Ezra 9:9 - Tedim Bible

⁹ Kote in sal ka hi takpi uh hi; ahi zongin ka salsuahna uhah ka Pasian un hong nusia lo a, kote’ Pasian’ inn puahkikin ka din’sakkik theih nading uh leh Judah leh Jerusalem ah kidalna kulh ka neih theih nadingun kipat thakna a hong piak theih nadingin Persia kumpite ko tungah a thunuam dingin hong bawlsak hi.

Tedim Bible Revision 2017

⁹ Kote pen sal ka hi takpi uh hi; ahi zongin ka salsuahna uh ah ka Pasian un nong nusia kei a, koteʼ Pasianʼ biakinn puahkikin ka dinsakkik theih nading uh le Judah le Jerusalem ah kidalna kulh ka neih theih nadingun kipat thakna na hong piak theih nadingin Persia kumpite ko tungah a thunuam dingin nong bawlsak hi.

Ezra 9:9 Referans Kwoze

Ezra 7:6

hih Ezra pen Babilon panin hong paito hi. Amah pen Israel Pasian, Topa in a piak Moses thukham a siam lai thei mi khat ahi hi; Topa ahi ama Pasian in ompih ahih manin ama nget khempeuh kumpipa in pia hi.

Zekhariah 2:5

Tua khuapi a hu dingin meikulh bangin Topa mahmah a om nading, leh tua khua sungah a minthan’na tawh a teen’ nading thu, Topa in kamciam zo hi, ci-in va gen in,” a ci hi.

Haggai 1:9

An hau dingin na kilamet uh hangin tawmcik bek na nei uh hi. Na neihsunte nangawn uh inn na tun’pih uh hangin kong mutkhiatsak mang khin hi. Bang hangin hong tua cih ka hi hiam? Note khempeuh, nomau’ inn ding ciat lamin na manlah uh a, ka biakinn a siapi-in na koihdakna hang uh ahi hi.

Daniel 9:25

Hih thu ciamteh in la, thei in: Jerusalem lamkik nading thupiak khiat huna kipan sathau kinilhpa’ ukpa hong pai dong nipi kalsagih leh nipi kal sawmguk leh nih ahi ding hi. Jerusalem kongzing lampi nei leh kulhpi nei-in kilamkik ding a, ahih hangin buai hun sung ahi ding hi.

Ezekiel 11:16

Tua ahih ciangin na salpihte kiangah hih bangin keima thugente va gen sawn in: A gamlapi gamah a teeng dingin puak khia-in, gam dangah a thehthangpa in keimah ka hi hi. Ahi zongin amaute’ omna gam dangah tawl khat sung bek kei a hong bia dingin ka om sak ahi hi.

Isaiah 5:5

Tu-in, ka leenggui lo tungah ka hih ding note tungah kong gen ding hi. A daai ka lakhia ding a, kinemang ding hi; a gawl ka susia ding a, kituancil ding hi.

Isaiah 5:2

Amah in lei to-in suangte paikhia a, leenggui hoihte a suan hi; amah in a laizangah tausang khat lam a, tua sungah leenggah sukna khuk khat a to hi; amah in leenggah hoih hong gah ding lamen a, ahih hangin gam leenggah hong gah mawk hi.

Ezra 7:8

Kumpipa’ uk kum sagih a cin’ kum, a kha ngana sungin Jerusalem tung uh hi;

Ezra 9:10

“Kote’ Pasian aw, hih bang hi khin ahih ciangin kote in bang gen thei nawn ding ka hi uh hiam? Bang hang hiam cih leh kamsang na nasemte tungah thu pia-in, ‘Note va lutin na luah ding uh gam in, tua gam a, a na teeng gamdang mite in ninsakin, a kihhuai a gamtatnate uh tawh mong khat pan mong khat dongin a ninsa gamnin ahi hi. Tua ahih ciangin na tanute uh amau’ tapate tawh kitengsak kei un la, na tapate uh zi dingin amau’ tanute zong la kei un. Amaute’ phattuam nading leh mavan’ nading hanciam kei un. Tua bang hi leh note tha hatin tua gam-a piangte nuam takin na ne ding uh a, na tate un a luah tawntung dingin tua gam na piasawn thei ding uh hi,’ ci-in na thupiaknate ka zui kei uh hi.

Late 109:12

Ama tungah migitna kuamah in lak kei hen la, pa nei lo ama tate, kuamah in hehpih kei ta hen!

Late 138:7

Haksatna tuamtuamte ka thuak ciangin kei nong kem hi; a heh ka galte, kei’ tangin nong dosak a, na thahatna tawh kei nong honkhia hi.

Isaiah 14:3

A haksa nasep hong kisep sakna, gimna, salsuahna leh lungkhamna panin Topa in note tungah tawldamna hong piak ciangin,

Ezra 2:68

Amaute Jerusalem-a Topa’ inn a tun’ uh ciangin Pasian’ inn ama mun ngei-ah lamkik nadingin innkuan lutangte pawlkhat in Pasian’ inn adingin piakna bawl uh hi;

Nehemiah 2:17

Tua ciangin amaute kiangah, “I lungkhamna thu na thei uh hi. Jerusalem a siasa-in omin, a kongpite mei in kangtum hi. Hong pai un, zahkona i ngah nawn loh nadingin Jerusalem kulh ciang pha ni,” ka ci hi.

Nehemiah 9:17

Amaute in thu mang nuam lo uh a, amaute lakah na bawl nalamdangte ngaihsun kha lo uh hi; amaute lung khauh niloh uh a, a salsuahna uh Izipt-ah a paipih kik dingin makai khat seh uh hi. Ahi zongin nang in mawhna a maisak nuam, dikin hehpihna a nei, lungduai-in itna kip a nei Pasian na hi a, amaute na nusia tuan kei hi.

Isaiah 61:4

Amaute in tang lai-a a siasate lampha ding uh a, a kisiamai-sate ding kiksak ding uh hi; amaute in khang tampi sung a kisia maisa khuapi siate puahkik ding uh hi.