Daniel 2:37 - Tedim Bible

³⁷ Kumpipa aw, kumpi khempeuh lak pan nang a lianpen na hi hi. Vantung Pasian in nang kumpi-in hong koih a, ukna, vangliatna, thahatna leh minthan’na hong pia hi.

Tedim Bible Revision 2017

³⁷ Kumpipa aw, kumpi khempeuh lak pan nang a lian pen na hi hi. Vantung Pasian in kumpi-in nang hong koih a, vangliatna, thahatna le zahtakna a hong pia hi.

Daniel 2:37 Referans Kwoze

Ezekiel 26:7

“Tua ciangin kumpi khempeuh lak panin a lianpen ahi Babilon kumpipa Nebukhadnezzar, nang Tai-ar khuapi a sim dingin kong paipih ding hi. Amah leilu lam gam pan hong kipanin galkap honpi, sakolte leh a leengte, leh sakol galkap honte hong tonpih ding hi.

Daniel 5:18

Sangpen Pasian in na pa Nebukhadnezzar kumpi lianin koih a, zahtakna leh vangliatna a pia hi.

Isaiah 47:5

Babilon aw, gamdai takin tu in la, khuamialna sungah pai in; bang hang hiam cih leh nang pen, kumpi gamte’ kumpinu hong kici nawn lo ding hi.

Late 62:11

Pasian in khatvei thu gen khin hi, ke’n hih thu nihvei za khin ing; vangliatna in Pasian’ neihsa ahi hi;

Ezra 7:12

“Kumpite’ kumpi ahi Artakzaksis kiang panin vantung Pasian’ thukham a siam, siampi hi-in lai theipa lah ahi Ezra tungah:

Ezra 1:2

“Persia kumpipa Sairas in hih bangin ci hi: Vantung Pasian, Topa in leitung kumpi gam khempeuh keima tungah hong piakhin a, Judah gam sung Jerusalem khua ah ama adingin inn khat ka lamsak ding hong sawl hi.

Mangmuhna 17:14

Amaute in Tuuno tawh a kido uh ciangin Tuuno in amau a zo gawp ding hi. Bang hang hiam na cih uh leh, amah in topate’ Topa, kumpite’ Kumpipa ahi hi. Kiteelkhia, kisamin, thuman mi ahi Topa tawh a omkhawm mite in zong a zo gawp ding uh hi,” ci-in kei kiangah hong gen hi.

Mangmuhna 5:12

Tua vantungmite in: “Thahna a thuak Tuuno in, vangliatna, hauhna, pilna, hatna, pahtawina leh phatna thuphate ngah dingin a kilawm hi,” ci-in nakpi-in kiko-in a phat uh hi.

Mangmuhna 4:11

“Kote’ Topa, kote’ Pasian aw, nang in na khempeuh na piangsak a, Nangma deihna hangin piangin a om uh ahih ciangin, tua minthan’na, pahtawina leh vangliatnate ngah dingin na kilawm hi.” ci-in a phat uh hi.

Johan 19:11

Zeisu in, “Tung lam pan thu na ngah kei leh, kei tungah bangmah na hih thei kei ding hi. Tua ahih ciangin nangma khut sungah kei a hong piapa in khialhna golzaw a nei hi,” ci-in a thuk hi.

Mattiu 6:13

Kheemna hong thuaksak kei in. Gilopa kiang pan hong honkhia in,” ci-in tua bangin thu na ngen un,

Hosea 8:10

Tua bangin mi namdangte a cial hangun keimah in amaute kaikhawmin daan ka pia ding hi. Assiria kumpipa’ bawlsiatna tawh a sawt loin gimna ngah ding uh hi.

Daniel 4:34

A kisehsa hun a cin’ ciangin keimah Nebukhadnezzar in vantung lam ka ento a, ka khua theihna a hong tungkik hi. A nungta tawntung Sangpen Pasian’ min phatin, zahtakna leh minthan’na hih bangin ka pia hi: “Amah in a tawntungin uk ding a, a gam in a kip tawntung ding hi.

Daniel 4:32

Mite sung pan hong kihawlkhia ding a, gamsate tawh na teeng khawm ding hi. Bawngtal bangin kumsagih sung lopa na ne ding hi. Tua ciangin Pasian in mihingte’ kumpigam uk a, a teel mi peuhpeuh kumpi a suaksak thei hi na ci ding hi,” a ci hi.

Daniel 4:25

Mite sung panin hong kihawlkhia ding a, gamsate tawh na teeng khawm ding hi. Bawngtal bangin lopa na ne ding a, pua lamah lumin, kumsagih sung na tungah daitui a hong kia ding hi. Tua ciangin Sangpen Pasian in mihingte’ kumpigam uk a, a teel mi peuhpeuh kumpi a suaksak thei hi na ci ding hi.

Daniel 4:3

Pasian hong lah nalamdangte, bang zahin lian ahi hiam! A bawl nalamdangte, bang zahin vanglian ahi hiam! Pasian in a tawntungin kumpi hi ding a, Amah in a tawntungin a uk ding hi.

Jeremiah 28:14

Bang hang hiam cih leh a vanglian Topa Israel mite’ Pasian in kong gen-inah: Hih gam khempeuhte’ ngawngah sik hakkol ka thuah khin zo a, amaute in Babilon kumpipa Nebukhadnezzar’ na a sem ding uh hi. Bang hang hiam cih leh gamsate nangawn ama’ tungah ka pia khin zo hi,’ va ci in,” a ci hi.

Isaiah 10:8

bang hang hiam cih leh amah in, “Ka galkap mangte pen kumpi vive hi khin hilo ahi hiam?

Paunak 8:15

Kumpite in a gam mite a uk nading, mi ukte in ngeina maan a zat theih nadingin ka huh hi.

2 KHANG TANGTHU NIHNATE 36:23

“Persia kumpipa Sairas in hih bangin ci hi, ‘Vantung Pasian, Topa in leitung kumpi gam khempeuh kei hong pia khin a, Judah gam sung Jerusalem khua ah ama adingin inn khat ka lamsak ding hong sawl hi. Note lakah ama mi ahi khempeuh, Topa a Pasian uh in ompih ta hen. Inn lam dingin Jerusalem ah amaute paito sak un,’ ci hi,” a ci hi.

1 KUMPI MASATE 4:24

Bang hang hiam cih leh amah in Eufrates nitumna lam gamsung khempeuh Tifsah panin Gaza ciang dong, Eufrates nitumna lam pang kumpi khempeuh tungah ukna nei hi; ama kiim mun khempeuh ah kilemna om hi.

Mangmuhna 19:16

Ama puanza tung leh a phei tungah, “kumpite’ Kumpi, topate’ Topa” ci-in min a kigelh hi.

2 KUMPI NIHNATE 25:28

amah in migitna kam tawh amah hopih a, Babilon sunga amah tawh a om kumpi a mat dangte khempeuh sangin a sangzaw-in amah pahtawi hi.

Jeremiah 34:1

Babilon kumpipa Nebukhadnezzar in a galkapte khempeuh tawh, a ukna gam khempeuh leh a mi khempeuh tawh Jerusalem khua leh a kim-a khuapite a sim laitakin Topa in Jeremiah hopih a:

Daniel 1:2

Topa in, Jehoiakim kumpipa leh biakinnpi’ na manphate Nebukhadnezzar kumpipa a mansak hi. Amah in a mi matte Babilon gam ama pasian biakinnah paipih a, na manpha a matte sum koihna innah a koih hi.

Daniel 2:44

Tua kumpite a maan’ lai takun, vantung Pasian in a bei thei ngei lo ding kumpigam a hong phut ding hi. Tua kumpigam kuamah in zo zo lo ding a, tua gam in gam dang khempeuhte zo gawpin, a kip tawntung ding hi.

Daniel 4:22

Kumpipa aw, nangmah in tua singkung na hi hi. Nang na lian a, na thahat hi. Nakpi takin khanga lian mahmah na hih manin vantung dong na banto a, na vangliatna in leitung khempeuh ah a kizel hi.

Daniel 7:14

Amah in vangliatna, minthan’na leh kumpi za ngah ahih manin, minam kimte, minam tuamtuamte, paunam tuamtuamte khempeuh in ama na a sem ding uh hi. Amah in a tawntungin uk ding a, a kumpi gam a bei ngeikei ding hi.

Daniel 2:31

“Kumpipa aw, na mangin a tee daldal milim lian mahmah khat na mu a, kihtak huai mahmahin na mai-ah a ding hi.

Daniel 4:19

Tua ciangin Belteshazzar zong a kici Daniel in a lungmang lua ahih manin tawmvei sung bangmah gen thei loin a om hi. Kumpipa in, “Belteshazzar aw, mang leh a khiatna huhau in na lung mangsak zenzen kei in,” a ci hi. Belteshazzar in, “Kumpipa aw, na mangmat leh a khiatna pen na galte tungah tungzaw hen.