Isaiah 1:23 - Tedim Bible

²³ Na uliante, mi lehdote hi a, gutate tawh a kikhawlte ahi hi. Mi khempeuh in sumgolh leh letsong deih uh hi. Amaute in pa nei lote pan’pih lo uh a, meigongnu’ thu amaute in sang lo uh hi.

Tedim Bible Revision 2017

²³ Na uliante, mi lehdote hi a, gutate tawh a kikhawlte ahi hi. Mi khempeuh in sumgolh le letsong a deih uh hi. Amaute in pa nei lote panpih lo uh a, meigongnuʼ thu amaute in sang lo uh hi.

Isaiah 1:23 Referans Kwoze

Micah 7:3

A sia lam-a gamtat ding siam mahmah uh a, uliante leh thukhente in sumgolh ngenin, mi liante in amau’ deih teng pulak uh a, kipawlin vaihawm khawm uh hi.

Zekhariah 7:10

note lakah a om meigong, tagah, gamdang mite, ahih kei leh mi zawngte gim pia loin, khat leh khat kisiatsak nading na ngaihsut loh nading uh thu ka hong pia zo hi,” ci hi.

Paikhiatna 23:8

Sumgolh na la kei ding uh hi, bang hang hiam na cih leh sumgolh in uliante mit tawsak a, thuman mite’ thu hei khiatsak hi.

Luka 19:46

“Ka inn in thungetna inn ahi ding hi,” ci-in Lai Siangtho sungah a kigelh hangin, note in guta buluhte omna na suaksak tazen uh hi,” a ci hi.

Malakhi 3:5

Vanglianpen Topa in hih bangin ci hi: “Note tungah thukhen dingin ka hong pai ding a, ai tawite, numei tawh mawhte, a man lopi-a teci pangte, nasemte’ thaman piakna ah khemna a zangte, meigong, tagah, leh gamdang mite a zawhthawh bawlte, leh kei hong zahtak lo mi khempeuhte’ lang khatah thakhatin teci pangin thu ka khen ding hi.

Isaiah 3:14

Topa in, upate leh ama mite’ uliante tawh thukhen dingin kipan a; “Leenggui lo a ne tumte pen note na hi uh a, mizawngte’ na a kisutte note’ inn sungah om hi.

Marka 11:17

“Ka inn in mipawl khempeuhte thungetna inn a kici ding hi,’ ci-in Lai Siangtho sungah kigelh hilo ahi hiam? Ahih hangin note in tua inn guta buluhte omna na piangsak tazen uh hi,” ci-in a hilh hi.

Mattiu 21:13

“Ka inn in thungetna inn a kici ding hi,’ ci-in Lai Siangtho sungah a kigelh hangin, note in guta buluhte omna na piangsak tazen uh hi,” a ci hi.

Micah 3:11

Khuapi ukte in sumgolh ngah nading bekin thu khenin, siampite in sum ngah nading bekin thu gen uh a, kamsangte in zong sum ngah theih nading bek mahin, mailam thu genkhol uh hi. Tua bang hi napi-in amaute in Topa, muan’in nei uh a, “Topa in eite hong ompih a, i tungah siatna hong tung lo ding hi,” ci uh hi.

Hosea 9:15

Topa in hih bangin gen hi. Amau’ gamtatsia khempeuh Gilgal phual pan akipan hi a, tua mun-a kipanin amaute ka muhdah a kipan ahi hi. Amaute’ gamtatsiatna hangin ka gam sung panin ka hawlkhia ding hi. Amaute ka it nawn kei ding hi. A uliante un kei hong langpang uh hi.

Hosea 4:18

Amaute, zukham honpi hi uh a, nu-le-pa mawhna bawlbawl uh hi. Min phat ding sangin min siat ding ut zaw uh hi.

Jeremiah 22:17

Ahih hangin note in thu manlo tawh ngah nading ahi zongin, mimawh lote’ sisan luan’ nading ahi zongin, mi nuaisiahna leh ngongtat nading ahi zongin, na mitte uh leh na lungsim uh na zang uh hi.

Jeremiah 5:5

Mi liante’a kiangah pai-in, ka va kiho ding uh hi; amaute in Topa’ lampi a thei uh a, amau’ Pasian’ deihna a thei uh hi,” ci-in ka ngaihsun hi. Ahih hangin a vekpi-in ka ukna hong nial khin uh a, ka hakkol kuaitan-in ka henna khaute a sutat khin zo uh hi.

Isaiah 33:15

Thuman in gamta-in thutang na gen uh leh na suakta ding uh hi. Na vangliatna uh mizawngte khemna-in zang kei un la, sumgolh deih kei un. Mi that ding a vaihawmte’ thu ngai loin siatna lang khatah mit si un.

Paunak 29:24

Guktakna sunga kipawl mipa, ama adingin thusia zongpa ahi hi. A guktakna pulak leh daan kitat ding a, genkhia kei leh lah kisamsia veve ding hi.

Paunak 17:23

A ginalo thukhente in sumgolh sang sim uh a, a thukhenna uh ah thuman om nawn lo hi.

2 KHANG TANGTHU NIHNATE 36:14

A makai siampite leh mi khempeuh zong tua mah bangin citak lo mahmah uh a, minamte’ kihhuainate zui uh hi; amah in Jerusalem ah a siangtho-in a koih Topa’ inn amaute in ninsak uh hi.

Thu-hilhkikna 16:19

Thutang na heikhia kei ding uh hi; angvanna na nei kei ding uh hi; sumgolh in mi pilte’ mit tawsakin thumante’ thu heikhia ahih manin sumgolh na la kei ding uh hi.

Luka 24:27

Moses leh kamsangte khempeuh pan akipan, Lai Siangtho sungah amah a cihnopna thute tel takin a hilh hi.

Jeim 1:27

I Pa Pasian mai-ah a nin lo, a siangtho biakna in pa nei lo naupangte leh meigong numeite a dah lai takun a en a keem thei a, ama pumpi zong leitung kihhuai nitna tawh kipelh nadingin a kikep theihna ahi hi.

Isaiah 1:22

Jerusalem khuapi aw, nguntang na bang ngei a, tu-in ngun-ek na suak hi. Leenggahzu limci na bang ngei a, tu-in tui mawkmawk na bang ta hi.

Isaiah 5:23

mimawhte sumgolh tawh khah a, midikte a mawhsakte in gimna ngah ta hen!

Isaiah 30:1

Topa in, kei’ ngimna hi lopi-in thu vaihawmna a sem khia, kei’ kha tawh lopi-in kipawlna dang a bawl manun khialhna a bawl thuahthuah; keimah thu hong dong lopi-in Faro’ hutna sung a beel ding leh Izipt’ liahna bukna a zong dingin Izipt gamah paisuk ding a, a kuankhia a genhak naupangte in gimna ngah ta hen!” a ci hi.

Isaiah 65:2

A hoih loin gamta-in, amau’ ngaihsutna bang a zui teitei a genhak mite lam nga-in, sun ni tawntungin ka khut ka zak hi.

Jeremiah 4:17

Judah gam in kei hong langpan’ ahih manin a galte in lo hongte bangin a kimkot-ah a pang dimdiam uh hi, Topa in kong ci hi.

Jeremiah 32:32

Bang hang hiam cih leh Israel mite leh Judah mite, a kumpite uh leh a kumpi uliante uh, a siampite uh leh a kamsangte uh akipan Judah mite leh Jeursalem khua mite khempeuh in kei hong heh sak nadingin siatna a bawl uh hi.

Ezekiel 12:2

“Ezekiel aw, a lehdo thei mite lakah a teeng na hi hi. Amaute in mit nei napi-in khua mu lo uh a, bil nei napi-in bangmah za thei lo uh hi. Amaute pen a lehdo thei mite ahihna hang uh ahi hi.

Hosea 5:10

Topa in hih bangin ci hi: Judah mi uliante in gisuang khinin midangte’ leitang keeksak uh ahih manin amaute tungah ka heh a, amaute tungah daantahna tuikhang bangin ka tungsak ding hi.

Amos 5:12

Bang hang hiam cih leh na khialhna tampite uh, leh na mawhna tampite uh ka thei khin a, thuman mite gimsakin, sumgolh na la uh a, thukhenna zumah mi zawngte’ thu a manin na khen kei uh hi.

Micah 3:9

Ngai un! Israel a uk makaite aw, Note in thutang deih loin, thuman kimlai a khialin na hei uh hi.

Micah 6:12

Na mi haute uh mi zawngte tungah tatsia mahmah in, na khua sung mi khempeuh uh zuau gen vive hi uh a, a kam un khemna thu bekbek gen hi.

Gamlak-vakna 22:7

Tua ahih ciangin Moab upate leh Midian upate aisaan man ding tawh kuan khia uh hi; Balaam kiangah amaute pai uh a, Balak’ thu ama kiangah sung uh hi.

1 SAMUEL MASA 8:3

Ahih hangin a tapate amah bangin gamta lo uh a, meetna lamah kihei uh hi; amaute in sumgolh la-in thuman heikhia uh hi.

Isaiah 1:17

gamtat hoih ding kisin un; thumanin gamta un la, nenniamna kheel un; pa nei lote huu un la, meigong numei pan’pih un.

Isaiah 1:18

Topa in hih bangin ci hi: “Tu-in hong pai un la, thu kikum khawm ni; na mawhnate uh puansan a bat hangin vuuk bangin hong ngo ding hi; na mawhnate uh si bangin a san hangin tuumul bangin hong kaang ding hi.

Isaiah 28:14

Tua ahih ciangin Jerusalem khua sungah hih mite a uk, midangte a kote aw, Topa’ thu za un!

Jeremiah 5:6

Tua ahih manin tuulak panin humpi khat in amaute that ding a, sehnel gam panin keivom khat in a petgawp ding hi. Kamkei khat in a khuapite uh vil gige a, a pusuak khia peuhpeuh balzan gawp ding hi; bang hang hiam cih leh amaute’ mawhna uh tamlua a, kei hong taisan mun lua uh hi.

Ezekiel 22:27

A kumpi uliante uh pen a samatsa uh a bal gawpgawp ngia hon tawh kibang hi. Sum ngah theihna dingin mi that uh hi.