2 PETER NIHNA 1:3 - Tedim Bible

³ Tua mah bangin ama minthan’na leh ama dikna tawh hong sam Pasian’ theihtel pilna hangin, eite nuntakna leh Pasian lamah nopsakna tawh kipawl na khempeuh ama vangliatna siangtho a hong pia zo hi.

Tedim Bible Revision 2017

³ Ama minthanna le a hoihnate a neikhawm dingin a hong sam pa i theihna hangin Pasianʼ deih bangin biakna mantak i nuntak theih nadingin ama vangliatna in eiteʼ kisap na khempeuh a hong pia hi.

2 PETER NIHNA 1:3 Referans Kwoze

1 PETER MASA 5:10

Khazih hangin note, ama vangliat tawntung minthan’na ah hong sam, hehpihna thupha khempeuh’ Pasian in tawlkhat gimna na thuak khit uh ciangin, hong cingsak, hong kipsak, hong khauhsak ding hi.

2 TIMOTI NIHNA 1:9

Tua Pasian in eite gamtatna hang hi lo, tang lai a hun hong tun’ ma-in, Khazih Zeisu sungah eite ading ama hanciamna leh a hong piak hehpihna a ngaihsut kholhsa bangin eite hong gumkhia a, a siangtho sapna tawh hong sam hi.

Late 84:11

Bang hang hiam cih leh Topa Pasian in eite hong hupa leh a minthang i Kumpi hi a, maipha leh pahtawina hong pia hi. Thuman-a gamtate tungah Topa in na hoih bangmah siit lo hi.

ROM (Romans) 8:32

Ama Tapa khat bek haza lo a, eite khempeuh ading a piapa in man ngen loin nate khempeuh ama Ta tawh hong pia khawm loin a om ding hiam?

2 KORIN NIHNA 12:9

Ka thuum khit ciangin, “Ka hehpihna thupha in nang ading a kicing hi, ka vangliatna in thanemna ah a kicing hi,” ci-in thu hong pia hi. Tua ahih ciangin Khazih’ vangliatna in kei tungah hong tun’ nadingin ka thanemna hangin ka kisaktheih zawk nading ka utzaw hi.

1 PETER MASA 2:21

Bang hang hiam na cih uh leh, tua bang deihna in note hong sam zo hi. Khazih in zong note ading gimna thuak a, ama khekhap na zuih nadingun a lim a koih zo hi.

2 THESALONIKA NIHNA 2:14

Tua bang deihna hangin ka thu hilh uh Lungdamna Thu tawh note hong sam zo hi. Bang hang hiam na cih uh leh, note in i Topa Zeisu Khazih’ vangliatna na ngah nading uh ahi hi.

1 PETER MASA 2:9

Note na hih uh leh, khuamial sung pan a lamdang khuavak sungah a hong sampa’ vanglian hehpihna na lahkhiat nadingun, a hong teel mi pawl, man’na nuam a nei siampi pawl, mi siangtho pawl, Pasian in a uk, a neih mi pawlte na hi uh hi.

1 THESALONIKA MASA 4:7

Pasian in kihhuaina-ah eite hong sam ahi kei hi, sian’thona-ah hong sam hi.

1 PETER MASA 1:15

a hong sampa a siangtho mah bangin na hihna khempeuh uh na siangthosak un.

Efesa 4:1

Tua ahih ciangin a hong sapna thupha note in na ngah uh tawh kituakin na zuih nadingun, Topa hanga thongkia keimah in hansuahin kong zol hi.

1 KORIN MASA 1:9

I Topa ahi ama Tapa Zeisu Khazih tawh kipawlna sungah hong sam Pasian in ciam pelh mi ahi kei hi.

2 PETER NIHNA 1:2

Pasian leh i Topa Zeisu’ theihtel pilna hangin hehpihna thupha leh nopna in note tungah kicing takin om ta hen.

2 PETER NIHNA 1:5

Ahi hi. Tua thu hangin note in upna tungah hoihna, hoihna tungah lungpilna,

1 PETER MASA 3:9

Kitawng thuk kei un, kikosia kik kei un. Thupha na kipia un. Bang hang hiam na cih uh leh, note in thupha na luah nadingun hong sapsa mite na hi uh hi.

Kolose 1:16

Bang hang hiam na cih uh leh, tua Tapa hangin Pasian in vantung ahi zongin, leitung ahi zongin-ah a om khempeuh a kimutheite, a kimu thei lote, kumpi tokhomte ahi zongin uknate ahi zongin, a sang belnate ahi zongin, vangliatna ahi zongin, na khempeuh a piangsak hi. Tua Tapa hangah ahi zongin, tua Tapa ading ahi zongin na khempeuh a piangsak hi.

1 TIMOTI MASA 4:8

Bang hang hiam cih leh, pumpi ading kiseksakna in phattuamna tawmkha a pia thei hi; Pasian biakna lamah nopsakna in tu laitak nuntakna leh tu nung ciangin a piang ding nuntakna tawh kipawl thu kiciamna ngah a, na khempeuhah phattuamna hong pia thei hi,

Efesa 4:4

Note hong sapna lametna khat bek hangah hong koih ahih mah bangin, pumpi khat, Kha Siangtho khat bek a om hi.

Filippi 4:8

A khak bel thu in: ute naute aw, thuman thu tawh kipawl nate, zahtakhuai nate, adik nate, a siangtho nate, deihhuai nate, phathuai nate khempeuh ahi zongin, tatna pha khatpeuh peuh, thu phatna khatpeuh peuh tawh a kipawl nate ahi zongin na lungsim sung uhah na ngaihsun un.

Mattiu 28:18

Zeisu in amau kiangah va pai a, “Vantungah ahi zongin, leitungah ahi zongin, vangliatna khempeuh kei hong kipia zo hi.

Hebru 1:3

Tua a Ta in Pasian’ vangliatna meel leh pianlim hi a, ama vangliatna tawh na khempeuh kipin, eite mawhnate amahmah in a sian’sak khit ciangin, a sang mun vangliatna ziat lamah tu-in a om hi.

Late 110:3

Na mihonte mual siangtho tungah na makaih ciangin, utna lungsim tawh na mite hong kipia ding uh hi. Daitui bangin zingsang ciangin na khangnona nangma tungah hong tung ding hi.

1 PETER MASA 1:5

Tua luahna in a nunung bel hun ciangin hong kilat nadingin a kibawlkholsa-a om gupkhiatna i ngah nadingin i upmanin Pasian’ vangliatna in hong kipsak note ading, vantungah kikhol-a a om luahna ahi hi.

ROM (Romans) 9:24

Judah mipawl sung pan bek hi lo, Gentailte sung panin zong hong sap eite tungah a kicing vangliatna a kilat nadingin hong bawl leh, bang gen ding a om hiam?

Paunak 12:4

Zi hoih in a pasal’ minthan’na leh lungdamna hi a, a pasal a maizumsak zi in a pasal adingin a dam thei lo guhnatna tawh kibang hi.

Ruth 3:11

Tu-in ka tanu aw, lau kei in, na nget khempeuh nang adingin kong hih sak ding hi; bang hang hiam cih leh ka khuapih mite khempeuh in numei gina na hih lam thei uh hi.

Paunak 31:29

“Zi hoih tampi a om tei hangin, nang kan-a hoih kuamah om kei,” ci-in phat hi.

Paunak 31:10

Zi hoih in suangmanpha sangin manpha zawpek a, ahi zongin zi hoih ngah ding haksa mahmah hi.

Filippi 3:8

Tua tham loin keimah in Khazih Zeisu ka Topa ka theih tel nadingin na khempeuh supna hi ci-in ka ngaihsun hi.

2 PETER NIHNA 1:6

lungpilna tungah noptat khamna, noptatna khamna tungah thuakna, thuakna tungah Pasian biakna lamah nopsakna,

2 PETER NIHNA 1:8

Bang hang hiam na cih uh leh, tua thupha teng note in nei-in na hauh uh leh, i Topa Zeisu Khazih’ theihtelna-ah thadah loh nading ahi zongin, a gah om lo mawkna ahih loh nading ahi zongin, hong bawlpha thei uh hi.

2 PETER NIHNA 1:10

Tua ahih ciangin ute naute aw, note hong sapna leh hong teelna kipsak nadingin, nakpi-in hahkat zaw un. Tua bang na hih uh leh, na puk ngei kei ding uh hi.

2 PETER NIHNA 2:20

I Topa leh Honpa Zeisu Khazih theihtelna hangin leitung kihhuaina tawh a suahtak khit uh ciangin, khat vei awk kikin a lelh uh leh, a nung ciangin a pian’ in a pian’masak sangin a gilo zaw hi.

2 PETER NIHNA 3:18

Hehpihna thupha ah ahi zongin, i Topa leh Honpa Zeisu Khazih theihtelna ah ahi zongin na khangto un. Tua Topa tungah tu-a kipan a tawntungin minthan’na om ta hen. Amen.