Isaiah 11:2 - Tedim Bible

² Ama tungah, Topa’ Kha ahi, lungpilna leh thu theihtelna Kha, thu lamlah siamna leh vangliatna Kha, theihna leh Topa kihtakna Kha om ding hi.

Tedim Bible Revision 2017

² Topa’ kha in ama tungah ama mite a uk nading pilna, thutheihna le siamna pia ding hi. Amah in Topa’ deihna thei-in Topa zahtak ding hi.

Isaiah 11:2 Referans Kwoze

Isaiah 61:1

A zawng mite tungah lungdamna thu puak dingin Topa in kei sathau hong nilhin hong sawl ahih manin kei tungah Topa Pasian’ kha hong om hi; lungsim kitamzante a damsak ding, sal-a a kimante tungah suahtakna thu a gen ding, a kihen mite’ adingin thong kong a hong ding;

Johan 16:13

Ahih hangin thuman thutak Kha Siangtho hong tun’ ciangin, thuman thutak a vekpi-in note hong hilh ding hi. Bang hang hiam na cih uh leh, ama ut bang hong gen ahi kei hi, a zaksa thu khempeuh hong gen ding hi. Anung ciangin hong piang ding thu khempeuh zong hong hilh ding hi.

2 TIMOTI NIHNA 1:7

Bang hang hiam cih leh, Pasian in eite launa lungsim hong pia ahi kei hi; vangliatna, itna leh ei-le-ei ki-uk zawhna Kha hong pia zo hi.

Isaiah 42:1

Keimah in ka huh, keima teel, ama sungah ka lungkimna ka nasempa en un; ka Kha tawh amah ka kidimsak a, amah in minam khempeuh tungah thuman tungsak ding hi.

Mattiu 3:16

Zeisu a kibaptaiz khit tui sung pan a thawhtoh lai takin van kihong a, Pasian’ Kha Siangtho vakhu bangin hong kum sukin, ama tungah a khawl a mu hi.

Johan 3:34

Pasian hong sawl mi in Pasian’ thu a gen hi. Bang hang hiam i cih leh, Pasian in Kha Siangtho kiteh loin a pia hi.

Johan 14:17

Tua Kha Siangtho leitung mite in mu loin thei lo uh ahih ciangin a sang zo kei uh hi. Tua Kha Siangtho in note tawh omkhawmin, note sungah om ding ahih ciangin amah na thei ding uh hi.”

Isaiah 48:16

Kei kiangah hong nai un la, hih thu za un: a kipat cil-a kipanin a simthamin thu ka gen kei a, tua thu hong pian’ akipanin kei ka om hi. (Tu-in Topa Pasian in a Kha tawh kei hong sawl hi.)

1 KORIN MASA 1:30

Tua Pasian hangin note in Khazih Zeisu sungah na om uh hi. Tua Khazih Zeisu in eite ading Pasian kiang pan pilna, dikna, sian’thona leh tatkhiatna hong suak zo hi.

Isaiah 59:21

Note tawh hih bangin thuciamna ka bawl hi: Nang tunga a om ka kha leh na kamsung a, ka koih keima thukhamte leh ka thuhilhnate note tungah kong pia khin a, tu-a kipanin a tawntungin note in tua thute zui-in na suan na khakte uh kam pan paikhia lo ding a, a khang khangin na maimangsak kei ding uh hi,” a ci hi.

Thu-hilhkikna 34:9

Tua ciangin Moses in, ama tungah a khut nga khin ahih manin Nun’ tapa Joshua in lungsim pilna tawh kidim hi; tua ahih ciangin Israel mite in ama thu mangin, Topa in Moses a thupiakna bangin gamta uh hi.

Sawltak 10:38

Pasian in Nazareth khua mi Zeisu, Kha Siangtho leh vangliatna tawh sathau a nilh khit ciangin tua Zeisu pai kawikawi a, thupha bawlin dawimangpa in a bawlsiatte khempeuh a damsak hi. Bang hang hiam na cih uh leh, Pasian in amah tawh a omkhawm hi.

Johan 15:26

“Pa kiang pan a pusuak, thuman thutak Kha Siangtho ahi Pa kiang pan no kiangah kong sawl ding Huhpa in a hong tun’ ciangin, keima ading teci a pang ding hi.

Mangmuhna 1:4

Johan in Asia gamah a om pawlpi sagihte kiangah a zasak hi. Tu lai taka om, a om ngei, tu nung ciangin a hong pai lai ding pa’ kiang pan ahi zongin, ama tokhom mai-ah a om Kha Siangtho sagihte kiang pan ahi zongin, thuman teci pang ahi tham loin mi site lakah a suak masa bel hi a, leitung kumpite a ukpa ahi Zeisu Khazih kiang pan ahi zongin, hehpihna thupha leh nopna note tungah om ta hen. Eite hong it a, a sisan tawh eite mawhna pan hong phelkhia a,

Paikhiatna 28:3

Keima' siampi nasepna-ah amah a ap dingin amaute in Aaron’ puante a bawl nading, hih theih ciimna ka guatsa, siamna a nei mite khempeuh tungah gen in.

Late 72:2

Amah in thumanna tawh na mite tungah thu khen hen la, na mizawngte’ tungah thutan’na tawh thu khen ta hen.

Isaiah 9:6

Bang hang hiam cih leh eite adingin naungek khat hong suak a, eite tungah tapa khat hong kipia hi; ama liangko tungah ukna om ding a, ama min pen, “Lamdang, Thulakpa, Vanglian Pasian, Tawntung Pa, Nopsakna Kumpi,” kici ding hi.

Isaiah 28:6

thukhen a, a tupa tungah thutang lungsim guan ding a, khuapi kulh hong luh galte a notkhia mite tungah han’na lungsim guan ding hi.

Isaiah 32:15

Ahi zongin Pasian in a Kha Siangtho hong puakkik ding hi. Leitang siate lo hoih hong suakkik ding a, lo-a ante hoih mahmah-in tulak bang ding hi.

Zekhariah 4:6

Tua ciangin vantungmi in kei kiangah, “Topa in Zerubbabel’ tungah hih bangin thu gen hi; Thagum hat hang hi lo, vangliatna hang zong hi lo, keima tung panin na ngah Kha hang bek tawh na ma na tun’ zo ding hi.

2 SAMUEL NIHNA 23:3

Israel Pasian kampau khin a, Israel Suangpi in kei kiangah hong ci khin hi: Mi khat in mite tungah thutang takin ukin Pasian zahtakna tawh a uk ciangin,