Hosea 2:15 - Tedim Bible

¹⁵ Tua lai panin a leenggui lote ka pia kik ding a, Lungkhamna Kuam pen lametna kongpi ka suaksak ding hi. Izipt panin a paikhiat a nungakno hun lai mah bangin ka thugennate hong ngai ding hi.

Tedim Bible Revision 2017

¹⁵ Tua lai panin a leenggui lote ka piakik dinga, Lungkhamna Kuam a cihnopna Akhor Kuam pen lametna kongpi ka suaksak ding hi. Egypt panin a paikhiat, a nungak no hun lai mah bangin ka thugennate hong ngai ding hi.

Hosea 2:15 Referans Kwoze

Ezekiel 28:26

Tua gam sungah lungmuang takin teeng ding uh a, amaute in inn lamin, leengguite suan ding uh hi. Israel mite a simmawh minam dangte daan ka pia ding a, Israel mite ahih leh lungmuang takin om hithiat ding uh hi. Tua ciangin keimah in Topa amau’ Pasian ka hihna thu thei ding uh hi,” hong ci hi.

Jeremiah 2:2

“Pai in la, Jerusalem khua’ zak dingin va tangko in: Topa in hong cih-inah, Na khangno lai-a nong kipiakna, na mothak lai-a nong itna, a kikho nai lo gamlak-a kei’ nung nong zuih hun lai ka phawk hi.

Hosea 11:1

Israel a neu lai-in ka it mahmah a, Izipt gam a nusiat-a kipanin ka tapa aw, ka ci hi.

Joshua 7:26

Tua ciangin amaute in tu ni donga a om suang honpi Akhan tungah ciang uh hi; tua ciangin Topa’ heh luatna dai hi. Tua ahih ciangin tu dongin tua mun in Akhor Kuam, kici hi.

Sawltak 14:27

A tun’ uh ciangin pawlpite kikhawmsak uh a, amaute tungah Pasian’ bawlna leh Gentailte ading thu upna kong kihon’na thu teng a zasak uh hi.

Johan 10:9

Keimah in kongpi ka hi hi. Mi khat in kei tung tawnin a lut leh, gal tawh kipelh ding a, sungtum pusuakin an nek ding lonona mun a mu ding hi.

Amos 9:14

Ka mi Israelte, amaute’ gam ka tun’ kik ding a, a kisia a khuapite uh lampha kikin, a sungah teeng ding uh hi. Amaute in leenggui suanin, a zu dawn ding uh a, huan bawlin, a sunga piangte ne ding uh hi.

Ezekiel 16:60

Ahi zongin na neu lai-a nang tawh i thuciamna lenkipin, a kimang tawntung ding thuciamna nang tawh ka bawl ding hi.

Ezekiel 16:22

Hih bangin numei paktat nuntakna tawh a mindai huai-in na om lai takin na neu lai thu, tangguakin na om lai, sisan naisan lak-a na kitomtom lai thu na phawk kha kei hi.

Ezekiel 16:8

“Nang kong muhkhak kik ciangin pasal nei thei ding hun na hita hi. Na pum guak-a a om kimlai, ka puan tawh kong khuh a, na zumhuaina teng hong seelsakin, teen’pih dingin kam kong ciam hi. Kong kamciamna tangtung sakin nang in keima aa nong suak hi,’ Topa Pasian in ci hi.

Isaiah 65:21

Amaute in inn lam ding uh a, a sungah teeng ding uh hi; amaute in leenggui lo bawl ding uh a, a gah ne ding uh hi.

Zekhariah 9:12

Lametna a om ta, no salte aw, ciahkik un la, a muanhuai na mun ngei uh zuankik un. Note’ thuaknasa a zah nihin, thupha ka hong piak nading, tu ni-in note kiangah ka hong gen hi.

Kah la 3:21

Ahi zongin ka phawk giugiau thu khat in lametna khat hong nei theisak hi.

Jeremiah 32:15

Bang hang hiam cih leh a vanglian Topa, Israel mite’ Pasian in a hong gen-inah: Hih gamah innte, lote leh leenggah lote mite in a lei kik ta ding hi, hong ci hi,” ci-in ka gen hi.

Late 106:12

Tua ciangin amaute in ama thu um uh a, amah phatna sa uh hi.

Gamlak-vakna 21:17

Tua ciangin Israel mite in hih la sa uh hi: “Tuikhuk aw, Phul in!—La sak un!

Hosea 12:9

Izipt-te gamah na om lai pek uh-a kipanin keimah in note’ Topa Pasian ka hi a, ahi zongin tu-in tanglai hun bangin puanbuk sungah note kong tengsak kik ding hi.

Isaiah 65:10

Amaute in kei hong zong ding uh a, Sharon gam pen amau’ tuu hon gamtatna mun suaksakin, Akhor Kuam pen amau’ bawng honte’ lupna mun a suaksak ding uh hi.

Hosea 2:12

Ka pasal it dangte in thaman-a hong piak hi, ci-a a gen leengguite leh a theikungte ka susia ding a, gamsate in tuate suksiatsakin gamlakpi suak ding hi.

Late 129:1

“Amaute in ka neu lai-a kipanin nakpi takin kei hong gim sak uh hi,”Israel in tu in ci ta hen—

Jeremiah 2:1

Topa in kei hong hopih a,

Jeremiah 3:4

Tu mahin kei nong sam a, ‘Ka pa aw, ka neu lai pek pan-a ka lawm na hi hi—

Jeremiah 29:11

Bang hang hiam na cih uh leh Topa in kong cih-inah, note’ mai lamah lametna kong piak ding, na siat nading uh hi loin na phattuam nading uh geelna ka neihte kei bek in ka thei hi.

Ezekiel 28:25

Topa Pasian in kei kiangah, “Minam tuamtuamte lak-a ka thehthangna panin Israel mite ka kaikhawm kik ding a, keimah in a siangthopa ka hihna thu minam khempeuh in thei ding uh hi. Tua ciangin ka nasempa Jakob ka piak leitang ahi, amaute’ gam sungah Israel mite teeng ding uh hi.

Hosea 12:13

Topa in kamsang khat zangin Izipt panin Israelte paikhiatpih a, kamsang khat nasepna tawh amaute suakta-in nungta uh hi.

Hosea 13:4

Keimah in Izipt gam pana kipan note’ Topa Pasian ka hi hi. Tua hun lai-in kei sim loh Pasian dang na thei kei uh a, note a hong honkhiapa in kei bek ka hi hi.

Thukhente 8:34

Israel mite in, mun khempeuh panin amau’ galte’ khut sung pan a honkhia Topa a Pasian uh phawk lo uh hi;

1 KUMPI MASATE 16:31

Nebat’ tapa Jeroboam’ khialhnate zuih ding ama adingin a thu zang tawh a kibat mah bangin, amah in Sidon mite’ kumpi Ethba-al’ tanu Jezebel zi-in la a, pai-in Baal’ na semin bia hi.