2 KHANG TANGTHU NIHNATE 6:41 - Tedim Bible

⁴¹ “Tu-in ding-in Topa Pasian aw, na tawlngakna ding munah, na vangliatna singkuang tawh pai in. Topa Pasian aw, na siampite, gupna tawh zem in la, na hoihna ah na mi siangthote lungdam ta hen.

Tedim Bible Revision 2017

⁴¹ Tu-in ding in, Topa Pasian aw, na tawlngak nading munah na vangliatna lim Thuciamna Singkuang tawh pai in. Topa Pasian aw, na siampite, thupha pia inla, na hoihna ah na mi siangthote lungdam tahen.

2 KHANG TANGTHU NIHNATE 6:41 Referans Kwoze

Isaiah 61:10

Topa hangin nakpi takin ka lungdam ding a, ka Pasian hangin kipakin ka diang ding hi; bang hang hiam cih leh zipipa in a lu kizemin, mo thaknu a suangmanphate tawh a kizep mah bangin amah in hotkhiatna puan kei hong silhsakin, thumanna puanpi tawk kei hong tuam khin hi.

1 KHANG TANGTHU MASATE 28:2

Tua ciangin Kumpi David a khe-in ding to in, “Ka sanggam leh ka mite aw, ka thugen hong za un. Topa’ thuciamna singkuang ading leh i Pasian’ khengak nadingin tawlngakna inn khat lam ding ka lungsim sungah a om hi; tua ciangin a lam nading ka kiging hi.

Isaiah 66:1

Topa in hih bangin ci hi: “Vantung in keima tokhom hi a, leitung in keima khe ngakna ahi hi; kei’ adingin koi lai-ah inn lam ding a, keima tawlngakna mun koi lai ahi hiam?

Late 132:16

Ka hotkhiatna thu, a siampite ka taangko sak ding a, a mi siangthote lungdamin la sa-in awng ding uh hi.

Nehemiah 9:25

Tua hi a, amaute in kulh nei khuapite leh gam hoihte la uh a, na hoih tampi tawh a kidim innte, suang kikhuak tuibeemte, leenggui lote, oliv lote, leh nek theih singgah kung tampi luah uh hi; amaute in tuate ne-in gilvahin thau uh a, nangma hoihna hangin nuamsa mahmah uh hi.

Mangmuhna 19:14

Vantunga om galkapte in zong a siangtho a paak saihadial silhin sakol kaang tungah tuangin ama nung a zui uh hi.

Mangmuhna 19:8

A siangtho, a ngo mahmah saihadial puan silhna thu a ngah hi. Bang hang hiam i cih leh, tua saihadial puan in misiangthote’ dik gamtatna ahi hi,” ci-in a gen hi.

Filippi 4:4

Topa sungah lungdam tawntungin om un. Khatvei ka hong genkik-in ah lungdam un!

Filippi 3:3

Bang hang hiam na cih uh leh, Pasian Kha Siangtho hangin bia a, i pumpi muang loin, Khazih Zeisu hangah lungdamna kisaktheihna bek a nei eite in, vun-atna taktak a ngah mite i hi hi.

Galati 3:27

Bang hang hiam na cih uh leh, Khazih sungah bataizna a ngah mi khempeuh in Khazih a silh uh hi.

ROM (Romans) 13:14

Topa Zeisu Khazih silh un la, na pumpi huaiham na’ng uh note in na ngaihsun kei un.

ROM (Romans) 1:16

Khazih’ Lungdamna Thu hangin ka maizum kei hi. Bang hang hiam na cih uh leh, tua thu in a masa-in Judah mite, a nung ciangin Grik mite akipan a um mi khempeuh in gupna a ngah nading Pasian’ vangliatna ahi hi.

Zekhariah 9:17

Tua thu bangzah takin hoihin nuam ding ahi hiam! Anlim nekna in tangvalte thahatsak ding a, leenggahtui thak dawnna in nungakte thadimsak ding hi.

Isaiah 61:6

ahih hangin note pen Topa’ siampite hong kici ding a, mihingte in note pen i Pasian’ nasemte ci-in hong gen ding uh hi; minamte’ hauhna note in na ne ding uh a, amau’ hauhna note in na kisaktheihpih ding uh hi.

Isaiah 61:3

amaute pen a thuman mite kici-in, amah a kiminthan’sak theih nadingin Topa’ suan kungte a kicih theih nadingin, Zion ah a om a dah mite tungah vut tawh kibuak a, lukhu khuk tangin a hoih kumpi lukhu khuksak nading, tauna tangin lungdamna sathau nilhsak theih nading, a lunggimna tangin Pasian phatna puan a silh theih nadingun amah in kei hong sawl zo hi.

Late 110:2

Topa in Zion panin na kumpi ciangkhut hong puak hi. Na galte’ lakah uk in!

Late 65:11

Nangma hauhna tawh kum na phasak a, na leng paina tengah sathau taak hi.

Late 65:4

Na inn-a om dinga na tel na lakte in mi nuamsa ahi hi! Nangma biakinn siangtho ahi na inn sunga hoihna tawh lungkim nung!

Joshua 3:13

Leitung buppi’ Topa ahi Topa’ thuciamna singkuang a pua siampite’ khete in Jordan tui a siik ciangin Jordan tuite luang nawn lo ding a, a tung lam panin hong luangsuk tuite lom khatin khawl ding hi,” a ci hi.