Isaiah 18:4 - Tedim Bible

⁴ Bang hang hiam cih leh Topa in kei tungah, “Nitaang sunga nisa silsel, anlak nisa sunga meiizun bangin, ka omna panin daitakin ka en ding hi” hong ci hi.

Tedim Bible Revision 2017

⁴ Bang hang hiam cih leh Topa in kei tungah, “Ni taang sunga nisa silsel, an lak nisat hun sunga meii zun bangin, ka omna panin daitakin ka en ding hi,” hong ci hi.

Isaiah 18:4 Referans Kwoze

Hosea 5:15

Ka mite in a mawhna hangun gimna thuakin kei hong zon’ kik mateng ka tuaci nusiat phot ding hi. A lungkham uh ciangin kei hong zong ding uh a,

Isaiah 26:21

Bang hang hiam cih leh en un, amau’ mawhna hangin leitung a, teeng mite daan pia dingin ama omna panin Topa hong paikhia a, leitung in ama tunga a luang sisante laakkhia ding a, a kithat ama mite sincip nawn lo ding hi.

Isaiah 18:7

Tua hun ciangin, amau’ gam gunpi in a phelkhap, a vanglian a gualzo minam, a nai a gamla ah a kikihta mite, a tun sang mi, a ci nel mite kiang panin, Vanglianpen Topa’ min omna mun Zion Mual, Vanglianpen Topa’ tungah letsong hong kipuak ding hi.

Isaiah 14:32

Filistia mite’ hong sawl kamtaite, mi khatpeuh in bangci dawn’ ding hiam? “Topa in Zion kipsak khin a, gimna a thuak ama mite in tua sungah buk nading mu uh hi,” ci in dawng ding hi.

Isaiah 12:6

Zion-a teeng mite aw, nomau’ lakah Israelte’ Siangtho Pa lianin om ahih manin awng un la, lungdamin la sa un,” a cih hun uh hong tung ding hi.

2 SAMUEL NIHNA 23:4

amah in amaute tungah zingsang khuavak bangin taang a meii kaai loh ni zingsang-a nitaang khia, lei lak panin lopate a selkhiasak guahtui bang hi.

Hosea 14:5

Gam keuna mun-a guahzu bangin Israel mite tungah nuntakna guah ka hi ding hi. Unok Paak bangin amaute palh ding a, Lebanon gama singkungte bangin zung thuk kha-in kip ding uh hi.

Isaiah 46:13

Ka dikna kong tungsak ta a, gamla nawn lo hi; ka hotkhiatna zekai lo ding hi; keima minthan’na ahi Israel adingin, Jerusalem ka honkhia ding hi.”

Isaiah 31:9

Amau’ belh a mun muanhuai uh, launa hangin tai ding a, buaina hangin a uliante in a lim uh taisan ding hi,” ama meikuang Zion ah a om, ama meikhuk Jerusalem khua ah a om Topa in ci hi.

Isaiah 26:19

Nangma mi a site hingkik ding a, amaute’ pumpi tho ding hi. Han sunga a lum mite aw, tho un la, lungdamin la sa un! Bang hang hiam cih leh zing daitui in leitung a nosak kik bangin, sawtpi a, a si mite, Topa in hingkik sak ding hi.

Late 72:6

Amah, pawn lak lopa tunga guah kia leh lei a kawtsak guahzu tawh kibang ta hen!

Joel 3:17

Tua ciangin Israelte aw, ka mual siangtho Zion tungah a teeng keimah in, Topa, note’ Pasian ka hihna na thei ding uh hi. Jerusalem in a siangtho biakna khuapi hi ding a, gamdang mite in zo kik ngei nawn lo ding uh hi.

Paunak 19:12

Kumpipa’ hehna in humpinelkai hawk bangin lauhuai a, ama pahtakna in lopa tunga daitui taak bangin deihhuai hi.

2 KHANG TANGTHU NIHNATE 6:21

Amaute in hih mun lam nga-in thu hong nget uh ciangin na nasempa leh na mi Israelte’ hong thuumnate nangmah in ngai in; hi hi, na teen’na mun vantung panin za in; na zak ciangin maisak in.

Isaiah 57:15

Bang hang hiam cih leh a sang, a lian, tawntung sunga a teeng Pa, ama min Siangtho ahi pa in hih bangin ci hi: “Keimah in a sangna mun leh a siangtho munah ka om a, a kiniamkhiat mite’ lungsim leh a kisik mite’ lungsim a thakhauhsak kik dingin kisikna leh kiniamkhiatna lungsim a neite tawh zong ka omkhawm hi.

Amos 3:7

Topa Pasian in ama nasem kamsangte tungah, ama geelna theisak lopi-in bangmah hih het lo hi.