Amos 8:10 - Tedim Bible

¹⁰ Na lungdam pawite uh dahna ka suaksak ding a, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun in a tawp dongin nasia semsem ding hi.

Tedim Bible Revision 2017

¹⁰ Na lungdam pawite uh dahna ka suaksak dinga, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun pen a tawp dongin nasia semsem ding hi.

Amos 8:10 Referans Kwoze

Jeremiah 6:26

Ka tanu aw, ippi puan silh in la, vut lakah kikhuk in. Tapa khat neihsun sih suah bangin kap vangvang in, bang hang hiam cih leh a hong susia dingpa thakhat thu-in hong pai ding hi.

Zekhariah 12:10

David’ suan-le-khakte leh Jerusalem khuamite tungah, hehpihna leh thunget nopna lungsim ka guan ding hi. Amaute in a sut lup uh mipa enin, ta khat neihsun a sihsuahte bangin kap ding uh a, a tacil a khuaisuahte bangin nakpi takin kapin thuum ding uh hi.

Ezekiel 7:18

Amaute dahna limin puanhampi silh ding uh a, pumliin’ gawp ding uh hi. A sam uh kimettolsak ding a, a min uh dai ding hi.

Jeremiah 48:37

“Mi khempeuh in a lu uh met tol uh a, a khamul uh kiatsiang uh hi. A khutte uh kui kek uh a, a kawng uhah ippi puan a teeng uh hi.

JOB (Job) 20:23

Amah in a duh duh ne mai hen! Pasian in hehna tawh daantat ngawn ding hi.

Hosea 2:11

Ama lungdam theihna, a kumsim pawite, a khasim pawite, a nipi sim pawite, a biakna kikhop khempeuh ka beisak ding hi.

Nahum 1:10

Amaute, linglom bangin om uh a, zu leh sa tawh kidiahin a om lai takun ham bangin kihaltum ding hi.

Amos 8:3

Tua ni ciangin kumpi inn sunga lungdam lasakna awgingte, kahna awging suak ding hi. Mun khempeuhah mi siluang dim ding a, mun citengah kipaithangin gamdai ding hi,” Topa in ci hi.

Amos 5:23

La sa-in na gamlumnate uh khawl un; na lasakna uh a gingte ka za nuam kei hi.

JOB (Job) 3:5

Khua niim leh khuamial in khuhcip hen. Tua ni-in meiipi zing hen la, tua ni awk in valh tum hen.

Thu-hilhkikna 16:14

na pawi sungah nang leh na tanu leh na tapa, na nasem numei leh na nasem pasal Levi mi, peemta, pa nei lo, leh na khua sunga om meigong numeite tawh na lungdam khawm ding uh hi.

Piancilna 21:16

Tua ciangin amah pai-in a hoih khop khat a gamla, thal lot khat tan bangah a ta nungngatin tusuk hi; bang hang hiam cih leh amah in, “Naupang’ sih hong musak kei in,” ci hi. Amah nungngatin a tut lai takin naupang in a aw sangsakin kap hi.

Siampi Laibu 13:40

“Mi khat a sam pulh a, a lu a tol hangin amah a siang ahi hi.

Isaiah 3:24

Paknamtui tangin uihna; kawnggak tangin khauhualpi; lim tak-a kizem sam tangin lu kolhna; puan hoih tangin puanhampi; mel hoihna tangin maizumna hun hong tung ding hi.

Jeremiah 2:19

Na gitlohna mah in nangmah hong thu hilh ding-a, na thu up nawn lohna in nangmah hong mawhsak ding hi. Topa na Pasian nong nusiat ciang, kei nong kihtak nawn loh ciangin, nuam hetlo-a kha keei hi, cih thu thei in la, mu in, a vanglian Topa Pasian in kong ci hi.

Kah la 5:15

Lungnopna teng bei khin a, lungdamna teng lungkhamna a suak hi.

Ezekiel 7:2

“Ezekiel aw, Topa Pasian ahi keimah in Israel leitang tawh kisai-in ka gen thu in hih ahi hi: A beina hita! Gam buppi a beina hita hi.

Joel 1:8

Nungak khat, a ten’pih ding a lawmpa in a sihsan ciangin puanhampi silh a, a kah bangin, note zong kapin thuum un.

Amos 5:21

Na biakna pawite uh mudahin ka deih kei a, na biak kikhopna te uhah ka lung a kim kei hi.

JOB (Job) 30:31

Nidangin lungdamna la kisa ka zakna mun-ah, thuumna leh kahna aw bek ka za ta hi.

Hosea 2:13

Kei hong mangngilh tan vei sung, Baal pasian tungah paknamtui a hal tan vei sung, leh a pasal it dangte tawh kikhawl dingin a manpha kizepna a tuamtuamte tawh a kizep hun tan vei sung zah mah daan ka pia ding hi.