Hosea 2:18 - Tedim Bible

¹⁸ Tua ciangin, ka mite a suksiat loh nadingun gamlaka om gamsate, huih laka leeng vasate, leh leitung a bokvak ganhingte tawh thuciamna ka bawl ding a, thalte, namsaute, galhiam khempeuh, leitung panin ka phiat khia ding hi. A lungnuam, lungmuang hithiatin ka mite ka om sak ding hi.

Tedim Bible Revision 2017

¹⁸ Tua ciangin, ka mite a suksiat loh nadingun gamlak a om gamsate, huihlak a leeng vasate le leitungah a bokvak ganhingte tawh thuciamna ka bawl dinga, thalte, namsaute, galhiam khempeuh, leitung panin ka phiat khia ding hi. A lungmuang hithiatin ka mite ka omsak ding hi.

Hosea 2:18 Referans Kwoze

Ezekiel 34:25

Amaute lungmuang takin a om theih nadingun amaute tawh thuciamna khat ka bawl ding hi. Gam sung panin a lauhuai gamsa khempeuh ka beisak ding a, gamlakah nuam takin gamta-in lum thei ding uh hi.

Jeremiah 23:6

Ama’ hun hong tun ciangin Judah mite a kihonkhia ding a, Israel mite lungmuang takin a teeng ding uh hi. Amah a kilawh nadingin a min, Topa IN EITE’ DIKTATNA AHI HI, ci-in a kiphuak ding hi.

Isaiah 2:4

Amah in minamte khat leh khat kikal ah thukhenin, mi tampite’ thu khentat sak ding hi; amaute in a namsaute uh lo khawh na tu, a teipite uh singhiang heuhna temkawi-in seek ding uh hi; Minam khat leh minam khat kido nawn lo ding a, galdo dingin kithawi nawn lo ding uh hi.

Late 46:9

Amah in leimong dong ah gal beisak hi; amah in thalpi kuaitanin, teipi susia a, leengte mei tawh haltum hi.

Isaiah 65:25

Keivom leh tuuno in an ne khawm ding uh a, humpinelkai in bawngtal bangin buhkung ne ding hi; leivui pen gulpi’ an hi ding hi. Keima mual siangtho tung tengah amaute kiliamsak lo, kisusia lo ding uh hi, Topa in ci hi, a ci hi.

JOB (Job) 5:23

Bang hang hiam cih leh na lo sungah suang om lo ding a, gamlak gamsate in hong su lo ding hi.

Zekhariah 14:9

Tua ciangin Topa pen leitung khempeuh’ kumpi suak ding a, mi khempeuh in amah bek thei-in bia ding uh hi.

Zekhariah 14:4

Tua ni ciangin Jerusalem nisuahna lama om Oliv Mual tungah Topa’ ding ding hi. Tua ciangin nisuahna lam pan nitumna lamah Oliv Mual kitamin phel nih suak ding a, a kikalah kuampi om ding hi. A mual kimkhat leilu lamah kikhinin, kimkhat, leitaw lamah kikhin ding hi.

Zekhariah 3:10

Tua ni ciangin note khempeuh in leenggui leh theikungte hau-in nuam na sa ding uh a, na veengte ciat un hong nekpihin hong lungdampih nadingun na sam ding uh hi, Vanglianpen Topa in ci hi,” a ci hi.

Zekhariah 2:11

Tua hun ciangin Topa kiangah minam tampi hong pai ding uh a, ama mite suak ding uh hi. Topa in note hong ompih ding a, tua ciangin note kiangah kei a hong sawlna thu na thei ding uh hi.

Jeremiah 33:16

Tua ni ciangin Judah mite kihonkhia ding a, Israel mite lungmuang takin a teeng ding uh hi. Amah a kisap nadingin a min, Topa in eite’ Diktatna ahi hi, ci-in a kiphuak ding hi.

Jeremiah 30:10

“Tua ahih manin Topa in kong cih-inah; Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte-uh’ saltan’na panin kong honkhia ding hi. Jakob’ suante hong ciahkik ding uh a, nuam takin a teeng kik ding uh hi. Kuamah in amaute a lausak nawn kei ding hi.

Isaiah 26:1

Tua ni ciangin Judah gam sungah hih la kisa ding hi: “Khuapi muanhuai khat i nei hi; Topa mahmah in i kulhte leh i panmun kipte hong hut sak hi.

Isaiah 2:17

Mite’ kiliatsakna kiniamkhiat ding a, mite’ kiphatsakna a niamin kikoih suk ding hi; tua ni ciangin Topa bek a lianin kikoih ding hi.

Isaiah 2:11

Mite’ kiliatsakna pen kiniam koih ding a, mihingte’ kiphatsakna pen kiniam khiat ding hi; tua ni ciangin Topa bek a lianin kikoih ding hi.

Late 23:2

Lo nona-ah keimah hong lumsak a, tui kiangah kei hong paipih hi.

Zekhariah 9:10

Gal kidona leengte, Israel gam pan beisakin, sakol galkapte, Judah gam pan ka la khia ding a, galdona-a kizang thalte, kisusia ding hi. Na kumpipa un, minamte lakah kilemna thu gen ding a, amah in, tuipi mong khat pan tuipi mong khat dong, Eufrates gunpi panin leimong dongin uk ding hi.

JOB (Job) 5:22

Suksiat ding leh puksih dingte na nuihsan lel ding a, leitung gamsate na kihta kei ding hi.

Late 148:10

Gamsate leh innsate khempeuh, a bokvak ganhingte leh a leeng vasate!

Isaiah 32:18

Ka mihingte pen kilem tak-a teen’na lungmuang tak-a omna inn, daii tak-a tawlngakna munah om ding uh hi.

Ezekiel 39:1

Topa Pasian in kei kiangah, “Ezekiel aw, Gog mawhsakna thu gen in la, Topa Pasian in hih bangin ci hi, ci-in gen in: Meshek leh Tubal minamte a ukpipa Gog aw, keimah in nangma lang khatah a pang ka hi hi.

Isaiah 54:5

Bang hang hiam cih leh nangmah hong Bawlpa in na pasal hi a, ama min in Vanglianpen Topa ahi hi; Israelte’ Siangtho Pa in nangmah hong Tankhia-pa hi a, amah pen leitung buppi’ Pasian kici hi.