte’ mun muanhuai pen khua hi nawn lo a, cik mah hunin kilam nawn lo ding hi.

Isaiah 23:3

Izipt gam a, piang ante lei-in na zuak uh a, minam khempeuh tawh sumbawlin na kizom uh hi.

Isaiah 10:6

Pasian thu a ngaihsun lo minam leh keimah hong hehsak mite’ neihsa sutin lak sakin, amaute pen konglak buannawng bangin a tuancil dingin amaute sawlin thu ka pia hi.

Isaiah 2:19

Leitung liingsak gawp dingin Topa a thawh ciangin, amah kihtakna leh alian ama minthan’na panin, suanghawm sung leh leihawm sungah mite bu ding uh hi.

Late 71:3

Nangmah in hong hon dingin ka belh suangpi, ka kulh muan’huai hong hi ta in, bang hang hiam cih leh nangmah in keima suangpi leh ka kulhpi na hi hi.

Late 46:6

Minamte heh mahmah uh a, kumpi gam kiliing hi; ama aw ging khiasak a, leitung kicimgawp hi.

Piancilna 9:25

amah in, “Kanaan in ciamsiatna ngah ta hen la, a sanggamte' tungah silate’ sila hita hen,” ci hi.

Isaiah 5:25

Tua ahih ciangin, Topa’ hehna ama mite’ tungah hong khangin, a khut zanin amaute vat gawp a, mualte liing hi; amaute’ luang hawmte pen kongzing lampite ah nin bangin om hi. Hih bang teng hangin zong a hehna dam nai lo a, ama khut kizan lai hi.

Isaiah 13:13

Tua ahih ciangin ama sinso ni-in Vanglianpen Topa’ hehna hangin vantung lau-in ka liingsak ding a, ama omna panin leitung kisingkhia ding hi.

Isaiah 14:26

Hih ngimna pen leitung buppi’ adinga a kingim ahi hi, hih ka khut pen minam khempeuh daanpiak nadingin a kizan ahi hi.

Isaiah 19:5

Nail gun tuite keu ding a, gun pen kangcip-in keu ding hi;

Isaiah 23:10

Tarshish mite aw, tu-in kuankhia un la, lo kho un. Na sum bawlna teng uh maimang khin ta hi.

Isaiah 50:2

Bang hangin, kong pai ciangin mi khat zong om lo ahi hiam? Kong sap ciangin hong dawng ding khat zong om lo ahi hiam? Hong hon zo lo zah dingin ka khut tom lua ahi hiam? Tua ahih kei leh note khahkhiatna ding thahatna nei lo ka hi hiam? En un, keima taiina tawh tuipi ka keusak a, gunte pen sehnel gam ka suaksak hi; tui om loh manin a ngasate uih a, dangtakin si uh hi.

Ezekiel 26:4

Tai-ar kulhpite susia-in na tausangte supai ding uh hi. Tua ciangin leitang khempeuh kiat khia-in suangtumte bek om lai ding hi.