Hosea 7:2 - Tedim Bible

² Amau’ gamtatsiatna khempeuh ka phawk lam tak amaute in ngaihsutin nei kha lo uh hi. Amau’ mawhna in amaute gakcip a, ka muhna mahmah-ah om gige uh hi.

Tedim Bible Revision 2017

² Amauʼ gamtat siatna khempeuh ka phawk lamtak amaute in ngaihsutin nei kha lo uh hi. Amauʼ mawhna in amaute gakcip a, ka muhna mahmah ah om gige uh hi.

Hosea 7:2 Referans Kwoze

Luka 12:2

A kilak lo ding a kisincip bangmah om lo hi. A kithei lo ding a ki-imcip bangmah om lo hi.

Late 90:8

Nangmah in kote’ mawhnate na mai-ah na koih a, ka khialh simnate uh na maitang ah na koih hi.

Amos 8:7

Topa, Israel Pasian in ama min liatna tawh kiciam a, “Na gamtat siatnate uh ka mangngilh ngei kei ding hi.

Jeremiah 14:10

Hih mite tawh kisai-in Topa in hih bangin a gen hi: “Amaute in hih bangin kei kiang panin vakkhia kawikawi nuam uh a, a kidek kei uh hi. Tua ahih manin Topa in amaute ka sang kei a, a khialhnate uh phawk-in, a mawhnate uh ka daantat ding hi.”

Jeremiah 2:19

Na gitlohna mah in nangmah hong thu hilh ding-a, na thu up nawn lohna in nangmah hong mawhsak ding hi. Topa na Pasian nong nusiat ciang, kei nong kihtak nawn loh ciangin, nuam hetlo-a kha keei hi, cih thu thei in la, mu in, a vanglian Topa Pasian in kong ci hi.

Hebru 4:13

Tua tham loin, eite thu hong khenpa mai-ah a kilang lo na khat beek a om kei hi; na khempeuh a liah a dal om loin Pasian mai-ah kipho laakin a om hi.

1 KORIN MASA 4:5

Tua ahih ciangin khuamial lakah a kiselte leh lungsim sungah hanciamnate a kilangsak ding, Pasian hong pai dong matengin, a hun hong tun’ ma-in thu na khen kei un. Tua hun ciangin Pasian kiang pan phatna thu a ngah ciat ding uh hi.

Hosea 9:9

A gamtatna uh gen theih lohin siahuai uh a, Gibeah khua-a a gamtat ngeite uh tawh kibang hi. Pasian in amau’ mawhnate thei-in daan tat ding hi.

Jeremiah 32:19

na ngimnate lian mahmah a, na sepnate thupi mahmah hi. Mite’ nuntakzia khempeuh na mu a, amau’ nuntakdan leh a nasepna gahte tung tawnin mi khempeuh’ tungah thaman na pia kim hi.

Jeremiah 16:17

Bang hang hiam cih leh a omdan khempeuh uh ka mit-in ka mu a, kei’ kiang pana a kiseel bangmah om lo hi. A khialhna khempeuh uh zong ka mit panin a kiseel kei hi.

Jeremiah 4:18

Na lungsim leh na gamtatnate hangin hih thu nang’ tungah hong tung hi. Hih in nangma’ gitlohna hang hi a, kha-in na lungtang hong vut hi.”

Isaiah 5:12

Amaute in a pawi sung uhah laiza la sakna leh harp la sakna, khuang, tamngai leh leenggahzu tampi nei uh hi; ahih hangin amaute in Topa’ sepnate don lo uh a, a khut tawh a bawlte zong mu lo uh hi.

Late 25:7

Topa aw, ka khangno lai-a ka mawhna leh ka khialhnate ciamteh kei in la, na hoihna na ngaihsutna leh na itna kip tawh kizui-in kei hong phawk in!

Late 9:16

Topa in thu hong khen-in, migilote amau khut nasepna mah-ah awksakna tawh amah hong kilang hi.

Hosea 8:13

Amaute in gan tawh biak ding utin, a biakna sate ne nuam uh hi. Ahi zongin Topa ahi keimah ka hih leh amaute tungah ka lungkim kei a, amaute’ mawhna phawkin tua mawhnate hangin amaute daan ka pia ding hi. Izipt-ah amaute ka sawl kik ding hi.

Isaiah 1:3

Bawng in amah a neipa thei a, la in ama topa’ an piakna mun thei buang hi; ahih hangin Israel in thei lo hi, keima mite in thei-thei lo hi,”

Late 50:22

Tua ahih ciangin, Pasian a mangngilh mite aw, hih thu ciamteh un, tua hi kei leh note kong balgawp ding hi, hong honkhia ding kuamah om lo hi.

JOB (Job) 34:21

“Pasian in mihingte gamtatna khempeuh hong encik a, i kalsuanna themno dongin hong mu khin hi.

Thu-hilhkikna 32:29

Amaute pil hi leh, hih thu theitel ding uh a, amau’ thu tawpna mu ding uh hi!

Gamlak-vakna 32:23

Ahih hangin note tua bangin na gamtat kei uh leh, en un, Topa’ tungah a khial khin na hi uh hi; na khialhna un note hong sulzuih ding thei tel ta un.

Isaiah 44:19

A kimkhat meikhuk-ah cihin, a aam tungah moh zong ka em a, sa hang-in ka ne khin zo hi; a om lai teng a kihhuai-in bawl buang ding ka hi hiam? Sing bek khat’ mai-ah kun buang ding ka hi hiam? a ci ding, thu a ngaihsun, theihna leh thu muhna a nei khat beek om lo hi.

Isaiah 26:16

Topa aw, amaute a cihmawhna uhah nang hong zuan uh a, nangmah in amaute thu na hilh a, a thungetna uh ging zo lo hi.

Jeremiah 17:1

“Judah mite’ mawhna sik laikung khat tawh kigelh hi. Suangmanpha muk zum tawh amaute’ lungtang pek tung leh biakna tau kite tungah khuak-in ki-at hi.

Jeremiah 44:21

“Judah gam khuapite leh Jerusalem khua kongzing lakah note, na pute na pate uh, na kumpite uh leh kumpi uliante akipan gamsung mi khempeuh in paknamtui halna na bawl uh ciangin Topa in tua pen a phawk lo sa na hi uh hiam? A ngaihsun lo sa na hi uh hiam?

Hosea 4:9

Mite’ thuak dinga kilawm daantahna mah siampite in zong thuak ding uh a, amau’ gamtatna bangin daan pia-in amau’ siatna bangin ka thukkik ding hi.

Hosea 9:15

Topa in hih bangin gen hi. Amau’ gamtatsia khempeuh Gilgal phual pan akipan hi a, tua mun-a kipanin amaute ka muhdah a kipan ahi hi. Amaute’ gamtatsiatna hangin ka gam sung panin ka hawlkhia ding hi. Amaute ka it nawn kei ding hi. A uliante un kei hong langpang uh hi.

Hosea 12:2

Topa in Judah mite a mawhsak nading a thu om hi. Jakob a gamtatna tawh kizui-in daan pia ding a, ama gamtatna bangin thukkik ding hi.

Jonah 1:2

“Kithawi in la, a lian mahmah Nineveh khuapi-ah va pai-in va thu hilh in; bang hang hiam cih leh amau’ gitlohna thu ka za khin zo hi,” a ci hi.

Late 10:11

Ama lungsim sungah, “Hih pen, Pasian in mangngilh hi, a mai seel hi, en lo ding hi,” ci-in ngaihsun hi.

Ezekiel 21:29

No Ammon mite aw, a siangtho lo, mi gilote, a daantuah nading uh hun tungta ahih manin, sumai gawp un, ci-in a hong hanthawn, na mangmuhnate uh zuaupi hi a, na ai phate uh a mawkna hi.

Hosea 6:2

Ni nih sungin eite hong thahatsak ding a, ni thum sungin i ngei hong bangsak ding hi. Tua ciangin amah tawh i kikhawl ding hi.