Haggai 2:22 - Tedim Bible

²² Kumpi gam khempeuh lumletin a vangliatna uh a beisak ding ka hi hi. Leengte leh leeng hawlte ka lawnthal ding a, sakol leengte leh a tung tuangte puk ding uh a, amaute khat leh khat kithat lum ding uh hi.

Tedim Bible Revision 2017

²² Kumpipaʼ gam khempeuh lumletin a vangliatna uh a beisak ding ka hi hi. Leengte le leeng hawlte ka lawnthal dinga, sakol leengte le a tung tuangte puk ding uh a, amaute khatlekhat kithat lum ding uh hi.

Haggai 2:22 Referans Kwoze

Micah 5:10

Topa in hih bangin ci hi: Tua hun ciangin na sakolte uh hong paihkhiatsakin, na leengte uh ka susia ding hi.

Thukhente 7:22

Amaute in peengkul zathumte a tum uh ciangin, Topa in giahphuala om mi khempeuh a namsau uh tawh amau leh amau kisat gawpsak hi; tua ciangin galkapte Zererah lam Bethshittah ciang, Tabbath kiang Abelmeholah gamgi dong tai uh hi.

Mattiu 24:7

Mi nam khat leh nam khat, gam khat leh gam khat hong kido ding uh hi. Mun khat khatah kial hong tung ding a, ziin hong liing ding hi.

Zekhariah 10:11

Amaute in, lungkhamna tuipi a phutkhak uh ciangin, keimah in tuipi hualte ka vatmai ding a, Nail gun tuithukte kangcip ding hi. Assiria mite ka niamkhiat ding a, Izipt in a vangliatna taan ding hi.

Zekhariah 4:6

Tua ciangin vantungmi in kei kiangah, “Topa in Zerubbabel’ tungah hih bangin thu gen hi; Thagum hat hang hi lo, vangliatna hang zong hi lo, keima tung panin na ngah Kha hang bek tawh na ma na tun’ zo ding hi.

Zefaniah 3:8

Topa in hih bangin thu gen a, “Tua ahih ciangin minamte ka mawhsak ni hun dong kei hong ngak phot dih un. Minamte leh kumpi gamte kaikhawmin, ka hehna ka thuaksak ding, ka lungsim ka khentat khin hi. Ka heh luatna meikuang tawh, leitung khempeuh kangtum ding hi.

Micah 5:15

Ka thu hong mang lo minamte tungah hehna tawh phu ka la ding hi.

Ezekiel 39:20

Amaute in ka sabuai tungah, sakolte leh a tunga tuangte, galkapte leh galkap mangte’ sa, a nek zawh zahzah uh ne ding uh hi. Topa Pasian in hih thu ka gen khin hi,” hong ci hi.

Late 46:9

Amah in leimong dong ah gal beisak hi; amah in thalpi kuaitanin, teipi susia a, leengte mei tawh haltum hi.

Daniel 8:25

A lungsim daplan lua ahih manin zuau phuah siamna tawh a hih peuhpeuh a tangtun’ ding hi. Amah kiliansak lua-in, theihkholh lohin mi tampi susia-in, a lianpen kumpite’ kumpipa nangawn a langpan’ ding hi. Ahih hangin mihing thahatna kizang loin amah a kisusia ding hi.

Late 76:6

Jakob’ Pasian aw, nangma thuhilhna hangin sakol leh a tung tuangpa khawlcip uh hi.

Mangmuhna 11:15

Sagihna vantungmi in peengkul a tum ciangin, “Hih leitung gam in i Topa leh ama Khazih gam a suak zo hi. Amah in a tawntungin a uk ding hi,” ci-in vantungah nakpi-in a genna aw ka za hi.

Zekhariah 14:3

Tua ciangin Topa hong kuankhia ding a, a beisa hun-a a sim ngei bangin hih minam dangte hong sim ding hi.

Zekhariah 9:10

Gal kidona leengte, Israel gam pan beisakin, sakol galkapte, Judah gam pan ka la khia ding a, galdona-a kizang thalte, kisusia ding hi. Na kumpipa un, minamte lakah kilemna thu gen ding a, amah in, tuipi mong khat pan tuipi mong khat dong, Eufrates gunpi panin leimong dongin uk ding hi.

Micah 5:8

A om lai Israel mite pen minam dangte lakah, gamlakah sa a beng, tuute a tuah ciangin manin balnen gawp a, a kam sung pan a honkhia zo a om lo, humpinelkai bang ding uh hi.

Ezekiel 21:27

Siacip! siacip! Hih khuapi ka siacimitsak ding a, a mel a mang zong kimu lo ding hi. A uk dingin a kilawm mipa hong om ciang bekin ama khut sungah ka pia ding hi.

Isaiah 60:12

Bang hang hiam cih leh nangma na hong sem lo minam leh kumpi gam beimang ding hi; tua minamte kisia maimang ding hi.

Isaiah 19:2

Izipt mite amau leh amau ka kitawngsak ding hi, mi kim in sanggam khat leh khat ama vengte ciat do ding a, khua khat leh khua khat kido-in, mi khat leh khat, kumpigam khat leh khat kumpi-za kituh ding hi;

Isaiah 9:19

Vanglianpen Topa’ hehna hangin meikuang bangin gamsung kang a, mite pen mei-a kicih sing tawh kibang uh hi; kuamah in a sanggampa zahtuan lo hi.

2 KHANG TANGTHU NIHNATE 20:22

Amaute in la sa-in phat ding a kipat uh ciangin, Judah mite do dingin a hong pai Ammon mite, Moab mite, leh Seir Mual gam mite a pangsim ding Topa in koih a, amaute kizo hi.

1 SAMUEL MASA 14:16

Benjaminte’ gam sunga Gibeah-a Saul’ galvilte in en uh hi; en in, alang alangah mihonte kikhin maimai hi.

Paikhiatna 15:19

Bang hang hiam cih leh Faro’ sakolte ama' leengte tawh, a sakol tuangte tuipi sungah a pai ciangin, Topa in tuipi tuite amaute tuumsak kik hi; ahih hangin Israel mite tuipi laizang leikeu tungah pai uh hi.

Paikhiatna 14:28

Tui hong luangkikin leengte leh sakol tuangte leh tuipi sungah amaute a delh Faro’ mi honpite khempeuh tuum hi; amaute khat zong suakta lo hi.

Paikhiatna 14:17

Amau’ nungah amaute hong pai-in, keimah in Faro leh a mi honpite khempeuh, a leengte, a sakol tuangte ka zawhna hangin minthan’na ka ngah nading hi. Keimah in Izipt mite’ lungsim ka khauhsak ding a, amaute in hong nungdelh ding uh hi.

Paikhiatna 15:4

“Faro’ leengte leh a galkap honpite amah in tuipi sungah lawn a, a kitengkhia ama uliante San Tuipi sungah tum hi.

2 KHANG TANGTHU NIHNATE 20:23

Bang hang hiam cih leh Ammon mite leh Moab mite in Seir Mual-a teengte do dingin kipanin amaute susia mang uh a, Seir-a teengte a beisak khit uh ciangin amaute khat leh khat kisusia uh hi.

Ezekiel 26:16

Tuipi a zang minamte’ kumpite, a kumpi tokhom tung uh panin kum khia ding uh a, a kumpi puante uh leh a puan hoih silhte uh suah khia-in, lei lakah tu-in, lau-in a liing ding uh hi. Nangma thuakna hong muh manun lau mahmah ding uh a, a ci-liing uh pha thei lo ding uh hi.

Ezekiel 38:21

Gimna a tuamtuamte tawh Gog ka lausak gawp ding hi. Topa Pasian in hih thu ka gen khin hi. Ama mite khat leh khat namsau tawh kisat gawp ding uh hi.

Amos 2:15

Thal tawite nangawn in do zo lo ding a, a tai hatte nangawn kisuahtak zo lo ding a, sakol tung tuangte nangawn in a nuntakna suahtak zo lo ding hi.

Micah 7:16

Minam dangte in hih thu mu ding uh a, minam thahat hi napi-in maizum ding uh hi. Lamdang sa-in kam khat zong pau lo ding uh a, hih thu a zakzakna-un a bil uh ngong liang ding hi.

Zekhariah 10:5

Kongzing buannawng lakah, a galte a tuancil gawp galkapte bangin, amaute gualzo ding uh a, Topa in a ompih manin amaute in galdo ding uh a, a galte’ sakol galkapte zo gawp ding uh hi.

2 KHANG TANGTHU NIHNATE 15:6

Pasian in lungkhamna nam khempeuh tawh buaisak ahih manin minam khat leh minam khat, khuapi khat leh khuapi khat kido-in amaute kitamkham uh hi.

Micah 5:9

Israel mite in a galte’ tungah a khutte uh lamto-in, a gal khempeuh uh zo gawpin susia mang ding uh hi.

Zekhariah 12:9

Jerusalem sim ding a hanciam minam khempeuh, tua ni ciangin ka susia ding hi.